ବାରିପଦା ଅଫିସ,୯ା୧୨- ରକ୍ତ ଅଭାବରୁ ରୋଗୀମାନେ ଯେଭଳି ମୃତ୍ୟୁବରଣ ନ କରନ୍ତି, ତାହାକୁ ଦୃଷ୍ଟିରେ ରଖି ରାଜ୍ୟ ସରକାର ଭ୍ରାମ୍ୟମାଣ ରକ୍ତ ସଂଗ୍ରହ ଯାନର ବ୍ୟବସ୍ଥା କରିଛନ୍ତି। ଷ୍ଟେଟ ବ୍ଲଡ ଟ୍ରାନ୍ସଫ୍ୟୁଜନ କାଉନସିଲ ଓ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବାରିପଦା ବ୍ଲଡ ବ୍ୟାଙ୍କ ସମେତ ରାଜ୍ୟର ୯ଟି ବ୍ଲଡ ବ୍ୟାଙ୍କକୁ ଏଭଳି ଯାନ ପ୍ରଦାନ କରାଯାଇଛି। ଯେକୌଣସି ସ୍ଥାନରେ ରକ୍ତଦାନ ଶିବିର ଆୟୋଜନ କରାଗଲେ ସେଠାକୁ ଏହି ଭ୍ରାମ୍ୟମାଣ ଯାନ ଯାଇ ରକ୍ତ ସଂଗ୍ରହ କରିବା ବ୍ୟବସ୍ଥା ରହିଛି। ଏହି ରକ୍ତ ସଂଗ୍ରହ ଯାନରେ ଦୁଇଟି ବେଡ ସାଙ୍ଗକୁ ଅତ୍ୟାଧୁନିକ ବ୍ୟବସ୍ଥା ରହିଛି। ଉକ୍ତ ଯାନର ମୂଲ୍ୟ ପ୍ରାୟ ୭୦ ଲକ୍ଷ ଟଙ୍କା ହେବ। ଗତ ନଭେମ୍ବର ମାସରେ ଏହି ଯାନ ବାରିପଦାକୁ ଆସିଥିଲେ ମଧ୍ୟ ଗାଡିର ରେଜିଷ୍ଟ୍ରେଶନ ହୋଇ ନ ଥିବାରୁ ଏହା କାମରେ ନ ଲାଗି ସ୍ଥାନୀୟ ବ୍ଲଡ ବ୍ୟାଙ୍କ ପରିସରରେ ପଡ଼ି ରହିଛି। ଦୀର୍ଘ ଦିନ ହେଲା ଏହା ପଡ଼ି ରହିଥିବାରୁ ମେଶିିନ ଓ ଅନ୍ୟ ସାମଗ୍ରୀ ଖରାପ ହୋଇଯିବାର ଆଶଙ୍କା ରହିଛି। ଏ ଦିଗରେ ସ୍ବାସ୍ଥ୍ୟ ବିଭାଗ ଧ୍ୟାନ ଦେଇ ତୁରନ୍ତ ଗାଡ଼ିର ରେଜିଷ୍ଟ୍ରେଶନ କରି ଏହାକୁ କାର୍ଯ୍ୟକ୍ଷମ କରିବା ସକାଶେ ଅଞ୍ଚଳବାସୀ ଦାବି କରିଛନ୍ତି। ତେବେ ଗାଡ଼ିର ରେଜିଷ୍ଟ୍ରେଶନ ପାଇଁ ଆବଶ୍ୟକ କାଗଜପତ୍ର ଆଞ୍ଚଳିକ ପରିବହନ ଅଧିକାରୀଙ୍କ କାର୍ଯ୍ୟାଳୟକୁ ପଠାଯାଇଛି ବୋଲି ବ୍ଲଡ ବ୍ୟାଙ୍କ ପକ୍ଷରୁ କୁହାଯାଇଛି।
