ପୁରୀ ଅଫିସ,୧୯ା୫: ସ୍ଥଳଭାଗ ମୁହଁ। ହେଉଛି ସାମୁଦ୍ରିକ ବାତ୍ୟା ଅମ୍ଫନ। ଏହାକୁ ଦୃଷ୍ଟିରେ ରଖି ପୁରୀ ଜିଲା ପ୍ରଶାସନ ସମ୍ପୂର୍ଣ୍ଣ ପ୍ରସ୍ତୁତ ରହିଛି। ସବୁ ବ୍ଲକରେ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି। ପାଣିପାଗ ବିଭାଗ ସୂଚନା ଅନୁଯାୟୀ ୧୯ରେ ପୁରୀ ଏଲୋ ଏବଂ ୨୦ ତାରିଖରେ ଅରେଞ୍ଜ ୱାର୍ଣ୍ଣିଂରେ ରହିଛି। ତେଣୁ ୧୯ ତାରିଖରେ ପ୍ରବଳ ବର୍ଷା ଏବଂ ୨୦ରେ ବର୍ଷା, ପବନ ବହିବାର ସମ୍ଭାବନା ରହିଛି। ଜିଲାର ସମୁଦ୍ର ନିକଟବର୍ତ୍ତୀ ଅଞ୍ଚଳ, ଖାଲୁଆ ଏବଂ ତଳିଆ ଅଞ୍ଚଳରୁ ଲୋକଙ୍କୁ ବାତ୍ୟା ଆଶ୍ରୟସ୍ଥଳ ଓ ନିରାପଦ ସ୍ଥାନକୁ ସ୍ଥାନାନ୍ତର କରାଯିବା ଲାଗି ପ୍ରଶାସନ ପ୍ରସ୍ତୁତ ଅଛି। ଏଥିଲାଗି ସୋମବାର ଡାକବାଜି ଯନ୍ତ୍ର ଯୋଗେ ବିଭିନ୍ନ ଅଞ୍ଚଳରେ ଲୋକଙ୍କୁ ସତର୍କ କରିଦିଆଯାଇଛି। ଜିଲାର ବିଭିନ୍ନ ବ୍ଲକ ସମେତ ପୁରୀ ସହରର ପେଣ୍ଠକଟା, ବଳିଆପଣ୍ଡା ସମେତ କେତେକ ବସ୍ତିରେ ମାଇକ ଯୋଗେ ପ୍ରଚାର କରାଯାଇଛି। ଆବଶ୍ୟକସ୍ଥଳେ ସେମାନଙ୍କୁ ସ୍ଥାନାନ୍ତର କରାଯିବ। ତେଣୁ ପ୍ରସ୍ତୁତ ରହିବାକୁ କୁହାଯାଇଛି। ସେହିପରି ଜିଲାକୁ ଆସିଥିବା ୨୧ଜଣିଆ ଏନ୍ଡିଆରଏଫ୍ ଟିମ୍ ସୋମବାର କୋଣାର୍କ ଯାଇ ଯାତ୍ରୀ ନିବାସରେ ରହିଛନ୍ତି। ସେମାନଙ୍କ ମଧ୍ୟରୁ ୧୦ଜଣ ଅସ୍ତରଙ୍ଗ ବ୍ଲକ ଯିବେ ଏବଂ ଅନ୍ୟମାନେ ଆବଶ୍ୟକତାକୁ ଦେଖି କୋଣାର୍କ ଏନ୍ଏସି ଅଞ୍ଚଳରେ ରହିବେ ବୋଲି ସୂଚନା ମିଳିଛି। ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ଜିଲାସ୍ତରୀୟ ଅଧିକାରୀମାନଙ୍କୁ ବିଭିନ୍ନ ବ୍ଲକର ଦାୟିତ୍ୱ ଦିଆଯାଇଛି। ସେମାନେ ବ୍ଲକକୁ ଯାଇ ପ୍ରସ୍ତୁତିର ସମୀକ୍ଷା କରିଛନ୍ତି।
