ମୁମ୍ବାଇ: ବଲିଉଡ୍ର ସିଙ୍ଗଲ ମଦର ଭାବେ ପରିଚିତ ସୁସ୍ମିତା ସେନ୍ ୪୪ ବର୍ଷରେ ପଦାର୍ପଣ କରିଛନ୍ତି। ୧୯୯୪ରେ ମିସ୍ ୟୁନିଭର୍ସ ଟାଇଟଲ ଜିତିବା ପରେ ବଲିଉଡ୍ରେ ଏଣ୍ଟ୍ରି କରିଥିଲେ ସୁସ୍ମିତା। ଏହାପରେ ସେ କେତେ ଗୁଡିଏ ହିଟ୍ ଫିଲ୍ମ ଦେଇ ଦର୍ଶକଙ୍କ ମନପସନ୍ଦର ନାୟିକା ପାଲଟି ଯାଇଥିଲେ। ହେଲେ ବେଶ୍ କିଛି ବର୍ଷ ହେବ ସେ ବଲିଉଡ୍ ଦୁନିଆରୁ ଦୂରେଇ ଯାଇଥିବା ଦେଖାଯାଇଛି। ବଲିଉଡ୍ର ସେ ଏମିତି ଜଣେ ନାୟିକା ଯିଏ ନିଜ ପର୍ସନାଲ ଲାଇଫ୍କୁ ନିଜ ହିସାବରେ ଜିଅନ୍ତି। ତେଣୁ ଆଜି ୪୪ ବର୍ଷରେ ପଦାର୍ପଣ କରି ମଧ୍ୟ ଏବେ ପର୍ଯ୍ୟନ୍ତ ସେ କୁମାରୀ ହୋଇ ରହିଛନ୍ତି। ହେଲେ ଏବେ ସେ ତାଙ୍କଠାରୁ ୧୫ ବର୍ଷ ସାନ ମଡେଲ ରୋହମନ ସଲଙ୍କ ସହ ରିଲେସନଶିପକୁ ନେଇ ଅଛନ୍ତି ଚର୍ଚ୍ଚାରେ। ତେବେ ଏହା ତାଙ୍କ ପାଇଁ ନୂଆ ନୁହେଁ ବୋଲି କୁହାଯାଏ। କାରଣ ଏହା ପୂର୍ବରୁ ତାଙ୍କର ପ୍ରାୟ ୧୦ ଜଣଙ୍କ ସହ ଆଫେୟାର୍ସ ଥିଲା ବୋଲି ଶୁଣିବାକୁ ମିଳେ। ସୁସ୍ମିତା ଯେତେବେଳେ ୨୦ ବର୍ଷର ଥିଲେ ସେତେବେଳେ ବଲିଉଡ୍ ନିର୍ଦ୍ଦେଶକ ବିକ୍ରମ ଭଟ୍ଟଙ୍କ ସହ ତାଙ୍କର ସମ୍ପର୍କ ଥିଲା ବୋଲି କୁହାଯାଏ। ଆଉ ସେତେବେଳେ ବିକ୍ରମଙ୍କ ବୟସ ଥିଲା ୨୭ ବର୍ଷ। ତେବେ ସୁସ୍ମିତାଙ୍କ ପାଇଁ ବିକ୍ରମ କୁଆଡେ ପ୍ରଥମ ସ୍ତ୍ରୀଙ୍କଠାରୁ ଅଲଗା ହୋଇଯାଇଥିଲେ। ଏହାପରେ ବଲିଉଡ୍ ଅଭିନେତା ରଣଦୀପ ହୁଡ୍ଡାଙ୍କ ସହ ସୁସ୍ମିତାଙ୍କ ଆଫେୟାର୍ସକୁ ନେଇ ହୋଇଥିଲା ଚର୍ଚ୍ଚା। ଏମାନଙ୍କୁ ଅନେକ ଥର ଏକାଠି ସ୍ପଟ୍ ମଧ୍ୟ କରାଯାଇଥିଲା। ହେଲେ ଏହା ବେଶିଦିନ ତିଷ୍ଠି ପାରି ନ ଥିଲା। ଦୁହିଁଙ୍କ ମଧ୍ୟରେ ହୋଇଥିଲା ବ୍ରେକ୍ଅପ୍। କେବଳ ସେତିକି ନୁହେଁ ସୁସ୍ମିତାଙ୍କ ନାଁ ସହ ରିତିକ ଭସିନ, ବଣ୍ଟି ସଚଦେହ, ସଞ୍ଜୟ ନାରଙ୍ଗ, ଶବିର ଭାଟିଆ, ଇମତିୟାଜ ଖତ୍ରୀ, ମୁଦସର ଅଜିଜ, ଓ୍ବାସିମ ଅକ୍ରମ, ମାନବ ମେନନଙ୍କ ସହ ଯୋଡି ଦିଆଯାଇଥିଲା। ଏମିତି ୧୦ ଜଣଙ୍କ ସହ ସମ୍ପର୍କକୁ ନେଇ ମଧ୍ୟ ସେ ଚର୍ଚ୍ଚାରେ ଥିବା ନାୟିକା। ହେଲେ ଏପର୍ଯ୍ୟନ୍ତ ବିବାହ କରି ନ ଥିବା ସୁସ୍ମିତା କ୍ୟାରିୟର ଆରମ୍ଭରୁ ଝିଅ ରେନିଙ୍କୁ ପୋଷ୍ୟ ଭାବେ ଗ୍ରହଣ କରିଥିଲେ। ଆଉ ଏହାର କିଛି ବର୍ଷ ପରେ ଝିଅ ଅଲିଷାକୁ ମଧ୍ୟ ପୋଷ୍ୟ ସନ୍ତାନ ଭାବେ ଗ୍ରହଣ କରି ବଲିଉଡ୍ର ସିଙ୍ଗଲ ମଦର ଭାବେ ଭିନ୍ନ ପରିଚୟ ସୃଷ୍ଟି କରିଛନ୍ତି।
