ରଣପୁର,୨୦ା୧(ସ୍ବ.ପ୍ର.): ନୟାଗଡ଼ ଜିଲା ରଣପୁର ଏନ୍ଏସିର ୧୩ନଂ. ୱାର୍ଡ ରଘୁନାଥପୁର ଗଁା ମୁଣ୍ଡରେ ଥିବା କଲଭର୍ଟରେ ଗର୍ତ୍ତ ସୃଷ୍ଟି ହୋଇ ଦୁର୍ଘଟଣାକୁ ଆମନ୍ତ୍ରଣ କରୁଛି। ଗତ ୨ମାସ ମଧ୍ୟରେ ଏଠାରେ ୩୪ଟି ଦୁର୍ଘଟଣା ଘଟିସାରିଲାଣି। ସେହିପରି ୧୨ ଗୃହପାଳିତ ପ୍ରାଣୀ ଗର୍ତ୍ତ ଭିତରେ ଗୋଡ ଖସି ଲାଗିରହିଥିବା ନଜିର ରହିଛି। ଉକ୍ତ ରାସ୍ତା ଦେଇ ରଣପୁର ବ୍ଲକକୁ ପ୍ରତିଦିନ ଲୋକ ଯାଉଛନ୍ତି। ପୁଣି ମାର୍ଥାପଦର, ଆରଡା, କଣ୍ଡରାସିଂ, ପାମ୍ପଡା, ନୂଆଗଁା ଲୋକଙ୍କର ଏହା ଯାତାୟାତ ରାସ୍ତା । ଏହି ରାସ୍ତାରେ ଭାରିଯାନ ମଧ୍ୟ ଯା’ଆସ କରୁଛି। ଏପରିସ୍ଥଳେ ୨ମାସ ହେଲା କଲଭର୍ଟରେ ଗର୍ତ୍ତ ହୋଇଥିଲେ ମଧ୍ୟ ଏହାର ମରାମତି କରାଯାଉନି କି ନୂଆ ନିର୍ମାଣ କରାଯାଉନି। କଲଭର୍ଟ ଭାଙ୍ଗିବା ସମ୍ପର୍କରେ ସ୍ଥାନୀୟ ବାସିନ୍ଦା ଏନ୍ଏସି ନିର୍ବାହୀ ଅଧିକାରୀ ଓ ଜିଲାପାଳଙ୍କୁ ଅବଗତ କରିଥିଲେ ମଧ୍ୟ ସୁଫଳ ମିଳିନି । ଏ ନେଇ ରଘୁନାଥପୁର ଗଁାର ରଞ୍ଜନ ଦଳବେହେରା, ମାନସ ସାହୁ କୁହନ୍ତି, କଲଭର୍ଟରେ ଗର୍ତ୍ତ ଓ ଦୁର୍ଘଟଣା ସମ୍ପର୍କରେ ପ୍ରଶାସନକୁ ଅବଗତ ପରେ ପଦକ୍ଷେପ ନାହିଁ । ତୁରନ୍ତ ନୂଆ କଲଭର୍ଟ ନିର୍ମାଣ କରା ନ ଗଲେ ଆନ୍ଦୋଳନ କରାଯିବ ବୋଲି ନିଷ୍ପତ୍ତି ହୋଇଛି । ଏ ସମ୍ପର୍କରେ ରଣପୁର ଏନ୍ଏସି ନିର୍ବାହୀ ଅଧିକାରୀ ଅର୍ଚ୍ଚନା ନାଏକ କୁନ୍ତେି, କଲଭର୍ଟରେ ଗର୍ତ୍ତ ସମ୍ପର୍କରେ ଅବଗତ ନ ଥିଲେ। କ’ଣ କରାଗଲେ ଲୋକ ଉପକୃତ ହେବେ ସେ ନେଇ ପଦକ୍ଷେପ ନିଆଯିବ।
