କେନ୍ଦୁଝର,୯।୧୦(ସ୍ବ.ପ୍ର.): କେନ୍ଦୁଝର ସହର ଢାଙ୍ଗରପଡ଼ା ସାହିରେ ଭଡା ଘର କରି ରହୁଥିବା ଜଣେ ଯୁବକ ମଙ୍ଗଳବାର ରାତିରେ ଆତ୍ମହତ୍ୟା କରିଛନ୍ତି। ସେ ହେଲେ ମୟୂରଭଞ୍ଜ ଜିଲା କାଶିଆ ଗ୍ରାମର ମନୋଜ ମହାନ୍ତ। ସେ ଅବିବାହିତ ଥିବା ବେଳେ ଯକୃତ କ୍ୟାନ୍ସର ପୀଡ଼ିତ ଥିବା ଯୋଗୁ ଆତ୍ମହତ୍ୟା କରିଥିବା ଜଣାପଡ଼ିଛି। ତାଙ୍କ ନିକଟରୁ ଏକ ସୁଇସାଇଡ୍ ନୋଟ ଜବତ କରାଯାଇଛି।
ସୁଇସାଇଡ୍ ନୋଟ୍ରେ ଉଲ୍ଲେଖ ରହିଥିବା ତଥ୍ୟ ଅନୁଯାୟୀ, ସେ ଲିଭର(ଯକୃତ) କ୍ୟାନ୍ସରରେ ପୀଡ଼ିତ। ଚିକିତ୍ସା ପାଇଁ ବହୁ ଅର୍ଥ ଖର୍ଚ୍ଚ ହେବ। ଘର ତଥା ପରିବାରଲୋକଙ୍କୁ ହଇରାଣ ହେବାକୁ ପଡ଼ିପାରେ। ନିଜକୁ କଷ୍ଟ ମଧ୍ୟ ହେବ। ଏଣୁ ଆତ୍ମହତ୍ୟା କରୁଛିି। ମୃତ୍ୟୁ ପାଇଁ ସେ ନିଜେ ଦାୟୀ ବୋଲି ଲେଖିଛନ୍ତି। ଏନେଇ ତାଙ୍କ ଦାଦା ସହଦେବ ମହାନ୍ତଙ୍କ ଏତଲା କ୍ରମେ ଟାଉନ ଥାନା ପୋଲିସ ଘଟଣାର ତଦନ୍ତ କରୁଛି।
ମନୋଜ ଶୁଆକାଠିସ୍ଥିତ ଏକ ଖଣିରେ ଠିକାକାମ କରୁଥିଲେ। ଖଣିରେ କାମ କରୁଥିବାରୁ ଏଭଳି ରୋଗ ହୋଇଥାଇପାରେ ବୋଲି ସେ ସୁଇସାଇଡ୍ ନୋଟ୍ରେ ଉଲ୍ଲେଖ କରିଛନ୍ତି। ଏହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଉକ୍ତ ଖଣିରେ ବହୁ କର୍ମଚାରୀ ଓ ଶ୍ରମିକ କାମ କରୁଥିବାରୁ ଏଭଳି ପ୍ରଦୂଷଣ ଜନିତ ରୋଗ ବ୍ୟାପିବା ଆଶଙ୍କା କରି ସେମାନେ ଚିନ୍ତିତ ହୋଇପଡିଛନ୍ତି। ଜିଲା ପ୍ରଶାସନ ଓ ପ୍ରଦୂଷଣ ନିୟନ୍ତ୍ରଣ ବୋର୍ଡ ଏ ନେଇ ତୁରନ୍ତ ପଦକ୍ଷେପ ନେବାକୁ ଦାବି ହେଉଛି।
