ନୂଆଦିଲ୍ଲୀ,୧୧।୩: ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନସେସ୍(ଏମ୍ସ)ର ଡାକ୍ତରମାନେ ଅଗାମୀ ଦିନରେ କରୋନା ଭାଇରସର ଔଷଧ ଓ ଟିକାକୁ ନେଇ ଗବେଷଣା କରିବେ ବୋଲି ଜଣାପଡିଛି। ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ) ଯେଉଁ ନିର୍ଦ୍ଦେଶ ଜାରି କରିଛି ସେହି ଅନୁଯାୟୀ ଏମ୍ସର ଡାକ୍ତରମାନେ କାମ କରିବେ ବୋଲି କୁହାଯାଉଛି। ଏମ୍ସର ନିର୍ଦ୍ଦେଶକ ରଣଦୀପ ଗୁଲେରିଆ କହିଛନ୍ତି, ଏପର୍ଯ୍ୟନ୍ତ କରୋନା ଭାଇରସକୁ ନେଇ ଯେତିକି ତଥ୍ୟ ଆସିଛି ସେହି ଅନୁଯାୟୀ ଜଣେ ଅନ୍ୟ ଜଣଙ୍କ ସମ୍ପର୍କରେ ଆସିଲେ ଏହା ବ୍ୟାପୁଛି ବୋଲି ଦେଖାଯାଇଛି। ସେ କହିଛନ୍ତି ବିଦେଶରୁ ସଂଗ୍ରହ କରାଯାଇଥିବା ନମୁନା ପରୀକ୍ଷା କରାଯାଉଛି। ଚାଇନାର ବୁହାନ ସହରରୁ ଆସିଥିବା ଭାରତୀୟଙ୍କ ନମୁନା ମଧ୍ୟ ପରୀକ୍ଷା କରାଯାଉଛି। ସେହିପରି ଇରାନରୁ ଆସିଥିବା କିଛି ନମୁନା ମଧ୍ୟ ଏମ୍ସରେ ପରୀକ୍ଷା କରାଯାଉଛି ବୋଲି ସେ କହିଛନ୍ତି। ଖୁବ୍ଶୀଘ୍ର ଏହାର ରିପୋର୍ଟ ପ୍ରକାଶ ପାଇବ। ଏହି କରୋନା ଭାଇରସ ଯେଭଳି ଭାବେ ସାରା ବିଶ୍ୱକୁ ବ୍ୟାପିବାରେ ଲାଗିଛି ଏମ୍ସର ଡାକ୍ତରମାନେ ମଧ୍ୟ ଏହାର ଗବେଷଣାର ଅଂଶ ହେବେ ବୋଲି ଗୁଲେରିଆ କହିଥିବା ଜଣାପଡିଛି।
