ଢେଙ୍କାନାଳ ଅଫିସ, ୧୮।୨ – ପ୍ରସିଦ୍ଧ ଜାଗରଯାତ୍ରାକୁ ନେଇ ଚଳଚଞ୍ଚଳ ହୋଇଉଠିଛି କପିଳାସ କ୍ଷେତ୍ରାଧିପତି ଶ୍ରୀଚନ୍ଦ୍ରଶେଖର ଜୀଉଙ୍କ ପୀଠ। ଯାତ୍ରାକୁ ଶୃଙ୍ଖଳିତ କରିବାକୁ ପ୍ରସ୍ତୁତି ପର୍ବ ଯୋଜନା ଅନୁଯାୟୀ ଆଗେଇ ଚାଲିଛି। ପ୍ରତ୍ନତତ୍ତ୍ୱ ବିଭାଗ ପକ୍ଷରୁ ପୀଠର ଉନ୍ନତୀକରଣ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଜାରି ରହିଥିବାବେଳେ ଠାକୁରଙ୍କ ନୀତି ଠିକ୍ ସମୟରେ ସମ୍ପନ୍ନ କରିବା ଉପରେ ଗୁରୁତ୍ୱ ଦିଆଯାଉଛି।
ଆସନ୍ତା ଶୁକ୍ରବାର (୨୧ ତାରିଖ)ରେ ପବିତ୍ର ମହାଶିବରାତ୍ରି। ମହାଦେବଙ୍କ ଜାଗରଯାତ୍ରାକୁ ସୁଚାରୁରୂପେ ସମ୍ପାଦନ କରିବାକୁ ଦିନରାତି ଏକ୍ କରିଦେଇଛି ଦେବୋତ୍ତର ବିଭାଗ। ଜିଲା ଦେବୋତ୍ତର ଅଧିକାରୀ ତଥା ଢେଙ୍କାନାଳ ଉପଜିଲାପାଳ ସାଫଲ୍ୟ ମଣ୍ଡିତ ପ୍ରଧାନ ଶନିବାର ବିଭିନ୍ନ ଅଧିକାରୀଙ୍କ ସହ ପୀଠ ଉପସ୍ଥିତ ରହି ପ୍ରସ୍ତୁତି କାର୍ଯ୍ୟର ସମୀକ୍ଷା କରିଛନ୍ତି। ଅନ୍ୟପଟେ ଜାଗରଯାତ୍ରା ପୂର୍ବରୁ ପୀଠରେ ରଙ୍ଗକାମ ଶେଷ ହୋଇଛି। ନୂଆଚୂନ ଲାଗି ହେବା ପରେ ଝଟକୁଛି ମୁଖ୍ୟମନ୍ଦିର, ପାର୍ଶ୍ୱମନ୍ଦିର ଏବଂ ରୋଷଘର। ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମକୁ ନଜରରେ ରଖି ଦେବୋତ୍ତର ବିଭାଗ ପକ୍ଷରୁ ଧାଡ଼ି ଦର୍ଶନ ଲାଗି ସ୍ଥାୟୀ ଷ୍ଟିଲ ବ୍ୟାରିକେଡ୍ ନିର୍ମାଣ କରାଯାଇଛି। ପ୍ରତ୍ନତତ୍ତ୍ୱ ବିଭାଗ ପକ୍ଷରୁ ମନ୍ଦିର ସମ୍ମୁଖରେ ଉନ୍ନତୀକରଣ କାର୍ଯ୍ୟ ଚାଲିଛି। ସେହିପରି ବାରବାଙ୍କ ରାସ୍ତାରେ ବିଦ୍ୟୁତ୍ ବ୍ୟବସ୍ଥା, ପାହାଚ ରାସ୍ତା ମରାମତି ସାଙ୍ଗକୁ ଆନୁଷଙ୍ଗିକ କାମ ଜାରି ରହିଛି। ହାତପାହାନ୍ତାରେ ଶ୍ରଦ୍ଧାଳୁଙ୍କୁ ପାଣି ଯୋଗାଇ ଦେବାକୁ ଟ୍ୟାଙ୍କର ବ୍ୟବସ୍ଥା କରାଯାଇଛି। ଠାକୁରଙ୍କ ନୀତିକାନ୍ତି ସଅଳ ସାରିବା ପାଇଁ ସେବାୟତଙ୍କ ସହିତ ଆଲୋଚନା ହୋଇଛି। ଟ୍ରାଫିକ ନିୟନ୍ତ୍ରଣ, ପାର୍କିଂ ବ୍ୟବସ୍ଥା ସମେତ ଅଗ୍ନିଶମ ବିଭାଗ, ବିଦ୍ୟୁତ୍ ବିଭାଗ ପକ୍ଷରୁ ଅସ୍ଥାୟୀ ଟେଣ୍ଟ ପ୍ରସ୍ତୁତ କରାଯାଇଛି। ପୀଠ ସମେତ ଆଖପାଖ ଅଞ୍ଚଳକୁ ପରିଷ୍କାର ପରିଚ୍ଛନ୍ନ କରାଯାଇଛି। ବିଭିନ୍ନ ବିଭାଗ ମଧ୍ୟରେ ସମନ୍ବୟ ରଖି ନିର୍ଦ୍ଧାରିତ ସମୟ ପୂର୍ବରୁ ସମସ୍ତ କାମ ଶେଷ କରିବାକୁ ନିଷ୍ପତ୍ତି ହୋଇଛି।
ଏ ନେଇ ଜିଲା ଦେବୋତ୍ତର ଅଧିକାରୀ ତଥା ଉପଜିଲାପାଳ କୁହନ୍ତି, ଜାଗରଯାତ୍ରା ପାଇଁ କପିଳାସ ପୀଠରେ ସମସ୍ତ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ। ଆଇନଶୃଙ୍ଖଳା ରକ୍ଷା ପାଇଁ ୩ଜଣ ମାଜିଷ୍ଟ୍ରେଟ୍ଙ୍କ ସମେତ ଆବଶ୍ୟକ ପୋଲିସ ଫୋର୍ସ ମୁତୟନ କରାଯିବ। ଏଥି ପାଇଁ ବିଭିନ୍ନ ବିଭାଗକୁ ନେଇ ସମୀକ୍ଷା କରାଯାଇଥିବା ସେ ସୂଚନା ଦେଇଛନ୍ତି। ସୂଚନାଯୋଗ୍ୟ, ଚଳିତବର୍ଷ ଭୋର ୪ଟା ୨୦ରେ ମହାଦୀପ ମନ୍ଦିର ଚୂଡ଼ାକୁ ଉଠିବ। ରାଜ ପୁରୋଧା ପଞ୍ଚାନନ ମିଶ୍ରଙ୍କ ଦ୍ୱାରା ଏହି ସମୟ ନିର୍ଦ୍ଧାରିତ କରାଯାଇଛି।
