ବରଗଡ଼ ଅଫିସ୍,୧୫।୫: ଅଧାବାଟରେ ଗାଡ଼ି ଅଚଳ ହୋଇଯିବାରୁ ପ୍ରବାସୀ ଶ୍ରମିକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡିଛି। ବରଗଡ଼ ସହର ଉପକଣ୍ଠ ହଳଦୀପାଲି ଛକରେ ଶୁକ୍ରବାର ଏଭଳି ଏକ ଘଟଣା ଘଟିଛି ।
ମହାରାଷ୍ଟ୍ରର ବନ୍ଦରପୁରରେ କାମ କରୁଥିବା ପଶ୍ଚିମବଙ୍ଗ ମଲଦାର ୫୩ଜଣ ଶ୍ରମିକ ୩ଟି ଗାଡ଼ିରେ ଘରକୁ ଫେରୁଥିଲେ। ଶୁକ୍ରବାର ସକାଳ ପ୍ରାୟ ୮ଟାରେ ସେମାନେ ବରଗଡ଼ ହଳଦୀପାଲି ଛକରେ ପହଞ୍ଚିବା ପରେ ଗୋଟିଏ ଗାଡି ଅଚଳ ହୋଇ ପଡ଼ିଥିଲା। ଫଳରେ ସମସ୍ତ ଶ୍ରମିକ ଅପରାହ୍ନ ପ୍ରାୟ ୩ଟା ପର୍ଯ୍ୟନ୍ତ ସେଠାରେ ଅଟକି ରହିଥିଲେ । ଗୁଡ଼େଶିରା ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ଅକ୍ଷୟ କୁମାର ଗଡ଼ନାୟକ ଶ୍ରମିକଙ୍କ ଖାଇବା ବ୍ୟବସ୍ଥା କରିଥିଲେ ଏବଂ ଗ୍ୟାରେଜରୁ ମେକାନିକ୍ ଡକାଇ ଗାଡ଼ି ମରାମତି କରାଇଥିଲେ । ଶ୍ରମିକମାନେ ପୁଣି ନିଜ ଘର ଅଭିମୁଖେ ଯାଇଥିଲେ । ସେମାନେ ପ୍ରାୟ ୪ମାସ ତଳେ ମହାରାଷ୍ଟ୍ରକୁ କାମ କରିବାକୁ ଯାଇଥିଲେ। ସେଠାରେ ଟାୱାର ଖୁଣ୍ଟ ପୋତିବାରେ ସେମାନେ ନିୟୋଜିତ ଥିଲେ। ଜଣ ପ୍ରତି ମାସିକ ୧୦ହଜାର ଟଙ୍କା ଲେଖାଏ ପାରିଶ୍ରମିକ ମିଳୁଥିଲା। ମାତ୍ର ଲକ୍ଡାଉନ୍ ପରେ ସେମାନଙ୍କ କାମ ବନ୍ଦ ହୋଇଯାଇଥିଲା। ଶେଷରେ ସେମାନେ ୧ଲକ୍ଷ ୭୦ହଜାର ଟଙ୍କାରେ ୩ଟି ଗାଡ଼ି ଭଡ଼ା କରି ଘରକୁ ଫେରୁଥିବା ଶ୍ରମିକମାନେ କହିଛନ୍ତି।
