କୁଆମରା,୨ା୧୧(ଡି.ଏନ୍.ଏ.)- ବାଲେଶ୍ୱର ଜିଲା ନୀଳଗିରିର କୁଲଡିହା ଅଞ୍ଚଳରୁ ଏକ ଦନ୍ତା ସମେତ ମୋଟ ୭ଟି ହାତୀ ଗୁରୁବାର ରାତିରେ କୁଆମରା ଫରେଷ୍ଟ ଅଞ୍ଚଳରେ ପ୍ରବେଶ କରିବା ଯୋଗୁ ସାଧାରଣରେ ଆତଙ୍କ ସୃଷ୍ଟି ହୋଇଛି। ହାତୀପଲ ପ୍ରଥମେ କୁଆମରା ପଞ୍ଚାୟତର କଡଦା ଅଞ୍ଚଳରେ ପ୍ରବେଶ କରିଥିଲେ। ପରେ ସାଇଁକୁଳା ପଞ୍ଚାୟତର କଣ୍ଟିସାହି ଅଞ୍ଚଳକୁ ଯାଇ ଏକ ପୋଖରୀ ହୁଡାରେ ଅଟକିଥିଲେ। ସକାଳେ କିଛି ଚାଷ ଜମିରେ ପଶିବା ଯୋଗୁଁ ଥୋଡ ବାହାରୁ ଥିବା ଧାନ ଗଛ ଖାଇ ନଷ୍ଟ କରିଛନ୍ତି। ଚାଷୀମାନେ ହାତୀ ପଲକୁ ଘଉଡାଇବା ଯୋଗୁଁ ସେମାନେ ନୀଳଗିରି ବ୍ଲକ ତିନିଦେଶ ଅଞ୍ଚଳକୁ ପଳାଇ ଯାଇଥିଲେ। ମାତ୍ର ସେଠାରୁ ପୁଣି ଦିନ ୧୨ଟା ବେଳକୁ ଉଦଳା-ବାଲେଶ୍ୱର ମୁଖ୍ୟ ରାସ୍ତା ଦେଇ କୁଆମରା ଅଞ୍ଚଳ ଚାଷ ଜମିକୁ ଲେଉଟି ଥିଲେ। ହାତୀପଲ ବାଲେଶ୍ୱର ଓ ମୟୂରଭଞ୍ଜ ଜିଲା ସୀମାରେ ରହିଥିବାରୁ ଉଦଳା ଓ ନୀଳଗିରି ବନବିଭାଗ କର୍ମଚାରୀ ଖବରପାଇ ସେଠାରେ ପହଞ୍ଚି ସେମାନଙ୍କ ଗତିବିଧିକୁ ଲକ୍ଷ୍ୟ କରିଥିଲେ। ପରେ ସେମାନଙ୍କୁ ନୀଳଗିରି ଅଞ୍ଚଳକୁ ଘଉଡାଇ ଦେଇଥିଲେ। ଶୁକ୍ରବାର ସନ୍ଧ୍ୟାରେ ହାତୀପଲ କୁଆମରା ଅଞ୍ଚଳକୁ ଲେଉଟି ଥିବା ଜଙ୍ଗଲ ବିଭାଗ ପକ୍ଷରୁ ସୂଚନା ମିଳିଛି।
