ଭବାନୀପାଟଣା,୨୫।୨(ସ୍ବ.ପ୍ର.): ଗରିବ ପରିବାର ଛାତ୍ରୀଛାତ୍ର, ଶିଶୁ ଶ୍ରମିକ, ଟଙ୍କା ଅଭାବରୁ ପାଠ ପଢ଼େଇ ନ ପାରୁଥିବା ଆର୍ଥିକ ଅନାଗ୍ରସର ପରିବାରର ପିଲାମାନଙ୍କୁ ମାଗଣାରେ ପାଠ ପଢ଼ାଇ ଏବେ ଜୁନାଗଡ଼ ସହରର ସୀତା ଗୁରୁମା’ ତାଙ୍କ ସ୍ବାମୀ ଦୀପକ ରଞ୍ଜନ ସାହୁ ଅନ୍ୟଙ୍କ ପାଇଁ ପ୍ରେରଣା ସାଜିଛନ୍ତି। ଗରିବ, ଆର୍ଥିକ ଅନାଗ୍ରସର ଘର ପିଲାମାନେ ତାଙ୍କ ପରିବାରରେ ପାଠ ପଢାଇବା ପାଇଁ ଆର୍ଥିକ ସମ୍ବଳ ନାହିଁ ତ ଆଉ କିଏ ଶିଶୁ ଶ୍ରମିକ ଭାବରେ କାମ କରୁଥିଲେ। ଦେଶର ଭବିଷ୍ୟତ କୁହାଯାଉ ଥିବା ଏଭଳି ପିଲାମାନଙ୍କ ପାଇଁ ଆଶାର ଆଲୋକ ପାଲଟିଛନ୍ତି ସୀତା ଗୁରୁମା’। କଳାହାଣ୍ଡି ଜିଲା ଜୁନାଗଡ଼ ସହରର ସୀତାରାଣୀ ସାହୁ ଏହିଭଳି ପିଲାମାନଙ୍କୁ ମାଗଣାରେ ପାଠ ପଢାଇ ଅଞ୍ଚଳ ପାଇଁ ଏକ ଆଦର୍ଶ ସୃଷ୍ଟି କରିଛନ୍ତି। ପ୍ରଥମେ ସେ କେତେଜଣ ପିଲାଙ୍କୁ ନେଇ ପଢେଇବା ଆରମ୍ଭ କରିଥିଲେ। ଏବେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ବଢ଼ି ୧୨୦ଜଣ ପିଲା ହୋଇଯାଇଛନ୍ତି। ସେଥିପାଇଁ ଦରମା ଦେଇ ଏବେ ସେ କିଛି ଶିକ୍ଷକ ନିଯୁକ୍ତି ଦେଇଛନ୍ତି। ପାଠଶଳାରେ ପାଠ ଛଡ଼ା ଅନ୍ୟାନ୍ୟ ଆକ୍ଟିଭିଟି ମଧ୍ୟ ଶିଖାଉଛନ୍ତି ସୀତା ଗୁରୁ ମା’। ଗୁରୁମା’ ସୀତାରାଣୀ ସାହୁଙ୍କ ସ୍ବାମୀ ଦୀପକ ରଞ୍ଜନ ସାହୁ ତାଙ୍କୁ ଏହି ମହତ କାର୍ଯ୍ୟ ପାଇଁ ସବୁବେଳେ ସହଯୋଗ କରିଥାନ୍ତି l ଯିଏ କି ପେଶାରେ ଜଣେ ଉଦ୍ୟୋଗୀ। ତାଙ୍କ ବ୍ୟବସାୟରେ ଯେତିକି ଅର୍ଥ ଉପାର୍ଜନ କରନ୍ତି ସେଥିରେ କିଛି ଅଂଶ ଗରିବ ଛାତ୍ରୀଛାତ୍ରମାନଙ୍କ ଆଡ଼ମିସନ, ପାଠ ପାଇବା ତଥା ସମାଜ ସେବା କ୍ଷେତ୍ରରେ ଖର୍ଚ୍ଚ କରିଥାନ୍ତି। ଏପରି ମହତ କାର୍ଯ୍ୟ ପାଇଁ ଗୁରୁମା’ ସୀତାରାଣୀ ସାହୁ ତାଙ୍କ ସ୍ବାମୀ ଦୀପକ ରଞ୍ଜନ ସାହୁଙ୍କୁ ଏବେ ଅଞ୍ଚଳରେ ବେଶ ପ୍ରଶଂସା କରାଯାଉଛି।
