ଅନୁଗୋଳ ଅଫିସ, ୧୯।୫
ମହାମାରୀ କରୋନା ମୁକାବିଲା ପାଇଁ ଅନୁଗୋଳ ଜିଲାରେ ୧୮୬ ପାରା ମେଡିକାଲ ଷ୍ଟାଫ୍ଙ୍କୁ ନୂଆ ନିଯୁକ୍ତି ଦିଆଯାଇଛି। ସେମାନଙ୍କ ମଧ୍ୟରେ ୪୦ ଜଣ ଷ୍ଟାଫ୍ନର୍ସ ଅଛନ୍ତି। ଗତ ମାର୍ଚ୍ଚ ୩୧ରେ ସେମାନେ କାର୍ଯ୍ୟରେ ଯୋଗ ଦେଇଥିଲେ ବି ଏ ଯାଏ ଦରମା ପାଇନାହାନ୍ତି। ତେବେ ସୋମବାର ସେମାନଙ୍କୁ ଏକ ଗାଡ଼ିରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିଲା। କିନ୍ତୁ ସନ୍ଧ୍ୟାରେ ଗାଡ଼ି ପଠାଯାଇ ଅଣା ନ ଯିବାରୁ ସେମାନେ ଚାଲି ଚାଲି ଫେରିଥିବା ଜିଲା ମୁଖ୍ୟ ଚିକିତ୍ସା ଅଧିକାରୀ (ସିଡିଏମ୍ଓ) ପ୍ରତାପ ବେହେରାଙ୍କ ନିକଟରେ ଅଭିଯୋଗ ହୋଇଛି।
ଷ୍ଟାଫ୍ନର୍ସମାନେ ଅଭିଯୋଗ କରିଛନ୍ତି ଯେ, ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ୧୦ ଜଣ ଷ୍ଟାଫ୍ନର୍ସଙ୍କୁ ପରୀକ୍ଷାମୂଳକ ଭାବେ ସହର ଉପକଣ୍ଠ ପଞ୍ଚମହଲା ଅସ୍ଥାୟୀ ମେଡିକାଲ କ୍ୟାମ୍ପକୁ ପଠାଯାଇଥିଲା। ଏକ ସ୍ବତନ୍ତ୍ର ଗାଡ଼ି ସେମାନଙ୍କୁ ସେଠାରେ ଛାଡ଼ି ଆସିଥିଲା। ହେଲେ ଉକ୍ତ ଅସ୍ଥାୟୀ ମେଡିକାଲରେ ସେମାନଙ୍କ ରହିବା କି ଖାଇବା ପାଇଁ କୌଣସି ବ୍ୟବସ୍ଥା କରାଯାଇ ନ ଥିଲା। ଏପରି କି ବସିବାକୁ ଜାଗା ନ ଥିଲା। କେଉଁ କାମ କରିବାକୁ ହେବ ତାହା କହିବାକୁ ମଧ୍ୟ କେହି ନ ଥିଲେ। ଫଳରେ ସେମାନେ ଗଛମୂଳେ ଦିନତମାମ ଉପବାସରେ ବସି ରହିବାକୁ ବାଧ୍ୟ ହୋଇଥିଲେ। ଫେରିବା ପାଇଁ ଗାଡ଼ି ପଠା ନ ଯିବାରୁ ସେମାନେ ଚାଲି ଚାଲି ମୁଖ୍ୟ ଚିକିତ୍ସାଳୟକୁ ଫେରି ସିଡିଏମ୍ଓଙ୍କ ଦ୍ୱାରସ୍ଥ ହୋଇଥିଲେ। ଅନ୍ୟ ଜିଲାରେ ସମସ୍ତ ବ୍ୟବସ୍ଥା କରାଯାଉଥିବା ବେଳେ ଅନୁଗୋଳରେ କାହିଁକି ଏପରି ଅବ୍ୟବସ୍ଥା ବୋଲି ଷ୍ଟାଫ୍ନର୍ସମାନେ ପ୍ରଶ୍ନ କରିଥିଲେ। ତେବେ ରହିବା ପାଇଁ ସୁବିଧା କରାଯିବ ବୋଲି ସିଡିଏମ୍ଓ ପ୍ରତିଶ୍ରୁତି ଦେଇଛନ୍ତି।
