ଭବାନୀପାଟଣା/ଜୁନାଗଡ଼,୮।୮(ଡି.ଏନ.ଏ.) ଗତ ୩ ଦିନ ଧରି ଲଘୁଚାପଜନିତ ଲଗାଣ ବର୍ଷା ଯୋଗୁ କଳାହାଣ୍ଡି ଜିଲାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ପ୍ରବଳ ବର୍ଷା ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । କଳାହାଣ୍ଡି ଓ କନ୍ଧମାଳ ଜିଲାକୁ ସଂଯୋଗ କରୁଥିବା ୫୭ ନମ୍ବର ଜାତୀୟ ରାଜପଥର ମଣ୍ଡଳପଦର ନିକଟରେ ଆପ୍ରୋଚ ରୋଡ଼ ଧୋଇଯାଇ ଯୋଗାଯୋଗ ବିଚ୍ଛିନ୍ନ ହୋଇପଡିଛି। ସେହିପରି ମୋହନଗିରି-ମ.ରାମପୁର ରାସ୍ତା ମଧ୍ୟ ଯୋଗାଯୋଗ ବିଚ୍ଛିନ୍ନ ହୋଇଛି । ଲାଞ୍ଜିଗଡ ବ୍ଲକର ଚମ୍ପାଦେଇପୁର ଗ୍ରାମପଞ୍ଚାୟତ ଚନ୍ଦନପୁର ଗ୍ରାମକୁ ବନ୍ୟା ଜଳ ପଶି ଯିବାରୁ ୫ଟି ପରିବାର ଗଁା ସ୍କୁଲରେ ଆଶ୍ରୟ ନେଇଛନ୍ତି । ଲାଞ୍ଜିଗଡ଼ ଓ ମୁନିଗୁଡା ରାସ୍ତା ବନ୍ୟା ଯୋଗୁ ବନ୍ଦ ଥିବାବେଳେ ରେଙ୍ଗୋପାଲି, ପନ୍ଧାଗୁଡା, କପାଗୁଡା ଗ୍ରାମ ଜଳ ଘେରରେ ରହିଛି । ଥୁଆମୂଳ ରାମପୁର ପେଟଫୁଲା ନଦୀରେ ବନ୍ୟା ଜଳ ପ୍ରବାହିତ ହେଉଛି । ଏଥିରେ କାଠଖୁରା ଗ୍ରାମର ଜଣେ ଯୁବକ ଭାସିଯାଇଥିବା ଜଣାପଡିଛି। ଖବର ସଂଗ୍ରହ ପର୍ଯ୍ୟନ୍ତ ଯୁବକ ଜଣକ ନିଖୋଜ ଥିବା ଜଣାପଡ଼ିଛି । ସେହିଭଳି ମଙ୍ଗଳବାରରୁ ବୁଧବାର ଦିନ ତମାମ ପ୍ରବଳ ବର୍ଷା ଯୋଗୁ ଲାଞ୍ଜିଗଡ-ମୁନିଗୁଡା ମୁଖ୍ୟ ରାସ୍ତା ବେଦାନ୍ତ କମ୍ପାନୀ ପାଖ ରାସ୍ତା ଉପରେ ୪ ଫୁଟ ପାଣି ପ୍ରବାହିତ ହେଉଛି । ଫଳରେ ୮ ଘଣ୍ଟା ଧରି ଯାତାୟାତ ବନ୍ଦ ରହିଛି ା
ଜୁନାଗଡ ବ୍ଲକରେ ପ୍ରବାହିତ ହାତୀନଦୀରେ ଜଳସ୍ତର ବୃଦ୍ଧି ପାଇ କୂଳ ଲଘିଂଛି। ଏହି ନଦୀରେ ୨୦୯.୫୭ ମିଟର ବିପଦ ସଙ୍କେତ ଥିବାବେଳେ ବୁଧବାର ୨୦୫.୯୩ ମିଟର ଉଚ୍ଚରେ ବନ୍ୟାଜଳ ପ୍ରବାହିତ ହେଉଛି। ସେହିପରି ଇନ୍ଦ୍ରାବତୀ ମଙ୍ଗଳପୁର ବ୍ୟାରେଜର ୫ଟି ଗେଟ୍ ଖୋଲାଯାଇଛି। ସେଠାରୁ ସେକେଣ୍ଡ ପ୍ରତି ୧୩୪ କ୍ୟୁସେକ ଜଳ ହାତୀନଦୀରେ ଛଡାଯାଉଛି। ଫଳରେ ହାତୀନଦୀର ତଳିଆ ଅଞ୍ଚଳରେ ବନ୍ୟା ଆଶଙ୍କା ଦେଖାଦେଇଛି। ବନ୍ୟାଜଳ ପ୍ରବେଶ କରି ଚାଷଜମିଗୁଡିକ ଏବେ ଜଳମଗ୍ନ ହୋଇଛି। ଲଗାଣ ବର୍ଷା ଯୋଗୁ ଚିଚୈଗୁଡା-ଜୁନାଗଡ ପିଡବ୍ଲ୍ୟୁଡି ରାସ୍ତା ମଧ୍ୟରେ ଥିବା ଖଲିଆ ସର (ନାଳ) ଉପରେ ପାଣି ଚାଲୁଛି। ଫଳରେ ସେହି ରାସ୍ତା ଦେଇ ଏବେ ଯାନବାହନ ଚଳାଚଳ ବନ୍ଦ ରହିଛି। ଲଗାଣ ବର୍ଷା ଯୋଗୁ ଜୁନାଗଡ଼ ବ୍ଲକରେ ୧୦ଟି ଘର ଭାଙ୍ଗିଛି। ଜୁନାଗଡ଼ ସହର ସିଡିପିଓ କାର୍ଯ୍ୟାଳୟ, ପିଆଇ କଲେଜ ପାଣି ଘେରରେ ରହିଥିବାବେଳେ ବିଜୁ ପଟ୍ଟନାୟକ ଷ୍ଟାଡିୟମ ଯିବା ରାସ୍ତା, ଫତେନଗରପଡା ରାସ୍ତାରେ ଆଣ୍ଠୁଏ ଉଚ୍ଚର ପାଣି ଚାଲୁଛି। ସହରର ତଳିଆ ଅଞ୍ଚଳରେ ରହୁଥିବା ଲୋକଙ୍କ ଘରେ ପାଣି ପଶିଯାଇଛି। ବର୍ଷାରେ ହୋଇଥିବା କ୍ଷୟକ୍ଷତିସ୍ଥିତି ଅନୁଧ୍ୟାନ କରିବା ପାଇଁ ଜୁନାଗଡ଼ ତହସିଲଦାର ଉପେନ୍ଦ୍ର ଲୁହା ବ୍ଲକର ବିଭିନ୍ନ ସ୍ଥାନ ବୁଲି ଦେଖୁଛନ୍ତି ା
