ଲେହ,୧୯ା୮(ପି.ଟି.): କଂଗ୍ରେସ ଶାସନ ଅମଳରେ ପ୍ରତିରକ୍ଷା ନୀତିରେ ଲଦାଖକୁ ଉପଯୁକ୍ତ ଗୁରୁତ୍ୱ ଦିଆଯାଇ ନ ଥିବାରୁ ଚାଇନା ଡେମ୍ଚୋକ୍ ସେକ୍ଟର ପର୍ଯ୍ୟନ୍ତ ମାଡ଼ିଆସିଛି। ଅନୁଚ୍ଛେଦ ୩୭୦ ଉଚ୍ଛେଦ ଓ ଜମ୍ମୁ-କଶ୍ମୀରରୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ପରିଣତ କରିବା ନେଇ ପାର୍ଲାମେଣ୍ଟରେ ବିଲ୍ ଆଗତ ବେଳେ ନିମ୍ନ ସଦନରେ ସାରଗର୍ଭକ ଭାଷଣ ଦେଇ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିବା ଭାଜପା ସଦସ୍ୟ ଜାମ୍ୟାଙ୍ଗ୍ ସେରିଙ୍ଗ୍ ନାମଗ୍ୟାଲ ରବିବାର ଏହି ମନ୍ତବ୍ୟ ଦେଇଛନ୍ତି।
ପ୍ରଥମଥର ପାଇଁ ପ୍ରତିନିଧିତ୍ୱ କରୁଥିବା ୩୪ ବର୍ଷୀୟ ଏମ୍ପି ନାମ୍ଗ୍ୟାଲ ଏକ ସାକ୍ଷାତ୍କାରରେ କହିଛନ୍ତି, ଉତ୍ତେଜନାପୂର୍ଣ୍ଣ ପରିସ୍ଥିତିରେ ତୁଷ୍ଟୀକରଣ ନୀତି ଆପଣାଇ କଂଗ୍ରେସ ସରକାର କଶ୍ମୀରକୁ ବରବାଦ କରିଦେଇଥିଲା। ଏଥିଯୋଗୁ ଲଦାଖ ମଧ୍ୟ କ୍ଷତିଗ୍ରସ୍ତ ହୋଇଛି। ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ଦ୍ୱାରା ପ୍ରଣୀତ ‘ଫରଓ୍ବାର୍ଡ ପଲିସି’ ଚାଇନା ଆଡ଼କୁ ଆମେ ଧୀରେ ଧୀରେ ଅଗ୍ରସର ହେବା ସପକ୍ଷରେ ଉଦ୍ଦିଷ୍ଟ ଥିଲା ବୋଲି କୁହାଯାଏ। କାର୍ଯ୍ୟକାରୀ କରିବା ସମୟରେ ଏହି ନୀତି ‘ବ୍ୟାକ୍ଓ୍ବାର୍ଡ ପଲିସି’ରେ ପରିଣତ ହୋଇଥିଲା। ଫଳରେ ଚାଇନା ସୈନ୍ୟ ଆମ ଭୂଖଣ୍ଡରେ ଅନୁପ୍ରବେଶ କରିଆସିଥିଲା ବୋଲି ସେ ଦୋଷ ଦେଇଛନ୍ତି। ଏହି କାରଣରୁ ଅକ୍ସାଇ ଚୀନ୍ ସମ୍ପୂର୍ଣ୍ଣ ଭାବେ ଚାଇନା ଅଧୀନକୁ ଚାଲିଯାଇଛି। ପିପୁଲ୍ସ ଲିବରେଶନ୍ ଆର୍ମି (ପିଏଲ୍ଏ) ଡେମ୍ଚୋକ୍ର ନାଲ୍ଲା ପର୍ଯ୍ୟନ୍ତ ଅଗ୍ରସର ହୋଇଛି। କାରଣ ଲଦାଖବାସୀଙ୍କୁ କଂଗ୍ରେସର ୫୫ ବର୍ଷ ଶାସନରେ ଗୁରୁତ୍ୱ ଦିଆଯାଇ ନ ଥିଲା। କିନ୍ତୁ ଏବେ ଲଦାଖକୁ କେନ୍ଦ୍ରଶାସିତ ଅଞ୍ଚଳରେ ପରିଣତ କରାଯିବା ପରେ ଏହି କ୍ଷେତ୍ରକୁ ଉପଯୁକ୍ତ ପ୍ରାଧାନ୍ୟ ମିଳିବ ବୋଲି ନାମ୍ଗ୍ୟାଲ ଦୃଢ଼ୋକ୍ତି ବାଢ଼ିଛନ୍ତି।
