ନୂଆଦିଲ୍ଲୀ,୭।୪(ପି.ଟି.)- କରୋନା ଭାଇରସ ଲଢେଇରେ ସାମିଲ ହୋଇଛନ୍ତି କିମ୍ବଦନ୍ତୀ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର। ସେ ୫୯ ଲକ୍ଷ ଟଙ୍କା ଦାନ କରିଛନ୍ତି। ସେହିପରି ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ମଧ୍ୟ ଦାତା ତାଲିକାରେ ସାମିଲ ହୋଇଛନ୍ତି। ତେବେ ପୂଜାରା କେତେ ପରିମାଣ ଅର୍ଥ ଦାନ କରିଛନ୍ତି ସେ ନେଇ ସେ କିଛି କହିନାହାନ୍ତି। ପୂଜାରାଙ୍କ ପୂର୍ବରୁ ବିରାଟ କୋହଲି, ରୋହିତ ଶର୍ମା, ଅଜିଙ୍କ୍ୟ ରାହାନେ ଓ କେଦାର ଯାଦବ ବହୁ ପରିମାଣର ଅର୍ଥ ଦାନ କରିଛନ୍ତି। ଗାଭାସ୍କର ୩୫ ଲକ୍ଷ ଟଙ୍କା ପ୍ରଧାନମନ୍ତ୍ରୀ କେୟାର୍ସ ଫଣ୍ଡକୁ ଓ ୨୪ ଲକ୍ଷ ଟଙ୍କା ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ଦାନ କରିଛନ୍ତି। ଏ ନେଇ ଗାଭାସ୍କରଙ୍କ ପୁଅ ରୋହନ ସ୍ପଷ୍ଟ କରିଛନ୍ତି। ଗାଭାସ୍କରଙ୍କ ଏହି ଅର୍ଥ ଦାନ ପଛରେ ମଜାଦାର ତଥ୍ୟ ରହିଛି। ୩୫ଟି ଶତକ ହାସଲ କରିଥିବାରୁ ୩୫ ଲକ୍ଷ ଓ ମୁମ୍ବାଇ ପାଇଁ ୨୪ଟି ଶତକ ହାସଲ କରିଥିବାରୁ ୨୪ ଲକ୍ଷ ଟଙ୍କା ଗାଭାସ୍କର ପୃଥକ ପୃଥକ ଦାନ କରିଛନ୍ତି ବୋଲି ରୋହନ ଟୁଇଟ୍ କରି ଉଲ୍ଲେଖ କରିଛନ୍ତି। ସେହିପରି ବ୍ୟାଡମିଣ୍ଟନ ତାରକା ପାରୁପାଲ୍ଲୀ କାଶ୍ୟପ ତେଲଙ୍ଗାନା ମୁଖ୍ୟମନ୍ତୀଙ୍କ ପାଣ୍ଠିକୁ ୩ ଲକ୍ଷ ଟଙ୍କା ଦାନ କରିଛନ୍ତି। ମୋର ଏ ଛୋଟିଆ ଦାନ କରୋନା ଭାଇରସ୍ ଲଢେଇରେ ବେଶ୍ ସହାୟ ହେବ ବୋଲି କାଶ୍ୟପ ଟୁଇଟ କରି କହିଛନ୍ତି।
