କାଳିଆପାଣି,୧୩ା୯(ଡି.ଏନ୍.ଏ.)- ସୁକିନ୍ଦା ଖଣି ଅଞ୍ଚଳରେ କଲେଜ ଛାତ୍ରୀଛାତ୍ରଙ୍କ ଯାତାୟତ ପାଇଁ ଉଦ୍ଦିଷ୍ଟ ସ୍ବତନ୍ତ୍ର ବସ୍ ସେବା ବିପର୍ଯ୍ୟସ୍ତ ହୋଇଥିବା ଅଭିଯୋଗ ହୋଇଛି। ଏଠାରେ ଖଣି ମାଲିକଙ୍କ ଅର୍ଥରେ ୩ଟି ବସ୍ ଛାତ୍ରୀଛାତ୍ରଙ୍କ ଯାତାୟାତ ପାଇଁ ବ୍ୟବହାର କରାଯାଉଛି। ସେଥିରୁ ଗୋଟିଏର ଫିଟ୍ନେସ୍ ସାର୍ଟିଫିକେଟ୍ ନ ଥିବାବେଳେ ୧୫ରୁ ଊର୍ଦ୍ଧ୍ୱ ବର୍ଷ ହେବ ବସ୍ଟି ଅଞ୍ଚଳରେ ଛାତ୍ରୀଛାତ୍ରଙ୍କୁ ନବାଆଣିବା କରୁଥିବା ଜଣାପଡିଛି। ନୂତନ ଟ୍ରାଫିକ୍ ନିୟମ ଲାଗୁ ହେବା ପରେ ସବୁଠି ଆଇନକୁ କଡ୍ଡାକଡି ପାଳନ କରାଯାଉଛି। ହେଲେ ଛାତ୍ରୀଛାତ୍ରଙ୍କ ଯାତାୟାତରେ ବ୍ୟବହୃତ ଉକ୍ତ ବସ୍ ବର୍ତ୍ତମାନ ପର୍ଯ୍ୟନ୍ତ ଆଇନ ପରିଧି ଭିତରେ ନ ଆସିବା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ପ୍ରକାଶ ଯେ, କାଳିଆପାଣି ଖଣି ଅଞ୍ଚଳରେ କଲେଜ ପ୍ରତିଷ୍ଠା କରିବାକୁ ବିଧାୟକ ପ୍ରୀତିରଞ୍ଜନ ଘଡ଼ାଇ ୨୦୧୬ରେ ଏକ କମିଟି ଗଠନ କରିଛନ୍ତି। ଏହି କମିଟି ଅଞ୍ଚଳରେ କଲେଜ ପ୍ରତିଷ୍ଠା କରିବା ଦିଗରେ କାର୍ଯ୍ୟ କରୁଛି। ତେବେ କଲେଜ ପ୍ରତିଷ୍ଠା ହେବା ଯାଏ ସ୍ଥାନୀୟ ଅଞ୍ଚଳର ଛାତ୍ରୀଛାତ୍ରଙ୍କୁ ଯାତାୟାତ ସୁବିଧା ଯୋଗାଇବାକୁ ସେତେବେଳେ ପ୍ରାଥମିକସ୍ତରରେ ୧ ବସ୍ ସେବା ଆରମ୍ଭ ହୋଇଥିଲା। ସମୟକ୍ରମେ ଛାତ୍ରୀଛାତ୍ରଙ୍କ ସଂଖ୍ୟା ବଢିବାରୁ ଅଞ୍ଚଳର ସମସ୍ତ କମ୍ପାନୀଙ୍କ ମିଳିତ ଅର୍ଥରେ ଆଉ ୨ ବସ୍ ଚଳାଯାଉଛି। ସେଥିରୁ ଗୋଟିଏ ବସ୍ କାଳିଆପାଣି ଦେଇ ଚିତିରି କଲେଜକୁ ଯାଉଥିବା ବେଳେ ଅନ୍ୟ ୨ଟି ମଙ୍ଗଳପୁର ଦେଇ ସୁକିନ୍ଦା ଓ ହରିପୁର କଲେଜକୁ ଯାଉଛି। ହେଲେ ସୁକିନ୍ଦା କଲେଜକୁ ଯାଉଥିବା ବହୁପୁରାତନ ବସ୍ଟିରେ ନୂତନ ରଙ୍ଗ ଲଗାଯାଇ ବ୍ୟବହାର କରାଯାଉଛି। ଯେଉଁଥିରେ କଂସ, କାଳିଆପାଣି, ଚିଙ୍ଗୁଡ଼ିପାଳ, ରାଁସୋଳ ଅଞ୍ଚଳର ଆଦିବାସୀ ଅଧ୍ୟୁସିତ ପଞ୍ଚାୟତର ବହୁ ଛାତ୍ରଛାତ୍ରୀ ଯାତାୟାତ କରୁଛନ୍ତି। ବସ୍ଟି ବହୁ ସମୟରେ ଖରାପ ହୋଇ ରାସ୍ତାରେ ପଡ଼ିରହୁଥିବା ବେଳେ ରିସୋଲ ଟାୟାର ଲଗାଯାଇଛି। ଗତ କିଛି ଦିନ ତଳେ ଉକ୍ତ ବସ୍ର ଆଗ ଟାୟର ଫାଟିଯିବାରୁ ଛାତ୍ରୀଛାତ୍ର ଅଳ୍ପକେ ଦୁର୍ଘଟଣାରୁ ବତଯାଇଥିଲେ। କିନ୍ତୁ ରାସ୍ତାରେ ଟାୟାର ଫାଟିବାରୁ କେତେଜଣ ଛାତ୍ରୀଛାତ୍ର ଚାଲିଚାଲି କଲେଜ ଯାଇଥିବାବେଳେ ଆଉ କେତେଜଣ ଟ୍ରେକ୍ରେ ବସି ଯାଇଥିଲେ। ଏ ନେଇ କଲେଜ କମିଟି ସଭାପତି ପ୍ରଭାତ ପ୍ରଧାନଙ୍କୁ ପଚାରିବାରୁ, ବସ୍ ଦାୟିତ୍ୱ ଏବେ କମିଟି ହାତରେନାହିଁ। ବସ୍ ଚଳାଚଳ କଣ୍ଟ୍ରାକ୍ଟର ବୁଝୁଛନ୍ତି। ତେବେ ଦେଖାଦେଇଥିବା ସମସ୍ୟା ବାବଦରେ ବିଧାୟକଙ୍କୁ ଜଣାଇବେ ବୋଲି କହିଛନ୍ତି। ଏ ସମ୍ପର୍କରେ ଚଣ୍ଡିଖୋଲ ଆର୍ଟିଓ ଅଧିକାରୀଙ୍କ ମତାମତ ମିଳିପାରି ନାହିଁ।
