କାଳିଆପାଣି,୩୦।୪(ଡିଏନଏ)- ଲକ୍ଡାଉନ ଯୋଗୁ ଯାଜପୁର ଜିଲାରେ ମାସେରୁ ଊର୍ଦ୍ଧ୍ୱ ସମୟ ଧରି ଖଣିସଂସ୍ଥାଗୁଡ଼ିକ ପ୍ରଭାବିତ ହୋଇଛି। କିଛି ଖଣିରେ ଆଶିଂକଭାବେ କ୍ରୋମ ଉତ୍ତୋଳନ ଓ ପରିବହନ ହେଉଥିବାବେଳେ ଏହାକୁ ପୂର୍ଣ୍ଣ କାର୍ଯ୍ୟକ୍ଷମ କରିବା ପାଇଁ ଯାଜପୁର ଜିଲାପାଳ ରଞ୍ଜନ କୁମାର ଦାସଙ୍କ ଅଧ୍ୟକ୍ଷତାରେ ଗୁରୁବାର ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। କାଳିଆପାଣିସ୍ଥିତ ଓଡ଼ିଶା ଖଣିନିଗମ ଅତିଥି ଭବନରେ ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକ, ଉପଜିଲାପାଳ ନାରାୟଣ ଚନ୍ଦ୍ର ଧଳ, ଅତିରିକ୍ତ ଜିଲାପାଳ ମିହିର ମହାନ୍ତି, କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ ମିଶ୍ର, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ସନ୍ତୋଷ କୁମାର ସେଠୀ, ସୁକିନ୍ଦା ତହସିଲଦାର ବୁଲବୁଲ ବେହେରା, ବିଡିଓ ବିଶ୍ୱଜିତ ଦାସ, କଳିଙ୍ଗନଗର ଆରକ୍ଷୀ ଅଧୀକ୍ଷକ ରାଜକିଶୋର ଦୋରା, କାଳିଆପାଣି ଥାନାଧିକାରୀ ରମାକାନ୍ତ ମୁଦୁଲୀ, ଖଣି ନିରୀକ୍ଷକ ଅସିତ ବେହେରା, ବିଭିନ୍ନ ଖଣି ପରିଚାଳକମାନେ ଆଲୋଚନାରେ ଭାଗ ନେଇଥିଲେ। ଖଣି କାର୍ଯ୍ୟାଳୟ ପରିସରରେ କ୍ୱାରାଣ୍ଟାଇନ ସେଣ୍ଟର ତିଆରି କରିବା ସହ ସାମାଜିକ ଦୂରତ୍ୱ ବଜାୟ ରଖିବା, ମାସ୍କ ପିନ୍ଧା କରାଇବା ପାଇଁ ଉପସ୍ଥିତ ଖଣି କର୍ତ୍ତୃପକ୍ଷ ପ୍ରତିନିଧିଙ୍କୁ କୁହାଯାଇଥିଲା। ଖଣିରେ କାର୍ଯ୍ୟ କରୁଥିବା ଶ୍ରମିକ ଓ କର୍ମଚାରୀ ନିଜ କମ୍ପାନୀର ପରିଚୟ ପତ୍ର ଦେଖାଇ ଆସିପାରିବେ। ସେହିପରି କର୍ମଚାରୀମାନେ ଆସୁଥିବା ବସ୍ ଓ ଖଣିକୁ ଆସୁଥିବା ଅନ୍ୟ ସମସ୍ତ ପ୍ରକାର ଗାଡ଼ିକୁ ସାନିଟାଇଜ କରିବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ। ସେହିପରି ଦ୍ୱିତୀୟ ପର୍ଯ୍ୟାୟ ବୈଠକରେ ଜିଲାପାଳଙ୍କ ସହ କ୍ରୋମାଇଟ ପରିବହନ କରୁଥିବା ସଂସ୍ଥା ପ୍ରତିନିଧିଙ୍କୁ ନେଇ ବୈଠକ ଅନୁଷ୍ଠିତ ହୋଇଥିଲା। ଟ୍ରକ ଡ୍ରାଇଭରଙ୍କୁ ପରିବହନ ଠିକାସଂସ୍ଥା ମାସ୍କ ଦେବା ସହ କରୋନା ସମ୍ବନ୍ଧରେ ସଚେତନ କରାଇ ପରିବହନ କରିବେ। ଡ୍ରାଇଭର ସମ୍ପୂର୍ଣ୍ଣ ଘରର ଠିକଣା ଓ ବିବରଣୀ ପରିବହନ ସଂସ୍ଥା ରଖିବା ସହ ଦୈନନ୍ଦିନର କାର୍ଯ୍ୟ ବିବରଣୀ ଠିକାସଂସ୍ଥା ନିକଟରେ ଦାଖଲ କରିବା ପରେ ହିଁ ପୁନର୍ବାର ଖଣିରେ ଲୋଡିଂ ପାଇଁ ଅନୁମତି ମିଳିବ। ଯେଉଁ ଡ୍ରାଇଭରମାନେ ହଟସ୍ପଟ ଅଞ୍ଚଳକୁ ଲୋଡିଂ ନେଇ ଯିବେ ସେମାନେ ସର୍ବଦା ସାମାଜିକ ଦୂରତ୍ୱ ବଜାୟ ରଖିବା ସହ କେଉଁ କେଉଁ ସ୍ଥାନ ଓ ଲୋକଙ୍କ ସଂସ୍ପର୍ଶରେ ଆସିଛନ୍ତି ତାହାର ସମ୍ପୂର୍ଣ୍ଣ ବିବରଣୀ ଦେବାକୁ କୁହାଯାଇଛି। ଏହି ବିବରଣୀରେ ତ୍ରୁଟି ପରିଲକ୍ଷିତ ହେଲେ ଡ୍ରାଇଭରଙ୍କୁ ୧୪ଦିନ ପର୍ଯ୍ୟନ୍ତ କ୍ୱାରାଣ୍ଟାଇନ ସେଣ୍ଟରରେ ରଖାଯିବ ବୋଲି ଜିଲାପାଳ କଡ଼ା ନିର୍ଦ୍ଦେଶ ଦେଇଥିଲେ। ଏହାକୁ ପରଚାଳନା କରିବା ପାଇଁ ନୋଡାଲ ଅଫିସରଭାବେ ଖଣି ନିରୀକ୍ଷକ ବେହେରାଙ୍କୁ ନିଯୁକ୍ତ କରାଯାଇଛି।
