ଇସ୍ଲାମାବାଦ,୨୯ା୮: କଶ୍ମୀର ସମ୍ପର୍କିତ ଭାରତର ନିଷ୍ପତ୍ତି ପରେ ପାକିସ୍ତାନର ନିଦ ହଜିଯାଇଛି। ନିୟନ୍ତ୍ରଣରେଖା (ଏଲ୍ଓସି)ରେ ସୈନ୍ୟ ଠୁଳ କରି ଥରକୁ ଥର ଆଣବିକ ଅସ୍ତ୍ର ବ୍ୟବହାର ଓ ଯୁଦ୍ଧର ଭୟ ଦେଖାଉଥିବା ପାକିସ୍ତାନ ଏବେ ଭାରତର ସମ୍ଭାବ୍ୟ ଆକ୍ରମଣକୁ ନେଇ ନିଜେ ଛାନିଆ ହୋଇଯାଇଛି। ଏଥିପାଇଁ ଖୁବ୍ଶୀଘ୍ର ଆଣବିକ ଅସ୍ତ୍ର ପରୀକ୍ଷା କରିବା ପାଇଁ ପଡ଼ୋଶୀ ଦେଶ ସଜବାଜ ହେଉଛି। ଆସନ୍ତା ଅକ୍ଟୋବର କିମ୍ବା ନଭେମ୍ବରରେ ଭାରତ-ପାକିସ୍ତାନ ମଧ୍ୟରେ ଘମାଘୋଟ ଯୁଦ୍ଧ ହେବ ବୋଲି ପାକିସ୍ତାନର ରେଳମନ୍ତ୍ରୀ ଶେଖ୍ ରଶିଦ୍ ଅହମ୍ମଦଙ୍କ ବୁଧବାର ଭବିଷ୍ୟବାଣୀରୁ ଇସ୍ଲାମାବାଦର ଆଭିମୁଖ୍ୟ ସ୍ପଷ୍ଟ ହୋଇଛି।
ମିଳିଥିବା ସୂଚନାନୁସାରେ ସୀମା ସେପଟେ ପାକିସ୍ତାନୀ ସୈନ୍ୟ ଭାରତ ସହ ଯୁଦ୍ଧ ପାଇଁ ଠୁଳ ହୋଇଛନ୍ତି। କରାଚୀ ନିକଟସ୍ଥ ସୋନମିଆନି ଟେଷ୍ଟ ରେଞ୍ଜରେ ପରୀକ୍ଷା ପାଇଁ ଏକ ଆଣବିକ ଓ କେତେକ ପାରମ୍ପରିକ କ୍ଷେପଣାସ୍ତ୍ର ରଖାଯାଇଛି। ଭାରତ ପଟକୁ ମୁହଁ କରି ରଖାଯାଇଥିବା ପାରମ୍ପରିକ ଯୁଦ୍ଧାସ୍ତ୍ରଗୁଡ଼ିକ ମଧ୍ୟରେ ରହିଛି ହତ୍ଫ ୧ (୭୦-୧୦୦ କି.ମି. ରେଞ୍ଜ) ଓ ହତ୍ଫ ୨ (ଅବ୍ଦାଲି), ଯାହାର ଆକ୍ରମଣ କ୍ଷମତା ୧୮୦ରୁ ୨୦୦ କି.ମି.। ଏହାର ଆଣବିକ କ୍ଷେପଣାସ୍ତ୍ରଗୁଡ଼ିକ ହେଲା ୨୯୦ କି.ମି. ରେଞ୍ଜ୍ର ହତ୍ଫ ୩ (ଗଜ୍ନବୀ) ଏବଂ ହତ୍ଫ ୭ (୩୫୦-୭୦୦ କି.ମି. ଆକ୍ରମଣ କ୍ଷମତାସମ୍ପନ୍ନ ବାବର କ୍ରୁଜ୍ ମିଶାଇଲ)। ସେହିପରି ହତ୍ଫ ୪ (ଶାହିନ ୧- ୭୦୦ କି.ମି.), ଘୌରି ୧ ନାମକ ହତ୍ଫ ୫ (୨୫୦-୧୫୦୦ କି.ମି.) ଓ ୧୫୦୦ରୁ ୨୦୦୦ କି.ମି. ଆକ୍ରମଣ କ୍ଷମତାସମ୍ପନ୍ନ ହତ୍ଫ୍ ୬ (ଶାହିନ୍ ୨) କ୍ଷେପଣାସ୍ତ୍ର ମୁତୟନ କରାଯାଇଛି । ପାକିସ୍ତାନ ଏହି କ୍ଷେପଣାସ୍ତ୍ରଗୁଡ଼ିକର ପରୀକ୍ଷଣ ଖୁବ୍ଶୀଘ୍ର କରିବା ପାଇଁ ଯୋଜନା କରିଛି। ସେଠାକାର ନୋଟିସ ଟୁ ଏୟାରମେନ୍ (ଏନ୍ଓଟିଏଏମ୍) ଓ ନୌସେନାକୁ ସଜାଗ ରହିବା ପାଇଁ ବୁଧବାର ଆଲର୍ଟ କରାଯାଇଛି। ଅଗଷ୍ଟ ୨୮ ଓ ୩୧ରେ ଭୋର ୪ଟା ୪୦ରୁ ପୂର୍ବାହ୍ନ ୯ଟା ମଧ୍ୟରେ ସାମରିକ ଅଭ୍ୟାସ କରାଯିବ ବୋଲି ଉକ୍ତ ନୋଟିସରେ ଉଲ୍ଲେଖ କରାଯାଇଛି। ପାକିସ୍ତାନ ତା’ର ସମସ୍ତ ମିଶାଇଲ୍ ସିଷ୍ଟମ୍କୁ ଭାରତରେ ଆକ୍ରମଣ ପାଇଁ ବିକଶିତ କରିଛି। ଏହାସହ ଆଣବିକ ଶକ୍ତି କ୍ଷମତାକୁ ମଧ୍ୟ ବଳ ଦେବାରେ ଲାଗିଛି। ଯୁଦ୍ଧ ହେଲେ ଭାରତ ଉପରେ ଆଣବିକ ଅସ୍ତ୍ର ପ୍ରୟୋଗ କରାଯିବ ବୋଲି ଧମକ ଦେବାକୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କ ସମେତ ଦେଶର ଶୀର୍ଷ ନେତୃତ୍ୱ ପଛାଉନାହାନ୍ତି।
ରେଳମନ୍ତ୍ରୀ ଶେଖ୍ ରଶିଦ୍ ଅହମ୍ମଦ କହିଛନ୍ତି, କଶ୍ମୀରୀଙ୍କ ଭାଗ୍ୟ ଜାତିସଂଘ ନୁହେଁ, ବରଂ ସେମାନେ ନିଜେ ନିର୍ଦ୍ଧାରଣ କରିବେ। ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଯୋଗୁ କଶ୍ମୀରର ମୁକ୍ତି ପାଇଁ ଶେଷ ଯୁଦ୍ଧ କରିବାର ସମୟ ଆସିଯାଇଛି। ଏଥର ଭାରତ ସହ ଚୂଡ଼ାନ୍ତ ଓ ଶେଷ ଯୁଦ୍ଧ ହେବ। ୨୦୧୯ ଶେଷ ସୁଦ୍ଧା ବିଶେଷକରି ଆସନ୍ତା ଅକ୍ଟୋବରରୁ ନଭେମ୍ବର ଭିତରେ ଦୁଇଦେଶ ମଧ୍ୟରେ ନିର୍ଣ୍ଣାୟକ ଯୁଦ୍ଧ ହେବ ବୋଲି ରଶିଦ୍ କହିଛନ୍ତି। ତାଙ୍କ ଘୋଷଣା ପରିପ୍ରେକ୍ଷୀରେ ପାକିସ୍ତାନର ଏଭଳି ପ୍ରସ୍ତୁତିକୁ ନେଇ ନାନା କଳ୍ପନାଜଳ୍ପନା ପ୍ରକାଶ ପାଇଛି।
