ଆସୁଛି ହୋଲି। ରଙ୍ଗର ଏହି ପର୍ବକୁ ପାଳନ କରିବାକୁ ଏବେଠୁ ରାସ୍ତାକଡ଼ରେ ଖୋଲିଲାଣି ବିଭିନ୍ନ ଦୋକାନ। ହେଲେ ଚଳିତ ବର୍ଷ କରୋନା ଯୋଗୁ ହୋଲି ପାଳନ ସାମାନ୍ୟ ଫିକା ପଡ଼ିପାରେ ବୋଲି ଆଶଙ୍କା ଦେଖାଦେଇଛି। ଅପରପକ୍ଷେ ଯଦି ହୋଲି ଖେଳିବାକୁ ମନ ବଳାଉଛନ୍ତି, ତେବେ କିଛି ପ୍ରାକୃତିକ ରଙ୍ଗର ବ୍ୟବହାର କରନ୍ତୁ। ଜାଣି ରଖନ୍ତୁ ସେଭଳି କିଛି ସହଜ ଉପାୟ
ଲାଲ ରଙ୍ଗ:
– ଶୁଖିଲା ଲାଲ ରଙ୍ଗ ଲାଗି ଆପଣ ନାଲି ଚନ୍ଦନ ପାଉଡରକୁ ଅଟା ଅଥବା ମଇଦାରେ ମିଶାଇ ପାରନ୍ତି। ନ ହେଲେ ଚନ୍ଦନ ସ୍ଥାନରେ ସିନ୍ଦୂରର ବ୍ୟବହାର କରିପାରିବେ।
-ସେହିଭଳି ଓଦା ଲାଲ୍ ରଙ୍ଗ ପାଇଁ ରାତିରେ ଗୋଲାପ ପାଖୁଡ଼ାକୁ ପାଣିରେ ଭିଜାଇ ରଖିଦିଅନ୍ତୁ। ସକାଳେ ଏହାକୁ ବ୍ୟବହାର କରିପାରିବେ।
ହଳଦିଆ ରଙ୍ଗ:
-ଶୁଖିଲା ହଳଦିଆ ରଙ୍ଗ ପାଇଁ ଗୋଟିଏ ପାତ୍ରରେ ହଳଦୀ ଓ ବେସନ ମିଶାଇ ଦିଅନ୍ତୁ।
-ସେହିଭଳି ଓଦା ହଳଦିଆ ରଙ୍ଗ ପାଇଁ ହଳଦୀକୁ ପାଣିରେ ଗୋଳାଇ ପାରିବେ। ଏହାଛଡ଼ା କୁସୁମ ଫୁଲ(ହଳଦିଆ)କୁ ପାଣିରେ ଭିଜାଇ ରାତିରୁ ରଖି ସକାଳେ ବ୍ୟବହାର କରିପାରିବେ।
କମଳା ରଙ୍ଗ:
– ଏହି ରଙ୍ଗ ଲାଗି ପଳାସ ଫୁଲକୁ ଶୁଖାଇ ପାଉଡ଼ର ପ୍ରସ୍ତୁତ କରିପାରିବେ।
-ଓଦା ରଙ୍ଗ ଲାଗି ପଳାସ ଫୁଲକୁ ଫୁଟାଇ ଦିଅନ୍ତୁ। ନଚେତ୍ ରାତି ସାରା ପାଣିରେ ଭିଜାଇ ରଖିଦିଅନ୍ତୁ।
ଗୋଲାପି ରଙ୍ଗ:
-ଏଥିଲାଗି ବିଟ୍କୁ ଛୋଟ ଛୋଟ କରି କାଟି ପାଣିରେ ଭିଜାଇ ରଖନ୍ତୁ।
-ନଚେତ୍ ଡାଳିମ୍ବକୁ ମଧ୍ୟ ପାଣିରେ ଭିଜାଇ ରଖିପାରିବେ।
ସବୁଜ ରଙ୍ଗ:
-ଘରେ ସବୁଜ ରଙ୍ଗ ପାଇଁ ଶୁଖିଲା ମେଥି ଏବଂ ପୁଦିନା ପତ୍ରକୁ ଶୁଖାଇ ଗୁଣ୍ଡକରି ଦିଅନ୍ତୁ।
-ସବୁଜ ପାଣି ରଙ୍ଗ ପାଇଁ ସବୁଜ ରଙ୍ଗର ପନିପରିବାକୁ ବାଟି ପେଷ୍ଟ ପ୍ରସ୍ତୁତ କରିପାରିବେ।
