ନୂଆଦିଲ୍ଲୀ,୨୧।୪: ଦକ୍ଷିଣ ଦିଲ୍ଲୀର ସକେତରେ ଥିବା ମାକ୍ସ ହସ୍ପିଟାଲରୁ ଆସିଛି ଖୁସି ଖବର। ଏଠାରେ କରୋନା ଭାଇରସରେ ପୀଡ଼ିତ ଜଣେ ବ୍ୟକ୍ତିଙ୍କ ଉପରେ କରାଯାଇଥିବା ପ୍ଲାଜମା ଥେରାପି ସଫଳ ହୋଇଥିବା ମେଡିକାଲ ପକ୍ଷରୁ ସୂଚନା ଦିଆଯାଇଛି। ଏଠାରେ ୪୯ ବର୍ଷୀୟ ଜଣେ ବ୍ୟକ୍ତିଙ୍କ ଉପରେ ଏହା ପରୀକ୍ଷା କରାଯାଇଥିବା ବେଳେ ତାଙ୍କୁ ଭେଣ୍ଟିଲେଟରୁ ବାହାର କରାଯାଇଥିଲେ ମଧ୍ୟ ସେ ଏବେ ସୁସ୍ଥ ଥିବା ମେଡିକାଲ ପକ୍ଷରୁ କୁହାଯାଇଛି। ଏହା ଦେଶର ପ୍ରଥମ ପ୍ଲାଜମା ଥେରାପି ହୋଇଥିବା ବେଳେ ସଫଳ ହୋଇଥିବା କହିଛନ୍ତି ମେଡିକାଲ କର୍ତ୍ତୃପକ୍ଷ। ସୂଚନାଯୋଗ୍ୟ, ଏପ୍ରିଲ ୪ରେ ଉକ୍ତ ବ୍ୟକ୍ତି ଜଣଙ୍କ କରୋନାରେ ପୀଡିତ ଥିବା ଜଣାପଡିଥିଲା। ସେହିଦିନ ହିଁ ତାଙ୍କୁ ମାକ୍ସ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ବେଳକୁ ବେଳ ତାଙ୍କ ସ୍ବାସ୍ଥ୍ୟରେ ଅବନତି ଆସିଥିଲା। ଏପ୍ରିଲ ୮ ବେଳକୁ ତାଙ୍କୁ ଭେଣ୍ଟିଲେଟରର ଆବଶ୍ୟକତା ପଡିଥିଲା। ହେଲେ ଏହାପରେ ତାଙ୍କ ସ୍ବାସ୍ଥ୍ୟାବସ୍ଥାରେ ଉନ୍ନତି ନ ଆସିବାରୁ ପରିବାର ଲୋକଙ୍କ ଅନୁରୋଧ କ୍ରମେ ତାଙ୍କୁ ପ୍ଲାଜମା ଥେରାପି ଦିଆଯାଇଥିଲା। ପ୍ରାୟ ୩ ସପ୍ତାହ ପୂର୍ବରୁ ସୁସ୍ଥ ହୋଇଥିବା ଜଣେ ବ୍ୟକ୍ତିଙ୍କ ନିକଟରୁ ଏହି ପ୍ଲାଜମା ନିଆଯାଇ ଉକ୍ତ ୪୯ ବର୍ଷ ବ୍ୟକ୍ତିଙ୍କୁ ଦିଆଯାଇଥିଲା। ଏପ୍ରିଲ ୧୪ରେ ତାଙ୍କୁ ପ୍ଲାଜମା ଥେରାପି ଦିଆଯାଇଥିବା ବେଳେ ଧୀରେ ଧୀରେ ସେ ସୁସ୍ଥ ହୋଇଥିବା ଲକ୍ଷ୍ୟ କରାଯାଇଛି। ଏହାପରେ ଏପ୍ରିଲ ୧୮ରେ ତାଙ୍କୁ ଭେଣ୍ଟିଲେଟରରୁ ବାହାରକୁ ଅଣାଯାଇଥିବା ବେଳେ ସେ ସୁସ୍ଥ ଥିବା ମେଡିକାଲ ପକ୍ଷରୁ କୁହାଯାଇଛି। ଏହାକୁ ନେଇ ମାକ୍ସ ହସ୍ପିଟାଲର ଗ୍ରୁପ ମେଡିକାଲ ଡାଇରେକ୍ଟର ସନ୍ଦିପ ବୁଦ୍ଧିରାଜ କହିଛନ୍ତି, ଏହି ଜଟିଳ ସମସ୍ୟା ସମୟରେ ପ୍ଲାଜମା ଥେରାପି ଏକ ନୂତନ ଆଲୋକ ଦେଖାଇଛି। ହେଲେ ସୁସ୍ଥ ହୋଇଥିବା ଜଣେ କରୋନା ସଂକ୍ରମିତ ଅତିବେଶୀରେ ୪୦୦ମିଲିଲିଟର ପ୍ଲାଜମା ଦେଇପାରିବେ ଯାହା ଫଳରେ ୨ଜଣ ସଂକ୍ରମିତଙ୍କ ଚିକିତ୍ସା କରାଯାଇପାରିବ। ହେଲେ ଏଥିରେ ଜଣେ ସଂକ୍ରମିତ ଶହେ ପ୍ରତିଶତ ସୁସ୍ଥ ହେବେ ବୋଲି କହିବା କଷ୍ଟକର ବ୍ୟାପାର।
