ଭୁବନେଶ୍ୱର,୬ା୪(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି) ବସ୍ତି ଉଚ୍ଛେଦ ଓ ବସ୍ତିବାସିନ୍ଦାଙ୍କଙ୍କୁ ଗୋଟିଏ ଜୋନରୁ ଉଠାଇ ଅନ୍ୟ ଏକ ଜୋନକୁ ସ୍ଥାନାନ୍ତର କରୁଛନ୍ତି। କିନ୍ତୁ ବିଏମ୍ସି ବସ୍ତିବାସିନ୍ଦାଙ୍କ ଆଧାର ଓ ରାଶନ କାର୍ଡର ସଂଶୋଧନରେ ତତ୍ପରତା ନ ଥିବାରୁ ସେମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଲକ୍ ଡାଉନ୍ ଚାଲିଥିବାବେଳେ ଭୁବନେଶ୍ୱରରେ ବିଏମ୍ସି ଦ୍ୱାରା ସାଧାରଣ ବଣ୍ଟନ ଆରମ୍ଭ ହୋଇଛି। ପୋଲିସ ଭୟରେ ଯାତାୟାତ କରିପାରୁ ନ ଥିବାରୁ ବସ୍ତିବାସିନ୍ଦା ଖାଇବାକୁ ନ ପାଇ ଉପାସ ରହୁଥିବା କହିଛିନ୍ତି।
ସୂଚନାଯୋଗ୍ୟ, ରେଲୱେ ପ୍ଲାଟଫର୍ମ ସହ ଟ୍ରାକ ସମ୍ପ୍ରସାରଣ ଯୋଗୁ ଗତ ୨୦୧୩ରେ ମଧ୍ୟ ନିର୍ବାଚନମଣ୍ଡଳୀ ତଥା ବିଏମ୍ସି ଦକ୍ଷିଣପୂର୍ବ ଜୋନର ୩୩ ନଂ ୱାର୍ଡ (ବନଫୁଲ ବସ୍ତି)ରେ ଦୀର୍ଘବର୍ଷ ଧରି ବସବାସ କରୁଥିବା ପ୍ରାୟ ୨୦୯ ପରିବାରକୁ ଉତ୍ତର ଜୋନ ତଥା ଇନଫୋସିଟି ଥାନା ଅନ୍ତର୍ଗତ ୱାର୍ଡ-୨କୁ ସ୍ଥାନାନ୍ତର କରାଯାଇଥିଲା। ରହିବାର ୭ବର୍ଷ ବିତିଯାଇଥିଲେ ମଧ୍ୟ ସେମାନଙ୍କ ଆଧାର, ରାଶନ କାର୍ଡର ଠିକଣା ଏଯାଏ ଦକ୍ଷିଣ ପୂର୍ବ ଜୋନ୍ରେ ରହିଛି। କିଛିି ବସ୍ତିବାସିନ୍ଦାଙ୍କ କହିବା ମୁତାବକ, ଉକ୍ତ ଅଞ୍ଚଳରେ ରହୁଥିବା ଜଣେ ପ୍ରଭାବଶାଳୀ ରାଜନେତା ନିଜ ସପକ୍ଷରୁ ୨୦୯ ଭୋଟ ଚାଲିଯିବା ଭୟରେ କାହାରି ମଧ୍ୟ ଭୋଟ ପରିଚୟପତ୍ରକୁ ବଦଳାଉ ନାହାନ୍ତି। ଯାହାର ଫଳସ୍ବରୁପ ସେମାନେ ଏହି ସାମ୍ପ୍ରତିକ ସ୍ଥିତିରେ ଭୋକ ଉପାସରେ ରହୁଛନ୍ତି।
ଏ ନେଇ ବିଏମ୍ସି ଅତିରିକ୍ତ ଯୋଗାଣ ଅଧିକାରୀ (ଏସିଏସ୍ଓ) ବସନ୍ତ କୁମାର ପଣ୍ଡା କହିଛନ୍ତି, ବିଭାଗ ସ୍ତରରେ ଏ ସମସ୍ୟା ନେଇ ଆଲୋଚନା କରାଯାଇଛି। ଯେଉଁ ସ୍ଥାନରେ ବର୍ତ୍ତମାନ ବସ୍ତିବାସିନ୍ଦାମାନେ ଅଛନ୍ତି, ସେହି ସ୍ଥାନରୁ ହିଁ ସେମାନଙ୍କୁ ରାଶନ ମିଳିପାରିବ ବୋଲି ବିଭାଗ ପକ୍ଷରୁ କୁହାଯାଇଛି। କିନ୍ତୁ ଯାନ୍ତ୍ରିକ ତ୍ରୁଟି ହେତୁ ତାକୁ କାର୍ଯ୍ୟକାରୀ କରାଯାଇପାରି ନାହିଁ। ଆଗାମୀ ଦିନରେ ଏ ନେଇ ତୁରନ୍ତ ସମାଧାନ କରାଯିବ ବୋଲି ସେ କହିଛନ୍ତି।
ସହଯୋଗର ହାତ ବଢ଼ାଇଲେ ସାଇ ମନ୍ଦିର ଟ୍ରଷ୍ଟ
ଏହି ଅବସ୍ଥାରେ ବନଫୁଲ ବସ୍ତିବାସିନ୍ଦାଙ୍କ ପାଇଁ ସାହାରା ସାଜିଛି ପଟିିଆ ସାଈ ମନ୍ଦିର ଟ୍ରଷ୍ଟ। ଲୋକଙ୍କର ଦୁର୍ଦ୍ଦଶା ଦେଖି ସାଈ ମନ୍ଦିର ଟ୍ରଷ୍ଟ ସହାୟତାରେ ପ୍ରତି ଘରକୁ ମାଗଣାରେ ଚାଉଳ, ତେଲ, ଡାଲି, ପରିବା ଦିଆଯାଇଛି। ବସ୍ତିର ସଭାପତି ଏସ୍ ଆପନା ରାଓଙ୍କ କହିବା ମୁତାବକ ପ୍ରଶାସନ ସେମାନଙ୍କୁ ଏଠାକୁ ଦୀର୍ଘ ୭ ବର୍ଷ ହେଲା ଆଣିଥିଲେ ମଧ୍ୟ ସେମାନଙ୍କ ପାଇଁ କୌଣସି ବ୍ୟବସ୍ଥା କରିନାହିଁ। ସରକାର କହିବା ମୁତାବକ, ଘରେ ରାଶନ ସାମଗ୍ରୀ ପହଞ୍ଚାଇବେ କଥା ପାଣିର ଗାର ସଦୃଶ ହୋଇଯାଇଛି। ତୁରନ୍ତ ସେମାନଙ୍କ ପରିବାରକୁ ସହାୟତା ପ୍ରଦାନ କରା ନ ଗଲେ ଅନେକ ଲୋକ ଅନାହାରରେ ମୃତ୍ୟୁମୁଖରେ ପଡିବେ ବୋଲି ବସ୍ତିର ପ୍ରଭାକର ସରାଇ, ମାନନ ଗାୟନ, ସଞ୍ଜୁ ତରାଇ, ସିମା ତିହାଢି ପ୍ରମୁଖ କହିଛନ୍ତି।
ସ୍ଥିତପ୍ରଜ୍ଞ ମିଶ୍ର
