ନୂଆଦିଲ୍ଲୀ,୮।୩: ଲୋକସଭାରେ ବିରୋଧୀ ଦଳ ନେତା ଏବଂ କଂଗ୍ରେସ ନେତା ରାହୁଲ ଗାନ୍ଧୀ ଗୁଜରାଟ ଗସ୍ତରେ ଅଛନ୍ତି। ରାହୁଲ ତାଙ୍କ ଗସ୍ତର ଦ୍ୱିତୀୟ ଦିନରେ ଅହମ୍ମଦାବାଦରେ କଂଗ୍ରେସ କର୍ମୀଙ୍କୁ ସମ୍ବୋଧିତ କରିଥିଲେ। ସେ କହିଥିଲେ, କଂଗ୍ରେସ ଗତ ୩୦ ବର୍ଷ ଧରି ଗୁଜରାଟରେ କ୍ଷମତା ବାହାରେ ଅଛି, କିନ୍ତୁ ଏବେ ପରିବର୍ତ୍ତନର ଆବଶ୍ୟକତା ରହିଛି। ସେ କଂଗ୍ରେସ କର୍ମୀମାନଙ୍କୁ ଏକତା ରହିବାକୁ ବାର୍ତ୍ତା ଦେଇଥିଲେ ଏବଂ ଦଳର ବିଚାରଧାରା ବିରୋଧରେ କାମ କରୁଛନ୍ତି ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ।
ରାହୁଲ କହିଛନ୍ତି, ଗୁଜରାଟ କଂଗ୍ରେସରେ ଦୁଇ ପ୍ରକାରର ଲୋକ ଅଛନ୍ତି, ଜଣେ ଯେଉଁମାନେ ଦଳର ବିଚାରଧାରା ପ୍ରତି ପ୍ରତିବଦ୍ଧ ଏବଂ ଲୋକଙ୍କ ପାଇଁ କାମ କରୁଛନ୍ତି ଏବଂ ଦ୍ୱିତୀୟ ଯେଉଁମାନେ ଭାରତୀୟ ଜନତା ପାର୍ଟି (ଭାଜପା) ସହିତ ସମ୍ପର୍କ ରଖିଛନ୍ତି।କଂଗ୍ରେସ ନାମରେ କାମ କରୁଥିବା କିନ୍ତୁ ଜନସାଧାରଣଙ୍କୁ ସମ୍ମାନ ଏବଂ କାମ କରୁ ନ ଥିବା ଲୋକଙ୍କୁ ଅଲଗା କରିବା ଗୁରୁତ୍ୱପୂର୍ଣ୍ଣ।
ରାହୁଲ ତାଙ୍କ ଭାଷଣରେ କହିଛନ୍ତି, କଂଗ୍ରେସରେ ନେତାଙ୍କ ଅଭାବ ନାହିଁ, କିନ୍ତୁ ସଂଗଠନକୁ ମଜଭୁତ କରିବାର ଆବଶ୍ୟକତା ଅଛି। ଯେପର୍ଯ୍ୟନ୍ତ କଂଗ୍ରେସ ତାର ଦାୟିତ୍ୱ ନିର୍ବାହ ନ କରେ, ସେପର୍ଯ୍ୟନ୍ତ ଗୁଜରାଟର ଲୋକମାନେ ନିର୍ବାଚନରେ ଦଳକୁ ସମର୍ଥନ କରିବେ ନାହିଁ। ସେ କାର୍ଯ୍ୟକର୍ତ୍ତାମାନଙ୍କୁ ଏକତ୍ରିତ ହୋଇ ଲୋକଙ୍କ ସେବା କରିବାକୁ ଆହ୍ବାନ କରିଥିଲେ।
ମହାତ୍ମା ଗାନ୍ଧୀ ଏବଂ ସର୍ଦ୍ଦାର ପଟେଲଙ୍କ ବିଷୟରେ ଉଲ୍ଲେଖ କରି ସେ କହିଥିଲେ,ଏହି ମହାନ ନେତାମାନେ କଂଗ୍ରେସର ମଜଭୁତ ମୂଳଦୁଆ ସ୍ଥାପନ କରିଥିଲେ। ଗୁଜରାଟ ବର୍ତ୍ତମାନ ଫସି ରହିଛି ଏବଂ ଏହାକୁ ସଠିକ ଦିଗ ଦେଖାଇବା ଆବଶ୍ୟକ। ଆମେ ଗୁଜରାଟର ଯୁବକ, କୃଷକ, ବ୍ୟବସାୟୀ ଏବଂ ମହିଳାଙ୍କ ପାଇଁ ଆସିଛୁଏବଂ ସେମାନଙ୍କ ଅଧିକାର ପାଇଁ ଲଢ଼େଇ ଜାରି ରଖିବେ।
