କ୍ଷେତ୍ର ସେବା ବେଳେ ଅସୁବିଧା ଭୋଗୁଛନ୍ତି ବିଦ୍ୟୁତ୍ କର୍ମଚାରୀ, ସମସ୍ୟା ସମାଧାନ ନ ହେଲେ ଆନ୍ଦୋଳନ
21 ବାରିପଦା ଅଫିସ,୨୦।୮- ବିଦ୍ୟୁତ୍ କ୍ଷେତ୍ରରେ କାର୍ଯ୍ୟକ୍ଷମତାକୁ ତ୍ୱରାନ୍ବିତ କରିବା ନେଇ ବାରିପଦା ପାୱାର ଏମ୍ପ୍ଲୋଇଜ ୟୁନିୟନ ପକ୍ଷରୁ ବିଭାଗୀୟ ଅଧିକାରୀଙ୍କୁ ଘେରାଉ କରାଯାଇଛି। ଏଥିସହ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟରେ ବିକ୍ଷୋଭ ପ୍ରଦର୍ଶନ କରିବା ସହିତ ବିଭିନ୍ନ ଦାବି ତୁରନ୍ତ ପୂରଣ କରିବାକୁ ଲିଖିତ ଭାବେ ଦାବି କରିଛି। ୟୁନିୟନ ପକ୍ଷରୁ କୁହାଯାଇଛି ଯେ, ବାରିପଦା ବିଦ୍ୟୁତ୍ ଡିଭିଜନ ଅଧୀନରେ କୁଶଳୀ ଓ ଅଣ କୁଶଳୀ କର୍ମଚାରୀମାନଙ୍କ ଘୋର ଅଭାବ ଯୋଗୁଁ ଉତ୍ତମ ଗ୍ରାହକସେବା ଯୋଗାଇ ଦେବାରେ ବିଭିନ୍ନ ସମସ୍ୟା ଦେଖାଯାଉଛି। ଏହି ଡିଭିଜନ ଅଧୀନ ସମସ୍ତ ୩୩/୧୧ କେଭି ସବଷ୍ଟେସନର ଭିସିବିଗୁଡିକର ନବୀକରଣ ଆବଶ୍ୟକ ଥିବା ବେଳେ ବିଭାଗୀୟ ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁଁ କର୍ମଚାରୀ ଓ ଉପଭୋକ୍ତାମାନେ ହଇରାଣ ହେଉଛନ୍ତି। ଏହା ସହ ଡିଭିଜନ କାର୍ଯ୍ୟାଳୟରେ କିରାଣୀ ଅଭାବ ଯୋଗୁଁ ବିଦ୍ୟୁତ କର୍ମଚାରୀମାନଙ୍କ ଦରମା, ପେନସନ ଓ ଅନୁସଙ୍ଗିକ ଭତ୍ତା ଠିକ ସମୟରେ ମିଳୁ ନ ଥିବାରୁ କର୍ମଚାରୀ ମହଲରେ ଅସନ୍ତୋଷ ଦେଖାଦେଇଛି। ସେହିପରି ଏଜେନ୍ସି ମାଧ୍ୟମରେ ନିଯୁକ୍ତ ଠିକା କର୍ମଚାରୀମାନଙ୍କୁ ମାସ ମାସ ଧରି ଦରମା, ଇପିଏଫ, ଇଏସଆଇ ସହିତ ମରାମତି ଓ ସୁରକ୍ଷା ସରଞ୍ଜାମ ଠିକ୍ ସମୟରେ ପ୍ରଦାନ କରାଯାଉନାହିଁ। ଏହା ଶ୍ରମ ଆଇନର ଉଲ୍ଲଂଘନ କରୁଥିବା ୟୁନିୟନ ଅଭିଯୋଗ କରିଛି। ଠିକା ଏଜେନ୍ସି ଓ ବିଦ୍ୟୁତ୍ ବିଭାଗ ଉଚ୍ଚ କର୍ତ୍ତୃପକ୍ଷଙ୍କ ମଧ୍ୟରେ ସଲାସୁତୁରା କରାଯାଇ କର୍ମଚାରୀମାନଙ୍କ ପ୍ରତି ଶ୍ରମିକ ମାରଣ ନୀତି ପ୍ରତିପୋଷଣ କରାଯାଉଛି। ଅନ୍ୟପକ୍ଷେ ବିଭାଗର ବିଦ୍ୟୁତ୍ କାର୍ଯ୍ୟାଳୟଗୁଡିକ ଅସୁରକ୍ଷିତ ଓ ବିପଦସଙ୍କୁଳ ଅବସ୍ଥାରେ ରହିଛି। ଏଥିରେ କର୍ମଚାରୀମାନେ କାର୍ଯ୍ୟ କରୁଥିବାରୁ ସେମାନଙ୍କ ଜୀବନ ପ୍ରତି ବିପଦ ଦେଖାଯାଇଛି। ବାରିପଦା ନିର୍ବାହୀ ଯନ୍ତ୍ରୀ ଉପରୋକ୍ତ ବିଭିନ୍ନ ସମସ୍ୟାଗୁଡିକର ତୁରନ୍ତ ସମାଧାନ ନ କଲେ ସଂଘ ଆନ୍ଦୋଳନ କରିବ ବୋଲି ୟୁନିୟନର ସହ-ସାଧାରଣ ସମ୍ପାଦକ ଜ୍ୟୋତିକୃଷ୍ଣ ବେହେରା ଗଣମାଧ୍ୟମକୁ କହିଛନ୍ତି। ଅଧିକାରୀଙ୍କୁ ଘେରାଉ ଓ ଦାବିପତ୍ର ପ୍ରଦାନ କାର୍ଯ୍ୟକ୍ରମରେ ଯୁଗ୍ମ ସମ୍ପାଦକ କରୁଣାକର ପତି ଓ ମାନସରଞ୍ଜନ ଶୁକ୍ଳା, ଡିଭିଜନାଲ ସେକ୍ରେଟାରୀ ଚନ୍ଦନ କୁମାର ମହାନ୍ତି, ଦେବାଶିଷ ବେହେରା, ଜ୍ଞାନରଞ୍ଜନ ପରିଡା, ମନୋଜ କୁମାର କଲିଆ, ଚନ୍ଦନ ଜେନା, ଦିନେଶ ଗୁପ୍ତା, କୃଷ୍ଣପ୍ରସାଦ ମହାନ୍ତ, ସଞ୍ଜୟ ଘୋଷ, ହରେକୃଷ୍ଣ ମହାନ୍ତ, ପ୍ରମୋଦ ପାତ୍ର, କରୁଣାକର ମହାନ୍ତ, ପାର୍ଥସାରଥୀ ଦାସ, ପ୍ରଦୀପ ନାଥ, ପ୍ରଶାନ୍ତ ସାହୁ, ଜ୍ୟୋତି ବିଶ୍ୱାଳଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।