କଣିହାଁ, ୧୮ା୮(ଡି.ଏନ.ଏ.) ଅନୁଗୋଳ ଜିଲା ସ୍ଥିତ ଏମସିଏଲର କଣିହାଁ କୋଇଲା ଖଣିର ବିଭିନ୍ନ ସ୍ଥାନରେ ଫାଟ ସୃଷ୍ଟି ହୋଇଛି। ଫଳରେ ଯେ କୌଣସି ସମୟରେ ଦୁର୍ଘଟଣା ଘଟିବାର ଆଶଙ୍କା ରହିଛି। ଖଣିର କଂସମୁଣ୍ଡା ସାଇଟରୁ ଏବେ କୋଇଲା ଖନନ ଓ ପରିବହନ ଚାଲିଛି। ଉପରି ଭାଗରେ ୨୦ ଫୁଟ ଉଚ୍ଚତାର ମାଟି ଓ କୋଇଲା ଥିବାବେଳେ ତଳୁ କୋଇଲା ଖନନ କରାଯାଉଛି। ଏଥିପାଇଁ ଦୈନିକ ଖଣିରେ ବ୍ଲାଷ୍ଟିଂ ହେଉଛି। ତେବେ ୧୦ ଦିନ ପୂର୍ବରୁ ଖଣିର ଉପର ଅଂଶରେ ଛୋଟ ଆକାରର ଫାଟ ହୋଇଥିବାବେଳେ ଏବେ ତାହା ପ୍ରାୟ ୧ ଫୁଟ ଓସାର ହୋଇଯାଇଥିବା ଦେଖିବାକୁ ମିଳିଛି। ଏ ଦିଗରେ ସତର୍କତା ଅବଲମ୍ବନ ନ କରାଗଲେ ଯେ କୌଣସି ମୁହୂର୍ତ୍ତରେ ଦୁର୍ଘଟଣା ଘଟିପାରେ ବୋଲି ଶ୍ରମିକ ମହଲରେ ଆଶଙ୍କା ପ୍ରକାଶ ପାଇଛି। ଖଣି କର୍ତ୍ତୃପକ୍ଷଙ୍କ ଅବହେଳା, ସର୍ଭେଗତ ତ୍ରୁଟି ଓ ଠିକ ଭାବେ ସୁରକ୍ଷା ଯାଞ୍ଚ ହେଉ ନ ଥିବାରୁ ଏପରି ଫାଟ ସୃଷ୍ଟି ହୋଇଥିବା କେତେଜଣ ଶ୍ରମିକ ନାମ ଗୋପନ ରଖି ପ୍ରକାଶ କରିଛନ୍ତି। ଏ ସମ୍ପର୍କରେ କଣିହାଁ କୋଇଲା ଖଣି ପ୍ରକଳ୍ପ ଅଧିକାରୀ ନାରାୟଣ ଦାସ ମହାପାତ୍ର କହିଛନ୍ତି, ବ୍ଲାଷ୍ଟିଂ ଯୋଗୁ ଏହି ଫାଟ ସୃଷ୍ଟି ହୋଇଛି। ଖଣି ପାଇଁ କୌଣସି ବିପଦ ନାହିଁ, କାରଣ ତଳେ ଓ ଉପରେ କଠିନ ଶିଳା ରହିଛି।
