ନୂଆଦିଲ୍ଲୀ,୩୦।୩: କରୋନା ସଂକ୍ରମଣ ଭାରତରେ ଆତଙ୍କ ସୃଷ୍ଟି ହୋଇଛି। ସଂକ୍ରମଣ ରୋକିବା ଲାଗି ସାମାଜିକ ଦୂରତା ଅପରିହାର୍ଯ୍ୟ ହୋଇଥିବାରୁ ଭାରତ ସରକାର ୨୧ ଦିନିଆ ଲକ୍ଡାଉନ୍ ଘୋଷଣା କରିଛନ୍ତି। ଘରେ ବନ୍ଦ ଥିବା ୧୩୦ କୋଟି ଭାରତୀୟଙ୍କ ମଧ୍ୟରୁ ୯୬ କୋଟି ୩୩ ଲକ୍ଷ କରୋନା ସମ୍ପର୍କରେ ଜାଣିବା ପାଇଁ ମୁଖ୍ୟତଃ ଅଗ୍ରଣୀ ଗଣମାଧ୍ୟମ ଉପରେ ହିଁ ନିର୍ଭର କରୁଛନ୍ତି। ଅଗ୍ରଣୀ ଗଣମାଧ୍ୟମ ସଂସ୍ଥାଗୁଡ଼ିକ ଦ୍ୱାରା ପ୍ରକାଶିତ ଅବା ପ୍ରସାରିତ ହେଉଥିବା ତଥ୍ୟ ସାଧାରଣତଃ ଠିକ ହେଉଥିବାରୁ ଲୋକେ ଏସବୁକୁ ବିଶ୍ୱାସ କରୁଛନ୍ତି। ଆଇଏଏନ୍ଏସ୍ ସି-ଭୋଟର ଗେଲପ୍ ଆସୋସିଏଶନ ପକ୍ଷରୁ ହୋଇଥିବା ଏକ ସର୍ଭେ ରିପୋର୍ଟରେ ଏହା ପ୍ରକାଶ ପାଇଛି। ଦେଶର ୭୪.୧ ପ୍ରତିଶତ ଲୋକ କରୋନା ମହାମାରୀ ସମ୍ପର୍କିତ ଖବର ଲାଗି ଗଣମାଧ୍ୟମ ଉପରେ ଭରସା କରୁଛନ୍ତି। ସୋସିଆଲ୍ ମିଡ଼ିଆରେ ପ୍ରକାଶିତ କେତେକ ତଥ୍ୟ ଗୁଜବ ସୃଷ୍ଟି କରୁଥିବାରୁ ଲୋକେ ଅଗ୍ରଣୀ ଗଣମାଧ୍ୟମ ସଂସ୍ଥାଗୁଡ଼ିକର ତଥ୍ୟକୁ ହିଁ ବିଶ୍ୱାସ କରୁଛନ୍ତି। ତେବେ ୧୮.୫ ପ୍ରତିଶତ ଲୋକ ସୋସିଆଲ୍ ମିଡ଼ିଆରୁ କରୋନା ସମ୍ପର୍କରେ ଜାଣୁଛନ୍ତି। ଅପରପକ୍ଷରେ ୫.୨ ପ୍ରତିଶତ ଲୋକ ଅନ୍ୟମାନଙ୍କ ସହିତ କଥାବାର୍ତ୍ତା ହୋଇ କରୋନା ସମ୍ପର୍କରେ ଅଧିକ କିଛି ଜାଣିବାର ପ୍ରୟାସ କରୁଥିବା ଏହି ସର୍ଭେ ରିପୋର୍ଟରେ ଦର୍ଶାଯାଇଛି।
