ପୁରୁଷୋତ୍ତମପୁର,୧୮।୩(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ତହସିଲ କାର୍ଯ୍ୟାଳୟଠାରେ ବୁଧବାର ତହସିଲଦାର ଅରୁଣ କୁମାର ନାୟକଙ୍କ ତତ୍ତ୍ୱାବଧାନରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଯାଇଛି । ଜିଲା ପ୍ରଶାସନ ପକ୍ଷରୁ ୧୪୪ ଧାରା ଜାରି ହୋଇଥିବା ବେଳେ ଶନିବାର ଓ ରବିବାର ହେବାକୁ ଥିବା ମହାବାରୁଣୀ ସ୍ନାନକୁ ତହସିଲଦାର ସମସ୍ତଙ୍କ ସହଯୋଗ ଲୋଡ଼ି ବନ୍ଦ କରିବାକୁ ଘୋଷଣା କରିଛନ୍ତି। କେବଳ ୫ ଜଣ ବ୍ୟକ୍ତିଙ୍କ ମଧ୍ୟରେ ମହାପ୍ରଭୁଙ୍କର ରୀତିନୀତି ଲାଗି ନିର୍ଦ୍ଦେଶ ଦିଆଯାଇଛି। ଏହାସହ ଯେପରି କୌଣସି ଶ୍ରଦ୍ଧାଳୁ ପ୍ରତାପୁର ବାରୁଣୀ ଘାଟକୁ ନ ଆସିବେ ସେଥିନେଇ ପୋଲିସ ଓ ପ୍ରଶାସନ ପକ୍ଷରୁ କଡ଼ା ପଦକ୍ଷେପ ନିଆଯାଇ ପ୍ରତାପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତାର ଆଛୁଲି ଛକ, ପ୍ରତାପୁର ଛକ, ବଡ଼ରାମ ପଲୀ ଛକ ଓ ଦକ୍ଷିଣକାଳୀ ଛକ ସିଲ୍ କରିଦିଆଯିବ ବୋଲି ନିଷ୍ପତ୍ତି ନିଆଯାଇଛି। ଏହାସହ ଜାମୁନି ଓ ପାଣ୍ଡିଆଠାରେ ହେବାକୁଥିବା ବାରୁଣୀ ଘାଟ ବୁଡ଼କୁ ମଧ୍ୟ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି । ଏପରିକି ଏହି ବାରୁଣୀ ଲାଗି ଯେପରି କୌଣସି ବସ୍ ଓ ଅଟୋ ଚଳାଚଳ ନ କରିବ ସେଥିଲାଗି ବସ ମାଲିକ ସଂଘ ଓ ଅଟୋମୋବାଇଲ ଆସୋସିଏଶନକୁ ନିର୍ଦ୍ଦେଶ ଦଆଯାଇଛିି ।
ସେହିପରି ଆସନ୍ତା ୨୪ ତାରିଖରୁ ଆରମ୍ଭ ହେବାକୁ ଥିବା ମା’ ଦଣ୍ଡକାଳୀଙ୍କ ଯାତ୍ରାକୁ ମଧ୍ୟ ବନ୍ଦ କରିବା ଲାଗି ନିର୍ଦ୍ଦେଶ ଦେଇ ୫ ଜଣଙ୍କୁ ନେଇ ରୀତିନୀତି ଅନୁସାରେ ପୂଜାର୍ଚ୍ଚନା କରିବାକୁ କହିଛନ୍ତି । ମାତ୍ର ଏହି ଦଣ୍ଡକାଳୀଙ୍କ ରୀତିନୀତି କରିବାକୁ ହେଲେ ଅତିକମରେ ୧୩ ଜଣ ବ୍ୟକ୍ତି (ତେର ଭୁକ୍ତା) ଆବଶ୍ୟକ ରହିଥିବା ହେତୁ ତାହାକୁ ନେଇ ଏବେ ସଙ୍କଟ ଦେଖାଦେଇଛି । ଏହି ବୈଠକରେ ଅତିରିକ୍ତ ତହସିଲଦାର ସୁନୀଲ କୁମାର ଟୁଡୁ, ଜନ୍ମେଜୟ ସାହୁ, ପୁରୁଷୋତ୍ତମପୁର ଥାନା ଆଇଆଇସି ଜଗନ୍ନାଥ ମଲ୍ଲିକ ଉପସ୍ଥିତ ଥିଲେ।
