ବିନିକା,୨୭ା୬ (ଡି.ଏନ୍.ଏ): ମୁନୁଷ୍ ଜାନିଶୁନି କେଭେ ପାଗଲ ନାଇଁ ହୁଏ। ପରିସ୍ଥିତି ତାହାକେ ଇ ଅବସ୍ତାକେ ପୁହୁଁଚେଇ ଦେସି। ତାର ସୋରସୁତର ନାଇଁ ରହେ, ଯେତେବେଲେ ଯାହାପାରଲା ତାହା କରବା। ଇଥିରଲାଗି ସମାଜ ବି ତାହାକେ ହୀନ ଦୁରୁଷ୍ଟିରେ ଦେଖ୍ସି। ଏନ୍ତା ଗୁଟେ ଘଟନାକେ ନେଇ ଗଲା ୧୩.୩.୨୦୧୯ରେ ଧରିତ୍ରୀ ସମ୍ବଲପୁର ସଂସ୍କରଣରେ ‘ବରଗଛ ତଳ ପାଲ୍ଟିଛେ ପୁନୀକଁର ଘର’ ଶୀରଷକ୍ରେ ଖବର ବାହାରିଥିଲା। ଖବର ବାହାରଲା ଉତାରୁ ସେ ସମିଆର ବିନିକା ବିଡିଓ ବିଶ୍ୱରଞ୍ଜନ ମଲ୍ଲିକ ଆର ଭଣ୍ଡାର ପଁଚେତ୍ ସରପଁଚ୍ ଲକ୍ଷ୍ମଣ ସାହୁ ପୁନୀର ଥଇଥାନ କରବାର କଥା ଦେଇଥିଲେ। ହେଲେ ଦୁଖର କଥା ଖବର ବାହାରିବାର ଆଏଜ୍କେ ୩ ମାସ ଉପରେ ବିତିଯାଇଥିଲେ ବି ପୁନୀର ଥଇଥାନ ନାଇଁ ହେଇପାରି। ଆଏଜ୍ ବି ବରଗଛ୍ ତଲେ ସେ ନିସାହା ଅବସ୍ତାରେ ରହିଛନ୍। ସେ କିଛି କଥାବାରତା ନାଇଁ କରୁଥିଲାବେଲେ କାଗଜ୍ ଖଁଡ଼େ ଦେଲେ ତାକର ନଁା ପୁନୀ ପଟେଲ, ଘର ଛତିଶଗଡ଼ ରାୟଗଡ଼ ଜିଲା ଗୋହଡିଡିପାର ବଲି ଲେଖୁଛନ୍। ସବୁବେଲେ ସେ ଭଣ୍ଡାର ଆର ପାପୀ ଗଁାର ମୁଖିଆ ରାସ୍ତା ତରେ ଥିବାର ବରଗଛ୍ ତଲେ ବସିରହିଛନ୍। ପୁନୀକଁର ପରିବାର ଲୁକ୍କର ଖୋଜଖବର କାହାରି ପାସେ ନାଇଁଥିଲାବେଲେ ଥାନୀୟ ପରଶାସନ ବି ନିସାହା ମହିଲାକଁର ଥଇଥାନ ଦିଗେ ପଦକ୍ଷେପ ନେବାର ଜାଗାରେ ଚୁପ୍ମାରି ବସିଛେ। ୨୦୧୧ ସାଲେ ଉଚ୍ଚ ନ୍ୟାୟାଳୟ ତାକର ଗୁଟେ ରାୟରେ କହିଥିଲେ ଯେ-ସମାଜ ଆର ପରିବାର ଦୁଆରା ଉପେକ୍ଷିତ ମାନସିକ ରୁଗୀକଁର ଚିକିସତ୍ା, ସୁରକ୍ଷା ଭାର ସରକାର ବୁଝ୍ବେ। ସରକାର ଇଦିଗେ ଧିଆନ୍ ଦେଇ ପଦକ୍ଷେପ ନେବାକେ ବି ପରଶାସନିକ ଅଧ୍କାରୀମାନକୁ ନିରଦେଶ ରହିଛେ। ହେଲେ ଦୁଖର କଥା ଅଧ୍କାରୀମାନେ ଘଟନା ଉପରେ ଅବଗତ ଥିଲେ ବି ଖାମଖିଆଲି ମନଭାବ ଲାଗି ପୁନୀ ଗଲା ୬ ମାସ ହେଲା ଗଛ୍ତଲେ ଅସୁରକ୍ଷିତ ଭାବେ ରହିଆସୁଛନ୍। ଯେତେ ଜଲଦି ହେବା ଥାନୀୟ ପରଶାସନ ପୁନୀକଁର ଥଇଥାନ କରବାକେ ପାପୀ ଗଁାର ଦଶରଥ ତାଣ୍ଡି, ସୁରେଶ ପୁରୋହିତ, ନାରାୟଣ ନାଗ୍, ଉପିନ୍ଦ୍ର ସୁନା, ଗୌରୀଶଙ୍କର ଦାଶ, ଶ୍ରୀରାମ ପଧାନ ପରମୁଖ ଦାବି କରିଛନ୍।
