ବଲାଙ୍ଗୀର ଅଫିସ, ୨୩ା୫-ଆଗଧାଡିର କରୋନା ଯୋଦ୍ଧାଭାବେ ସରକାରଙ୍କ ସବୁ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ପାଳନ ଓ ଜନସାଧାରଣଙ୍କୁ ସେବା ଯୋଗାଇବାସତ୍ତ୍ୱେ ରାଷ୍ଟ୍ରୀୟ ବାଲ ସ୍ବାସ୍ଥ୍ୟ କାର୍ଯ୍ୟକ୍ରମ (ଆରବିଏସ୍କେ)ର କର୍ତ୍ତବ୍ୟରତ ଆୟୁଷ ଡାକ୍ତର, ଫର୍ମାଶିଷ୍ଟ, ଏଏନ୍ଏମମାନଙ୍କୁ ସରକାରୀ ସୁବିଧା ସୁଯୋଗ ମିଳୁ ନାହିଁ। ଏ ନେଇ ବଲାଙ୍ଗୀର ଜିଲା ଆରବିଏସ୍କେ ଷ୍ଟାଫ୍ ସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯାଇଛି ା ଶନିବାର ଏହି ସଂଘର ଆୟୁଷ ଡାକ୍ତର, ଫର୍ମାଶିଷ୍ଟ ଓ ଏଏନ୍ଏମ୍ମାନେ ସିଡିଏମ୍ଓ ଡା. ନାରାୟଣ ଥନାପତିିଙ୍କୁ ସାକ୍ଷାତ କରି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦୁଇଦଫା ସମ୍ବିଳିତ ଦାବିପତ୍ର ପ୍ରଦାନ କରିଥିଲେ ା ଏହି ଦାବିପତ୍ରରେ କୋଭିଡ-୧୯ ମୁକାବିଲାରେ ଆରବିଏସ୍କେ ଷ୍ଟାଫ୍ମାନେ ଆଗଧାଡି କରୋନା ଯୋଦ୍ଧା ହୋଇଥିଲେ ମଧ୍ୟ ସେମାନଙ୍କୁ କୋଭିଡ-୧୯ର ଇନ୍ସେନ୍ଟିଭ୍, ସ୍ବାସ୍ଥ୍ୟବୀମା ଏବଂ ଅନ୍ୟ କରୋନା ଯୋଦ୍ଧାଙ୍କୁ ମିଳୁଥିବା ସୁବିଧା ସୁଯୋଗ ଦିଆଯାଉନାହିଁ ବୋଲି ଉଲ୍ଲେଖ କରିଛନ୍ତି। ଆରବିଏସ୍କେ ଷ୍ଟାଫ୍ମାନେ କରୋନା ମୁକାବିଲାରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ, କଣ୍ଟେନମେଣ୍ଟ ଜୋନ୍, ପ୍ରବାସୀଙ୍କ ହୋମ ଆଇସୋଲେସନ୍, ସ୍ବାବ୍ ପରୀକ୍ଷା ପାଇଁ ପଠାଇବା କାର୍ଯ୍ୟ କରୁଛନ୍ତି। ହେଲେ ସେମାନଙ୍କୁ ସ୍ବାସ୍ଥ୍ୟବୀମା, ଇନ୍ସେନ୍ଟିଭରୁ ବାଦ୍ ଦିଆଯାଇଛି ା ଏନେଇ ମୁଖ୍ୟମନ୍ତ୍ରୀଙ୍କୁ ପ୍ରେରିତ ଦାବିପତ୍ରରେ ଅନ୍ୟ କରୋନା ଯୋଦ୍ଧା ଭାବେ ସରକାରଙ୍କ ଘୋଷିତ ସମାନ ସୁବିଧା ସୁଯୋଗ ଓ ସ୍ବାସ୍ଥ୍ୟବୀମା, ଇନ୍ସେନ୍ଟିଭ ଯୋଗାଇବାକୁ ଦାବି କରିଛନ୍ତି ା ଅନ୍ୟ ସରକାରୀ ବିଭାଗରେ ୬ ବର୍ଷ ଧରି କାର୍ଯ୍ୟ କରିବା ପରେ ସେମାନଙ୍କୁ ରେଗୁଲାର କରାଯାଉଥିବାବେଳେ ଏଠାରେ ଆରବିଏସ୍କେ ଟିମ୍ରେ ୬ ବର୍ଷରୁ ଉର୍ଦ୍ଧ୍ୱ କାମ କରିବା ପରେ ମଧ୍ୟ ସେମାନଙ୍କୁ ରେଗୁଲାର କରାଯାଉ ନଥିବା ଅଭିଯୋଗ କରି ତୁରନ୍ତ ଏଦିଗରେ ପକ୍ଷେପ ଗ୍ରହଣ କରିବାକୁ ଅନୁରୋଧ ଜଣାଇଛନ୍ତି ା ସଂଘ ସଭାପତି ବିଶ୍ୱଜିତ ମିଶ୍ର, ସମ୍ପାଦକ ହୃଦାନନ୍ଦ ମେହେର, ଡା ମଧୁସ୍ମିତା ମେହେର, କିଶୋର ସାହୁ ସିଡିଏମ୍ଓ ଡା ଥନାପତିଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ ା ଏ ଦିଗରେ ସେ ବିହିତ ପଦକ୍ଷେପ ନେବେ ବୋଲି ସିଡିଏମ୍ଓ ପ୍ରତିଶ୍ରୁତି ଦେଇଥିଲେ ା ଏହାପରେ ଜିଲାପାଳ କାର୍ଯ୍ୟାଳୟକୁ ଯାଇ ଦାବିପତ୍ର ଦେଇଥିଲେ ା