ବାସୁଦେବପୁର, ୨୪।୧୦(ଡି.ଏନ.ଏ.)- ପ୍ରସିଦ୍ଧ କାଳୀପୂଜା ପାଇଁ ଚଳଚଞ୍ଚଳ ହୋଇଉଠିଛି ବାସୁଦେବପୁର ସହର। ନିଜ ନିଜର ମଣ୍ଡପକୁ ଆକର୍ଷଣୀୟ କରିବା ଲାଗି ବିଭିନ୍ନ ପୂଜା କମିଟି ଲାଗିପଡ଼ିଛନ୍ତି। ଜିଲା ଓ ରାଜ୍ୟରେ ବାସୁଦେବପୁର କାଳୀପୂଜାର ଯଥେଷ୍ଟ ଗୁରୁତ୍ୱ ରହିଥିବା ବେଳେ ଏହା ଏବେ ସାଂସ୍କୃତିକ ମହୋତ୍ସବରେ ପରିଣତ ହୋଇଛି। ସହରରେ ୪ଟି ଆମ କାଳୀ, ବ୍ଲକରୋଡ୍, ହାଇସ୍କୁଲ ରୋଡ୍ ଓ କଚେରି ବଜାର ମଣ୍ଡପରେ ମା’ଙ୍କୁ ପୂଜାର୍ଚ୍ଚନା ପାଇଁ ଜୋରସୋରରେ ପ୍ରସ୍ତୁତି ଚାଲିଛି।
ଉଲ୍ଲେଖନୀୟ ଯେ, ୧୯୪୪ ମସିହା ବେଳକୁ ତତ୍କାଳୀନ ସମୟର ଆଗଧାଡ଼ିର ବ୍ୟକ୍ତିବିଶେଷ ସହର ମଧ୍ୟରେ ପାଲି ଖେଳୁଥିବା ବେଳେ ଏହି କାଳୀପୂଜା ପାଇଁ ପରିକଳ୍ପନା କରିଥିଲେ। ଏକ ଝାଟିମାଟି ଚାଳଘରେ ପ୍ରଥମେ କାଳୀପୂଜା ଆରମ୍ଭ ହୋଇଥିଲା। ସେତେବେଳେ ଏହା ଥାନାହାଟକାଳୀ ଭାବେ ପରିଚିତ ହୋଇଥିଲା। ପରବର୍ତ୍ତୀ ସମୟରେ ଲୋକେ ଘଟଣାକ୍ରମରେ ବୁଢୀକାଳୀ ଆଖ୍ୟା ଦେଇଥିଲେ। ଗତ ୪/୫ ବର୍ଷ ପୂର୍ବେ ଏହାର ନାମ ଆମ କାଳୀ ବୋଲି ରଖାଯାଇଛି ଓ ଏହାର ପରିଚାଳନା ଦାୟିତ୍ୱ ଆମକାଳୀ କମିଟି ହାତରେ ନ୍ୟସ୍ତ ଅଛି। ଏହି କାଳୀପୂଜାର ପୂଜାବିଧି ନିଆରା ଥିବାବେଳେ ବାସୁଦେବପୁର ଥାନାରୁ ପ୍ରଥମ ଭୋଗ ପୂଜା ଦିନ ଥାନା ପକ୍ଷରୁ ପୂର୍ବବିଧି ଅନୁସାରେ ଅର୍ପଣ କରାଯାଇଥାଏ।
ଚଳିତବର୍ଷ ଏହି କାଳୀପୂଜାକୁ ୭୫ବର୍ଷ ଛୁଇଁଥିବାରୁ କମିଟି ହୀରକ ଜୟନ୍ତୀ ପାଳନ କରିବାକୁ ପ୍ରସ୍ତୁତି ଚଳାଇଛି। ମା’ କାଳୀଙ୍କର ସ୍ବତନ୍ତ୍ର ମନ୍ଦିର ନିର୍ମାଣ କାର୍ଯ୍ୟ ମଧ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଏହି ଅବସରରେ ପୂଜା କମିଟି ମା’ କାଳୀଙ୍କର ଏକ ସ୍ମରଣିକା ଉନ୍ମୋଚନ କରିବାର କାର୍ଯ୍ୟକ୍ରମ ରହିଛି। କେନ୍ଦ୍ରାପଡ଼ା ଅଞ୍ଚଳର ଅଭିଜ୍ଞ ଶିଳ୍ପୀମାନେ ମା’ଙ୍କ ଆକର୍ଷଣୀୟ ମୂର୍ତ୍ତି ଓ ପାର୍ଶ୍ୱ ଦେବଦେବୀଙ୍କ ମୂର୍ତ୍ତି ଆଙ୍କିବାରେ ନିମଗ୍ନ ରହୁଛନ୍ତି। ଚଳିତବର୍ଷ ଏହି ପୂଜା ମଣ୍ଡପରେ ପୌରାଣିକ ଉପାଖ୍ୟାନ ରାମଚନ୍ଦ୍ରଙ୍କ ଅଶ୍ୱମେଧ ଯଜ୍ଞରେ ବୁଲାଯାଉଥିବା ଘୋଡ଼ାକୁ ଲବକୁଶ ଅଟକାଇ ରଖିବା ଚିତ୍ରକଳ୍ପ ଆକର୍ଷଣ ସାଜିବ। ସେହିପରି ନିଳେନ୍ଦ୍ରୀହରଣ ପୌରାଣିକ ଉପାଖ୍ୟାନ ପରବର୍ତ୍ତୀ ସମୟରେ ତାରକାପୁର ବଧ ଚିତ୍ରକଳ୍ପ ମଧ୍ୟ ମଣ୍ଡପରେ ସ୍ଥାନ ପାଇଛି। ଏହା ସାଙ୍ଗକୁ ଆକର୍ଷଣୀୟ ତୋରଣ ମଧ୍ୟ ନିର୍ମାଣ ଚାଲିଛି। ଏହାଛଡ଼ା ସହର ମଧ୍ୟରେ ବ୍ଲକରୋଡ୍, ହାଇସ୍କୁଲ ରୋଡ୍ ଓ କଚେରି ବଜାର ପୂଜା କମିଟି ମା’ କାଳୀଙ୍କ ମୂର୍ତ୍ତି ସହ ସଚେତନତା ଚିତ୍ରକଳ୍ପ, ପୌରାଣିକ ଉପାଖ୍ୟାନ, ସୁନ୍ଦର ତୋରଣ, ଆକର୍ଷଣୀୟ ଆଲୋକସଜ୍ଜାରେ ଲାଗିପଡ଼ିଛନ୍ତି। ଏ ସମ୍ପର୍କରେ ଆମ କାଳୀପୂଜା କମିଟି ସଭାପତି କିଶୋର କୁମାର ମହାପାତ୍ର କହିଛନ୍ତି, ଏଠାରେ କାଳୀପୂଜା ଏକ ଭାଇଚାରାର ପର୍ବ ପାଲଟିଛି। ଚଳିତବର୍ଷ କମିଟି ୭୫ ବର୍ଷ ପାଳନ କରୁଥିବାରୁ ଏହା ବାସୁଦେବପୁର ଅଞ୍ଚଳ ପାଇଁ ଗର୍ବ ଓ ଗୌରବର ବିଷୟ ବୋଲି ସେ ମତ ପ୍ରକାଶ କରିଥିଲେ।
