ବାରାଣସୀ: ପିଲାଙ୍କ ଲାଗି ଫ୍ୟାନି୍ସ କଲର ମାସ୍କ, ବିଭିନ୍ନ ଡିଜାଇନ୍ ମାସ୍କ, ସାନିଟାଇଜର, ହ୍ୟାଣ୍ଡ ଗ୍ଲୋବ୍ସ, ସାବୁନ, ଗାମୁଛା ଓ ଭିନ୍ନ ଧରଣର ଫେସ୍ କଭର ଆଦି ସମସ୍ତ କରୋନା ସମ୍ପର୍କିତ ଜିନିଷ ଗୋଟିଏ ଛାତ ତଳେ ମିଳୁଛି। ଏଠାକୁ ଲୋକଙ୍କ ଲମ୍ବାଲାଇନ ମଧ୍ୟ ଲାଗିଛି। ପ୍ରାଣଘାତୀ କରୋନାର ପ୍ରକୋପ ବଢ଼ି ବଢ଼ି ଚାଲିଥିବା ବେଳେ ଏହାର ପ୍ରକୋପରୁ ନିଜକୁ ରକ୍ଷାକରିବା ଲାଗି ଏହି ମଲ୍କୁ ସମସ୍ତେ ଛୁଟି ଆସୁଛନ୍ତି। ଏହି ମଲ୍ର ନାମ ରହିଛି କରୋନା ମଲ୍। ଏହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସଂସଦୀୟ ନିର୍ବାଚନମଣ୍ଡଳୀ ତଥା ଉତ୍ତରପ୍ରଦେଶର ବାରାଣସୀ ଅନ୍ତର୍ଗତ ସିଗ୍ରା ଅଞ୍ଚଳରେ ରହିଛି। ମଲ୍ର ୟୁନିକ୍ ନାମକୁ ନେଇ ଲୋକଙ୍କ ମଧ୍ୟରେ ଯେତିକି ଚର୍ଚ୍ଚା, ତା’ଠାରୁ ବ୍ୟବସାୟ ଯଥେଷ୍ଟ ଅଧିକ ରହିଛି। ଛୋଟ ମଲ୍ ଥିବାରୁ ଏହି ଦୋକାନର ନାମକରଣ ଏଥିଲାଗି ଆମେ କରୋନା ମଲ୍ ରଖିଛୁ ବୋଲି କହିଛନ୍ତି ମଲ୍ ମାଲିକ।
କରୋନା ମଲ୍ ମାଲିକ ଅଶୋକ ସିଂ କୁହନ୍ତି, କରୋନାକୁ ନେଇ ଲୋକମାନେ ଭୟଭୀତ ଥିବାବେଳେ ସଂକ୍ରମଣ ରୋକିବା ଲାଗି ଆବଶ୍ୟକ ସମସ୍ତ ଉପକରଣ କରୋନା ମଲ୍ରେ ରଖାଯାଇଛି। ମାସ୍କ, ସାବୁନ, ହ୍ୟାଣ୍ଡ ସାନିଟାଇଜର, ହ୍ୟାଣ୍ଡ ଗ୍ଲୋବ୍ସ ଆଦି ଭଲ ବିକ୍ରି ହେଉଥିବା ସେ ପ୍ରକାଶ କରିଛନ୍ତି। କରୋନା ରୋକିବାକୁ ସମସ୍ତ ଆବଶ୍ୟକ ଜିନିଷ ଏଠାରେ ଉପଲବ୍ଧ। ଏଥିସହ ଟନେଲ ମେଶିନ, ଅଟୋମେଟିକ ସାନିଟାଇଜର ମେଶିନ, ଥର୍ମାଲ ସ୍କାନର ଭଳି ହାଇଟେକ୍ ମେଶିନ ମଧ୍ୟ ଏଠାରେ ଉପଲବ୍ଧ। ଜାଲ୍ ଜିନିଷ ଏଠାରେ ଜମା ମିଳେନା, ତେଣୁ ଲୋକମାନେ ମଲ୍ ଗହଳି ଥିଲେ ବି ଭୟ ନ କରି ଏଠାକୁ ଛୁଟିଆସନ୍ତି ବୋଲି ସିଂ କହିଛନ୍ତି। ସପ୍ତାହକ ମଧ୍ୟରେ ଏହି ମଲ୍ ବେଶ୍ ନାମ କରିପାରିଛି ବୋଲି ବାରାଣସୀର ଜଣେ ଗ୍ରାହକ ପ୍ରକାଶ କରିଛନ୍ତି। ଭଲ ଭଲ ବ୍ରାଣ୍ଡେଡ୍ ଜିନିଷ ଗୋଟିଏ ଜାଗାରୁ ମିଳିଲେ, ଏଭଳି ସୁଯୋଗକୁ ହାତଛଡ଼ା ବା କିଏ କରିବ।
