ଭୁବନେଶ୍ୱର, ୧୨।୬(କ୍ରୀଡ଼ା ପ୍ରତିନିଧି)- ଇଣ୍ଡିଆନ ସୁପର ଲିଗ୍(ଆଇଏସଏଲ)ର ସପ୍ତମ ସଂସ୍କରଣ ପୂର୍ବରୁ ଓଡ଼ିଶା ଏଫସି ଦଳରେ ସାମିଲ ହୋଇଛନ୍ତି ଆସାମର ବୋରିଙ୍ଗଦାଓ ବୋଡୋ ଓ ମଣିପୁରର ଲୈସରାମ ପ୍ରେମଜିତ ସିଂ। ଉଭୟ ଖେଳାଳିଙ୍କ ସହ ଓଏଫସି ଗୁରୁବାର ଚୁକ୍ତି କରିଛି। ୨୦ ବର୍ଷୀୟ ବୋଡୋ ପୂର୍ବରୁ କେରଳ ବ୍ଲାଷ୍ଟର୍ସ ଓ ଚେନ୍ନାଇନ୍ ଏଫସି ପକ୍ଷରୁ ଆଇଏସଏଲ ଖେଳିବାର ଅଭିଜ୍ଞତା ରଖିଛନ୍ତି ଏବଂ ଇଣ୍ଡିଆନ ୟୁଥ୍ ଟିମ୍ର ଜଣେ ଗୁରୁତ୍ୱପୂର୍ଣ୍ଣ ସଦସ୍ୟ। କ୍ୟାରିୟରରେ ବେଙ୍ଗାଲୁରୁ ୟୁନାଇଟେଡ, ଗୋକୁଳମ କେରଳ, ମିନର୍ଭା ପଞ୍ଜାବ ସହିତ ଖେଳି ସାରିଥିବା ଏହି ଆସାମ ଓ୍ବିଙ୍ଗର ଏବେ ଓଏଫସି ସହିତ ୨ ବର୍ଷ ପାଇଁ ଚୁକ୍ତିବଦ୍ଧ ହୋଇଛନ୍ତି। ଅନ୍ୟପକ୍ଷରେ ଭୁବନେଶ୍ୱର ଭିତ୍ତିକ କ୍ଲବ ଓଏଫସି ସହିତ ୪ ବର୍ଷ ପାଇଁ ଚୁକ୍ତବଦ୍ଧ ହୋଇଥିବା ୧୮ ବର୍ଷୀୟ ପ୍ରେମଜିତ ପୂର୍ବରୁ ଆଇ-ଲିଗ୍ରେ ମଣିପୁରର ଟ୍ରାଉ ଏଫସି ପକ୍ଷରୁ ପ୍ରତିନିଧିତ୍ୱ କରିଛନ୍ତି।
ଉଭୟ ପ୍ରେମଜିତ ଓ ବୋଡୋଙ୍କୁ ସ୍ବାଗତ କରିଛନ୍ତି ଓଏଫସି ସଭାପତି ରୋହନ ଶର୍ମା। ”ପ୍ରେମଜିତଙ୍କ ଭବିଷ୍ୟତ ଉଜ୍ଜ୍ୱଳ। ସେ ଯଦି ଦକ୍ଷତା ଅନୁସାରେ ଖେଳିବେ ତେବେ ଆମ ଦଳରେ ଥିବା ଜେରୀଙ୍କ ସମକକ୍ଷ ଓ୍ବିଙ୍ଗର ହୋଇପାରିବେ। ମାତ୍ର ୧୮ ବର୍ଷୀୟ ହୋଇଥିଲେ ହେଁ ତାଙ୍କ ସ୍ପିଡ୍ ପ୍ରଭାବଶାଳୀ। ଆଗାମୀ ୪ ବର୍ଷ ମଧ୍ୟରେ ତାଙ୍କ ପ୍ରଦର୍ଶନରେ ଅଧିକ ଉନ୍ନତି ହେବା ଆଶା ରହିଛି“ ବୋଲି ରୋହନ ପ୍ରକାଶ କରିଛନ୍ତି। ବୋଡୋ ଭାରତର ଶ୍ରେଷ୍ଠ ଯୁବ ଖେଳାଳିଙ୍କ ମଧ୍ୟରୁ ଅନ୍ୟତମ। ଏବେ ମଧ୍ୟ ସେ ସୁଯୋଗ ପାଇଲେ ଚମତ୍କାରିତା ଦେଖାଇବାର ଦକ୍ଷତା ରଖିଛନ୍ତି। ପ୍ରଦର୍ଶନର ଛାପ ଛାଡ଼ିବା ସହିତ ନିଜ ନାମକୁ ଚର୍ଚ୍ଚାରେ ରଖିବା ପାଇଁ ବୋଡୋ କଠିନ ପରିଶ୍ରମ କରିବା ଆଶା ରହିଛି ବୋଲି ରୋହନ କହିଛନ୍ତି। ଅନ୍ୟପକ୍ଷରେ ଓଡ଼ିଶା ଏଫସି ସହିତ ଚୁକ୍ତି କରି ସ୍ବାଭାବିକଭାବେ ଖୁସି ଜାହିର କରିଛନ୍ତି ପ୍ରେମଜିତ ଓ ବୋଡୋ। ”ଓଡ଼ିଶା ଏଫସି ଯୁବ ଖେଳାଳିଙ୍କ ଉପରେ ବିଶ୍ୱାସ ସ୍ଥାପନ କରୁଛି। ମୋ ସହ ଚୁକ୍ତି ପାଇଁ ଏହି କ୍ଲବ ଆଗ୍ରହ ପ୍ରକାଶ କରିଥିବାରୁ ମୁଁ ଆନନ୍ଦିତ। ଏହି ଦଳ ପକ୍ଷରୁ ଆଇଏସଏଲ ଖେଳିବାକୁ ମୁଁ ପ୍ରସ୍ତୁତ। ପେସାଦାର କ୍ୟାରିୟରରେ ଆଗକୁ ବଢ଼ିବା ପାଇଁ ଏହା ମୋ ଲାଗି ବଡ଼ ସୁଯୋଗ“ ବୋଲି ପ୍ରେମଜିତ କହିଛନ୍ତି। ” ମୁଁ ଅତ୍ୟନ୍ତ ଉତ୍ସାହିତ ଏବଂ ଓଡ଼ିଶା ଏଫସି ପକ୍ଷରୁ ଅଭିଯାନ ଆରମ୍ଭ କରିବାକୁ ଅଧିକ ଦିନ ଅପେକ୍ଷା କରିବାକୁ ଚାହୁଁନାହିଁ। ମୋ ପ୍ରତି ବିଶ୍ୱାସସ୍ଥାପନ କରିଥିବାରୁ ମ୍ୟାନେଜମେଣ୍ଟକୁ ଧନ୍ୟବାଦ। ଯୁବ ଖେଳାଳିଙ୍କୁ ଅଧିକରୁ ଅଧିକ ସୁଯୋଗ ଦେଉଥିବା ଏକ ଦଳରେ ଯୋଗଦେଇଥିବାରୁ ମୁଁ ବହୁତ ଖୁସି। ଓଡ଼ିଆ ଦର୍ଶକଙ୍କ ସମ୍ମୁଖରେ ମୁଁ ଶ୍ରେଷ୍ଠ ପ୍ରଦର୍ଶନ ଦେବାକୁ ବ୍ୟଗ୍ର। ଆମ ଟିମ୍, ଆମ ଗେମ୍, ଆମ ଓଡ଼ିଶା“ ବୋଲି ବୋଡୋ ପ୍ରକାଶ କରିଛନ୍ତି।
