ଲୋଇସିଂହା, ୭।୧୧(ଡି.ଏନ.ଏ)- ଗଲା ଦିଆଲି ଆଗରୁ ହେଇଥିବାର ଲଘୁଚାପ ବରଷାରେ ସୁବର୍ଣ୍ଣପୁର ଜିଲା କୁମୁଣ୍ଡେ ଗଁାର ଗିରିଶଙ୍କର ଗେଜୋକଁର ମାଏଟ୍ ଘରର କଁାଥି ଭାଂଗି ଯାଇଥିଲା। ଏନ୍ତାଥି ୪ ପରାନୀ କୁଟୁମ ସିମେଟ ପାଲ ତଲେ ବଡ଼ା ଗୁଲ୍ଗୁଲା ହେଇ ଜୀବନ ବିତଉଛନ୍। ଇ ବାବ୍ଦେ ଧରିତ୍ରୀ ସମ୍ବଲପୁର ସଂସ୍କରଣରେ ଖବର ବାହାରିଥିଲା। ଖବର ବାହାରଲାରୁ ଥାନୀଅ ପରଶାସନ ଘଟନାର ତଦଁତ୍ କରିଥିଲା। ଗରିଶଙ୍କରକୁଁ ୨୦୧୯-୨୦ ବଛରରେ ବିଜୁ ପକାଘର ଯୋଜନାରେ ସାମିଲ କରି ଘର ଯୁଗେଇ ଦିଆଯିବା ବଲି ସୁବର୍ଣ୍ଣପୁର ଜିଲାପାଳକୁଁ ତରଭା ବିଡିଓ ଜନେଇଛନ୍।
ସୂଚନା ଅନ୍ସାରେ ତରଭା ବ୍ଲକ ରାଣୀସର୍ଡ଼ା ପଁଚେତ୍ ଅଧୀନ କୁମୁଣ୍ଡେ ଗଁାର ଗରିଶଙ୍କର ଗେଜୋ। ପରିବାର କହେଲେ ମାଏକିନା ସାଧବି, ପୁଓ ଦେବରାଜ ଆର ଝି’ ପ୍ରିୟାଂଶିକେ ନେଇ ତାକର ସଁସାର। ପରିବାରଟା ନିହାତି ଗରିବ୍, କୁଲିମଜୁରି କରି ଗରିଶଙ୍କର କୁଟୁମ ପୁଷୁଛନ୍। ଗଲା ଦିଆଲି ଆଗରୁ ହେଇଥିବାର ଲଘୁଚାପ ବରଷାରେ ତାକର ଘରର କଁାଥି ଭାଂଗି ଯାଇଥିଲା। ହେଲେ ଅଲପକେ ପରିବାର ଲୋକ୍ ଗୁଟେ ବଡ଼ ବିପଦରୁ ବରତି ଯାଇଥିଲେ। ଅଭାବ ଅନାଟନ ଲାଗି ଗରିଶଙ୍କର ଘରଟା ମରାମତି କରି ନାଇଁପାରବାର। ଏନ୍ତାଥି ପରିବାରଟା ସିମେଟ ପାଲ ଦେଇ ବଡ଼ା ଗୁଲ୍ଗୁଲା ହେଇ ଭଂଗା ଘରେ ରହୁଛନ୍। ଇ ଘଟନାକେ ନେଇ ଗଲା ଅକ୍ଟୋବର ୩୧ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ‘ଦାଉସାଧ୍ଲା ଲଘୁଚାପ ବରଷା, ସିମେଟ ପାଲ ତଲେ ପରିବାର’ ଶୀରଷକ୍ରେ ଖବର ବାହାରିଥିଲା। ଇ ଖବରକେ ସାମାଜିକ କରମୀ ଦୀପା ବାରିକ ମୁଖ୍ୟମନ୍ତ୍ରୀ ଆର ସୁବର୍ଣ୍ଣପୁର ଜିଲାପାଳକୁଁ ଟୁଇଟ କରି ଗିରିଶଙ୍କର ଦୁଖ୍ ଜନେଇଥିଲେ। ଜିଲାପାଳ ଘଟନାକେ ଗୁରୁତ୍ ଦେଇ ସଂଗେ ସଂଗେ ଚିଠି ନଂ.୪୫୬ରେ ତରଭା ବିଡିଓକୁଁ ଘଟନାର ତଦଁତ କରି ରିପୋର୍ଟ ଦେବାକେ କହିଥିଲେ। ସେନ୍ତା ବିଡିଓ ଜିଲାପାଳକଁର ନିରଦେଶକେ ପାଲନ କରବାକେ ଯାଇ ରାଣୀସର୍ଡ଼ା ପିଇଓକୁଁ ଘଟନାର ତଦଁତ୍ କରି ରିପୋର୍ଟ ଦେବାକେ କହିଥିଲେ। ପିଇଓକଁର ରିପୋର୍ଟକେ ଆଧାର କରି ବିଡିଓ ଜିଲାପାଳକୁଁ ଜନେଇଛନ୍ ଯେ, ୨୦୧୧ ଜନଗଣନା ଏସ୍ଇସିସି ତାଲିକାରେ ଗିରିଶଙ୍କର ନଁା ନାଇଁଥାଇ। ଗରିଶଙ୍କରକୁଁ ପ୍ରଧାନମନ୍ତ୍ରୀ ଆବାସ ଘର ଦେବାର ଲାଗି ତାକର ନଁା ସେପ୍ଟେମ୍ବର ମାସେ ସରକାରକଁର ଆର୍ଏଚ୍ ପୋର୍ଟାଲରେ ଛଡ଼ାଯାଇଛେ। ସେ ଘର ପାଏବାର ଲାଗି ହକ୍ଦାର ଆଏ। ୨୦୧୯-୨୦ରେ ବିଜୁ ପକାଘର ଟାର୍ଗେଟ ଆଏଲେ ତାହାକୁ ସାମିଲ କରାଯିବା ବଲି ବିଡିଓ ତଦଁତ୍ ରିପୋର୍ଟରେ ଲେଖିଛନ୍।
