ଭବାନୀପାଟଣା/କୋକସରା-୪ । ୪, (ଡି.ଏନ.ଏ.) : ଖାଦ୍ୟ ସୁରକ୍ଷା ଯୋଜନାରେ ସାମିଲ ଥିବା ରାଜ୍ୟର ହିତାଧିକାରୀମାନଙ୍କୁ ଓଡ଼ିଶା ସରକାର ଆଗୁଆ ୩ ମାସର ରାସନ ସାମଗ୍ରୀ ସହ ପ୍ରତି ହିତାଧିକାରୀଙ୍କ ପରିବାରକୁ ୧ ହଜାର ଟଙ୍କା ଦେବା ପାଇଁ ଘୋଷଣା କରିଛନ୍ତି । ଏହି କ୍ରମରେ କଳାହାଣ୍ଡି ଜିଲା କୋକସରା ପଞ୍ଚାୟତର କୋକସରା, ଚିଲିଗୁଡା, ନୂଆପଡା ଓ ଗଡରାମାଲର ୧ ହଜାର ୧୧ ଜଣ ହିତାଧିକାରୀଙ୍କୁ ଏହି ଯୋଜନାରେ ଟଙ୍କା ମିଳିବ ବୋଲି ସୂଚନା ମିଳିଛି । ପ୍ରଥମ ପର୍ଯ୍ୟାୟରେ ଏହି ରାଶି ଶନିବାର ଗଡରାମାଲ ଗ୍ରାମର ହିତାଧିକାରୀଙ୍କୁ ବଣ୍ଟା ଯାଇଛି । ଲକଡାଉନ ଯୋଗୁଁ ଘରେ ରହିଥିବା ଗରୀବ ଖଟିଖିଆଙ୍କ ରୋଜଗାର ବନ୍ଦ ରହିଥିବା ବେଳେ ରାଜ୍ୟ ସରକାର ଏଭଳି ଘଡିସନ୍ଧି ସମୟରେ ଏହି ରାଶି ଯୋଗାଇ ଦେଇଥିବାରୁ ହିତାଧିକାରୀ ଖୁସିବ୍ୟକ୍ତ କରିଛନ୍ତି । ତେବେ ଏହି ଟଙ୍କା ବଣ୍ଟନ ସମୟରେ କୋକସରା ସରପଞ୍ଚ କିଶୋର ଚନ୍ଦ୍ର ପ୍ରଧାନି, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ବିରଞ୍ଚି ଖର୍ସେଲ, ଯୋଗାଣ ସହାୟକ ଦୟା ଶଙ୍କର ଶବର ଓ ନାଏବ ସରପଞ୍ଚ ବିଜୁଳି ବିଶି ପ୍ରମୁଖ ଉପସ୍ଥିତ ଥିଲେ।
