ବିଜନର,୨୧।୮: ଉତ୍ତରପ୍ରଦେଶର ବିଜନର ଜିଲାର ଭାରତୀୟ କିଷାନ ୟୁନିୟନ(ଭାକିୟୁ) ପକ୍ଷରୁ ଚାଷୀମାନେ ଆନ୍ଦୋଳନକୁ ଓହ୍ଲାଇଛନ୍ତି। ଦେବଲଗଢ଼ ଗଁାର ଗଙ୍ଗା ନଦୀରେ ସେତୁ ନିର୍ମାଣ ଦାବିରେ ଶହ ଶହ ଚାଷୀ ଜଳ ସତ୍ୟାଗ୍ରହ ଆରମ୍ଭ କରିଛନ୍ତି। ଏହି ଆନ୍ଦୋଳନ ମଙ୍ଗଳବାରଠାରୁ ଆରମ୍ଭ ହୋଇଥିବା ବେଳେ ଏଥିରେ ୨୮ ଗଁାର ଶହେରୁ ଊର୍ଦ୍ଧ ଚାଷୀ ସାମିଲ ହୋଇଛନ୍ତି। ପ୍ରତିଦିନ ଆଣ୍ଠୁଏ ଆଣ୍ଠୁଏ ପାଣିରେ ଶତାଧିକ ଚାଷୀ ଠିଆହୋଇ ବିକ୍ଷୋଭ ପ୍ରଦର୍ଶନ କରିଛନ୍ତି। ସୂଚନାଯୋଗ୍ୟ, ବର୍ଷାଦିନେ ପାହାଡିଆ ଅଞ୍ଚଳରୁ ପାଣି ସବୁ ଆସି ଗଙ୍ଗା ନଦୀରେ ମିଶି ବନ୍ୟା ସୃଷ୍ଟି କରିଥାଏ। ଫଳରେ ଗଁାଲୋକଙ୍କୁ ବହୁ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ଏନେଇ ବହୁ ବର୍ଷରୁ ଉକ୍ତ ଗ୍ରାମଗୁଡ଼ିକର ଲୋକମାନେ ଗଙ୍ଗାନଦୀରେ ଏକ ପୋଲ ନିର୍ମାଣ ପାଇଁ ଦାବି କରିଆସୁଥିବା ବେଳେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ତେଣୁ ସରକାର ଯେ ପର୍ଯ୍ୟନ୍ତ ତାଙ୍କ ଦାବି ପୂରଣ ନ କରିଛନ୍ତି ସେ ପର୍ଯ୍ୟନ୍ତ ଏହି ଆନ୍ଦୋଳନ ଅନିର୍ଦ୍ଦିଷ୍ଟକାଳ ଜାରି ରହିବ ବୋଲି ସଂଘ ପକ୍ଷରୁ କୁହାଯାଇଛି। ବର୍ତ୍ତମାନ ପରିସ୍ଥିତିରେ ଗଙ୍ଗା ନଦୀ ଫୁଲିଥିବା ବେଳେ ଏଭଳି ସ୍ଥିତିରେ ଚାଷୀଙ୍କ ଜଳ ସତ୍ୟାଗ୍ରହ ପ୍ରଶାସନ ପାଇଁ ମୁଣ୍ଡ ବ୍ୟଥାର କାରଣ ପାଲଟିଛି। ଚାଷୀଙ୍କ ସୁରକ୍ଷା ଦୃଷ୍ଟିରୁ ପ୍ରଶାସନ ପକ୍ଷରୁ ଲାଇଫ ଜ୍ୟାକେଟ ବ୍ୟବସ୍ଥା ସହ ପୋଲିସକର୍ମୀଙ୍କୁ ନଦୀ ନିକଟରେ ମୁତୟନ କରାଯାଇଛି।
