ଫୁଲବାଣୀ ଅଫିସ, ୭ା୭- ଏକ ଲାଞ୍ଚ ମାମଲାର ବିଚାର କରି ଶନିବାର ଫୁଲବାଣୀ ସ୍ବତନ୍ତ୍ର ଭିଜିଲାନ୍ସ ବିଚାରପତି ଭଗବାନ ପ୍ରଧାନ ଜଣେ କନିଷ୍ଠ ଯନ୍ତ୍ରୀଙ୍କୁ ୨ ବର୍ଷ ଜେଲ ଦଣ୍ଡାଦେଶ ସହ ୨୫ ହଜାର ଟଙ୍କା ଜରିମାନା କରିଛନ୍ତିି । ଏହା ଅନାଦାୟ ହେଲେ ଅଧିକ ୬ ମାସ ଜେଲ ଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି । ଅଭିଯୁକ୍ତ ହେଲେ କନ୍ଧମାଳ ଜିଲା କ୍ଷୁଦ୍ର ଜଳସେଚନ ବିଭାଗ ଜି.ଉଦୟଗିରି ସେକ୍ସନ ଦାୟିତ୍ୱରେ ଥିବା ତତ୍କାଳୀନ କନିଷ୍ଠ ଯନ୍ତ୍ରୀ ପ୍ରକାଶ ଚନ୍ଦ୍ର ସିଂ । ସେହିପରି ଘଟଣାରେ ମିଥ୍ୟା ସାକ୍ଷ୍ୟ ପ୍ରଦାନକାରୀଙ୍କ ବିରୋଧରେ ମାମଲା ରୁଜୁ କରିବାକୁ ମଧ୍ୟ ବିଚାରପତି ନିର୍ଦ୍ଦେଶ ଦେଇଛନ୍ତିି ।
୨୦୧୬ ରେ ଜି.ଉଦୟଗିରି ବ୍ଲକ କାକଲବାକିରେ କ୍ଷୁଦ୍ର ଜଳସେଚନ ବିଭାଗର ୧୨ ଲକ୍ଷ ଟଙ୍କାର ଏକ ପ୍ରକଳ୍ପ ନିର୍ମାଣ କାର୍ଯ୍ୟ ପାଇଁ ଭଞ୍ଜନଗର ଲଣ୍ଡେଇସାହିର ଅକ୍ଷୟ କୁମାର ବେହେରା ଟେଣ୍ଡର ପାଇଥିଲେ ା ହେଲେ ତାଙ୍କଠାରୁ ଏହି କାମକୁ ପାୱାର ଅଫ୍ ଆଟର୍ଣ୍ଣି ଜରିଆରେ ନେଇ ଭେଜିପୁଟ ଅଞ୍ଚଳର ବସନ୍ତ ବିଷୋୟୀ କାମ କରିଥିଲେ ା କାମ ସରିବା ମଧ୍ୟରେ ୩ଟି ପର୍ଯ୍ୟାୟରେ ବିଲ ମିଳିଥିଲା। ଫାଇନାଲ ବିଲ୍ ପାଇଁ ବସନ୍ତ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ପ୍ରକାଶଙ୍କୁ ଜୁନ ୨୯ତାରିଖରେ ଭେଟିଥିଲେ। ବିଲ କରିଦେବା ପାଇଁ ଯନ୍ତ୍ରୀ ସିଂ ବସନ୍ତଙ୍କୁ ୨୫ ହଜାର ଟଙ୍କା ଲାଞ୍ଚ ମାଗିଥିଲେ ା ଏତେ ଟଙ୍କା ଦେବାରେ ଅସମର୍ଥ ବୋଲି କହିବାରୁ ଯନ୍ତ୍ରୀ ତାଙ୍କ କଥା ଶୁଣି ନ ଥିଲେ ା ବସନ୍ତ ପୁଣି ଯନ୍ତ୍ରୀଙ୍କ ଭଡାଘରକୁ ଯାଇ ତାଙ୍କୁ ବିଲ କରିବାକୁ ଅନୁରୋଧ କରି ନିରାଶ ହୋଇଥିଲେ ା ସେ ବାଧ୍ୟ ହୋଇ ଜୁଲାଇ ୫ତାରିଖରେ ବ୍ରହ୍ମପୁର ଭିଜିଲାନ୍ସ ବିଭାଗରେ ଅଭିଯୋଗ କରିଥିଲେ। ଯୋଜନା ଅନୁସାରେ ବସନ୍ତ ୬ ତାରିଖରେ କନିଷ୍ଠ ଯନ୍ତ୍ରୀ ରହୁଥିବା ଭଡା ଘରେ ପହଞ୍ଚି ତାଙ୍କୁ ୨୫ ହଜାର ଦେଇଥିଲେ ା ସେଠାରେ ପୂର୍ବରୁ ପ୍ରସ୍ତୁତ ହୋଇ ରହିଥିବା ଭିଜିଲାନ୍ସ ବିଭାଗ କର୍ମଚାରୀ ଚଢ଼ାଉ କରି ପ୍ରକାଶଙ୍କ ପାଖରୁ ଟଙ୍କା ଜବତ କରି ଗିରଫ କରିବା ସହ କୋର୍ଟ ଚାଲାଣ କରିଥିଲେ। ଏ ନେଇ ଭିଜିଲାନ୍ସରେ ନଂ.୩୭/୧୬ରେ ମାମଲା ରୁଜୁ ହୋଇଥିଲା। ମାମଲାର ବିଚାର କରି ବିଚାରପତି ଉପରୋକ୍ତ ରାୟ ଶୁଣାଇଛନ୍ତି ା ହେଲେ ବିଚାରପତି ମାମଲାର ଅଭିଯୋଗକାରୀ ବସନ୍ତ ବିଷୋୟୀଙ୍କ ବିରୋଧରେ ମଧ୍ୟ ମିଥ୍ୟା ସାକ୍ଷ୍ୟ ପ୍ରଦାନ କରିବା ଅଭିଯୋଗରେ ଆଉ ଏକ ମାମଲା ରୁଜୁ କରିବା ପାଇଁ ନିର୍ଦ୍ଦେଶ ଦେଇଛନ୍ତି।
