ନୂଆପଡା ଅଫିସ,୬ା୮
ଆଜକୁ ଲାଗ ଲାଗ ୪ରୁ ୫ ବର୍ଷଧରି ମରୁଡି ପରିସ୍ଥିତି ଯୋଗୁ ଜିଲାର ଚାଷୀମାନେ ଘାଇଲା ହୋଇଗଲେଣି। ଅନ୍ୟପଟେ ଏଥିରୁ ରକ୍ଷା ପାଇବାକୁ ସରକାର ଚାଷୀଙ୍କୁ କ୍ଲଷ୍ଟର ଜରିଆରେ ବୋରୱେଲ ମାଧ୍ୟମରେ ଜଳ ସେଚନର ସୁବିଧା କରିବାକୁ ବ୍ୟବସ୍ଥା କରୁଛନ୍ତି । ହେଲେ ଏହି ବ୍ୟବସ୍ଥାକୁ ବିଭାଗୀୟ ଅଧିକାରୀମାନେ ଅବହେଳା କରୁଥିବାରୁ ଚାଷୀମାନେ ସୁଫଳ ପାଇପାରୁ ନ ଥିବା ଦେଖାଯାଇଛି । ସଦର ବ୍ଲକ ଗୋଡଫୁଲା ଗ୍ରାମପଞ୍ଚାୟତର ହଂସପୁରୀ ଗାଁ ଏହାର ଉଦାହରଣ ହୋଇଛି । ଚାଷୀମାନେ ସୋମବାର ନୂଆପଡା ଆସି ଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି । ଚାଷୀ ଚନ୍ଦ୍ରଭାନୁ ସାହୁ, ମୀନାଲାଲ ସାହୁ, ଭୋଲାନାଥ ସାହୁ, କୌଶିକ ସାହୁ ପ୍ରମୁଖ ପୂର୍ବାହ୍ନ ୧୧ଟାବେଳେ ଆସି ଜିଲାପାଳ ମଧ୍ୟସ୍ମିତା ସାହୁଙ୍କୁ ଭେଟି ବିଭିନ୍ନ ସମସ୍ୟା ସମ୍ପର୍କରେ ଜଣାଇଛନ୍ତି । ଏହି ଗାଁରେ ଆଜକୁ ବର୍ଷକ ତଳେ ଉଠା ଜଳସେଚନ ବିଭାଗ ତରଫରୁ କ୍ଲଷ୍ଟର ବୋରୱେଲ ଖୋଲାଯାଇଥିଲା । ହେଲେ ବର୍ତ୍ତମାନ ସୁଦ୍ଧା ଏଥିରେ ବିଜୁଳି ସଂଯୋଗ କି ମୋଟର ବ୍ୟବସ୍ଥା କରାଯାଇ ନ ଥିବାରୁ ଚାଷୀମାନେ ବାର ଦୁଆର ହେଉଛନ୍ତି । ଠିକ ସମୟରେ ଏହା କରା ନ ଗଲେ ଏବର୍ଷ ମଧ୍ୟ ଏଥିରୁ ସୁଫଳ ମିଳିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏମାନଙ୍କ ସକାଶେ ବିଭାଗ ତରଫରୁ ବୋରୱେଲ ଖନନ କରାଯାଇଥିଲା । ହେଲେ ଆଜକୁ ବର୍ଷେ ବିତିଯାଇଥିଲେ ହେଁ ବିଜୁଳି ସଂଯୋଗ କରାଯାଇ ନ ଥିବାବେଳେ ମୋଟର ମଧ୍ୟ ଯୋଗାଇ ଦିଆଯାଉନାହିଁ । ଏହାକୁ ନେଇ ଚାଷୀମାନେ ବାରମ୍ବାର ବିଭାଗକୁ ଦୌଡୁଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହେଉ ନ ଥିବା ଅଭିଯୋଗ କରିଛନ୍ତି । ଏହା ଉପରେ ତୁରନ୍ତ ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ କରିବାକୁ ଜଣାଇଛନ୍ତି । ଏହା କଲେ ବର୍ତ୍ତମାନର ମରୁଡି ପରିସ୍ଥିତିରେ ଜଳ ସେଚନର ସୁବିଧା ପାଇପାରିବେ ବୋଲି ଆଶା ବ୍ୟକ୍ତ କରିଛନ୍ତି ।
