ବିନିକା, ୭।୫(ଡି.ଏନ୍.ଏ.)-ସୁବଣ୍ଣର୍ର୍ପୁର ଜିଲାର ବିନିକା ଅଞ୍ଚଳ ଧାନଚାଷ ପାଇଁ ପ୍ରସିଦ୍ଧ। ଚଳିତ ବର୍ଷ ବିନିକାରେ ରବି ଧାନଚାଷ ୧୭ହଜାର ୨ଶହ ହେକ୍ଟର ଜମିରେ ହୋଇଛି। ୬୦ଭାଗ ଧାନଚାଷ କେନାଲ ଜଳସେଚନ ଓ ୪୦ଭାଗ ଉଠା ଜଳସେଚନ ଦ୍ୱାରା ହୋଇଛି । ୩ ହଜାର ହେକ୍ଟରରୁ ଊର୍ଦ୍ଧ୍ୱ ଜମିରେ ଅଞ୍ଚଳର ଅଳ୍ପ ସଂଖ୍ୟକ ଚାଷୀ ପନିପରିବା ସହିତ ତୈଳବୀଜ ତଥା ଡାଲି ଜାତୀୟ ଫସଲ କରିଛନ୍ତି। ମାତ୍ର କାଳବୈଶାଖୀର ତାଣ୍ଡବ ଯୋଗୁ ଧାନଚାଷ ବିଶେଷ ଭାବେ କ୍ଷତିଗ୍ରସ୍ତ ହୋଇଛି। ବର୍ତ୍ତମାନ ବିନିକା ଅଞ୍ଚଳର ୨୦ ଭାଗ ଜମିରେ ଧାନ ଫସଲ ପାଚି ଯାଇଥିବା ବେଳେ ୬୦ ଭାଗ ଅର୍ଦ୍ଧ ପାକଳ ଅବସ୍ଥାରେ ରହିଛି। ଆଉ ୨୦ ଭାଗ ଧାନଫସଲ ଚାଷୀମାନଙ୍କ ଧାନକ୍ଷେତରେ କଟା ହୋଇ ପଡିଛି। ନିକଟରେ ହୋଇଥିବା କାଳବୈଶାଖୀ ଯୋଗୁ ଜମିରେ କଟା ହୋଇଥିବା ଧାନଫସଲ ନଷ୍ଟ ହେବାରେ ଲାଗିଛି । କଟାଯାଇ ନ ଥିବା ଧାନଗଛ ପବନ ମାଡରେ ଜମିରେ ଶୋଇପଡିଛି। ବର୍ତ୍ତମାନ ବିନିକା ବ୍ଲକ ସିଂଘିଯୁବାର ମୁରଲୀ ମେଶୁଆ, ଖଇରମାଳର ସୁଦାମ ପାତ୍ର, ଅଶ୍ୱିନୀ ପଧାନ ବାଙ୍କିଘିର୍ଡିର ନରସିଂହ ସାହୁ, ସର୍ଜନ ସୁନା, ପୁରନ ଚାଉଁର, ବୀର ରଣା ପ୍ରମୁଖ ଚାଷୀଙ୍କର ଧାନଫସଲ କଟାହୋଇ ବର୍ଷାପାଣିରେ ଭିଜୁଛି। ଯଥାଶୀଘ୍ର ଫସଲ କ୍ଷୟକ୍ଷତି ଆକଳନ କରିବାକୁ ଚାଷୀ ମହଲରେ ଦାବି ହୋଇଛି।
