ବ୍ରହ୍ମପୁର ଅଫିସ୍,୨୬ା୧୧-ଛାତ୍ରୀଛାତ୍ରଙ୍କୁ ସୁସ୍ଥ ରଖିବା ପାଇଁ ଗଞ୍ଜାମ ଜିଲାରେ ଏକ ଅଭିନବ ଅଭିଯାନ ଆରମ୍ଭ ହୋଇଛି । ପାନୀୟ ଜଳ ପିଇବା ପାଇଁ ପିଲାମାନଙ୍କୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ସୋମବାରରୁ ଆରମ୍ଭ ହୋଇଛି ‘ପାଣିପିଆ ଘଣ୍ଟା’ ଅଭିଯାନ। ବ୍ରହ୍ମପୁର ଭି.ଭି.ଗିରି ବାଳିକା ଉଚ୍ଚ ବିଦ୍ୟାଳୟରେ ଜିଲାପାଳ ବିଜୟ ଅମୃତା କୁଲାଙ୍ଗେ ଏହାକୁ ଉଦ୍ଘାଟନ କରିଥିଲେ। ଛାତ୍ରୀମାନଙ୍କୁ ପାଣି ବୋତଲ ବାଣ୍ଟିବା ସହ ନିୟମିତ ପାଣି ପିଇବା ପାଇଁ ପରାମର୍ଶ ଦେଇଥିଲେ। ବ୍ରହ୍ମପୁର ଉପଜିଲାପାଳ ସିନ୍ଦେ ଦତ୍ତାତ୍ରୟ ଭାଉସାହେବ, ବ୍ରହ୍ମପୁର ମହାନଗର ନିଗମ କମିଶନର୍ ଚକ୍ରବର୍ତ୍ତୀ ସିଂ ରାଠୋର ଏବଂ ଜିଲା ଶିକ୍ଷା ଅଧିକାରୀ ସନାତନ ପଣ୍ଡା ପ୍ରମୁଖ ଉପସ୍ଥିତ ଥିଲେ ।
ଏହି ଅବସରରେ ଜିଲାପାଳ କୁଲାଙ୍ଗେ କହିଥିଲେ, ନିୟମିତ ପାଣି ପିଇବା ଦ୍ୱାରା ଚର୍ମରୋଗ, ପେଟ ରୋଗ ଏବଂ କିଡ୍ନୀ ରୋଗ ଭଳି ଅନେକ ରୋଗକୁ ଦୂର କରାଯାଇପାରିବ। ଦେଖିବାକୁ ମିଳୁଛି, ପିଲାମାନେ ଠିକ୍ ସମୟରେ ପାଣି ପିଇବାକୁ ଭୁଲି ଯାଉଛନ୍ତି। ଫଳରେ ବିଭିନ୍ନ ରୋଗରେ ଆକ୍ରାନ୍ତ ହେଉଛନ୍ତି । ସେମାନେ ସୁସ୍ଥ ନ ରହିଲେ ଭଲ ପାଠ ପଢ଼ିପାରିବେ ନାହିଁ। ସେଥିପାଇଁ ‘ପାଣି ପିଅନ୍ତୁ ସୁସ୍ଥ ରହୁନ୍ତୁ’ ସ୍ଲୋଗାନ୍ ଦିଆଯାଇଛି । ୱାଟର୍ ବେଲ୍ ବା ପାଣିପିଆ ଘଣ୍ଟା କାର୍ଯ୍ୟକ୍ରମ ଆରମ୍ଭ ହୋଇଛି। ସମସ୍ତ ଘରୋଇ ଏବଂ ସରକାରୀ ବିଦ୍ୟାଳୟ ସହ ଅଙ୍ଗନୱାଡ଼ିଗୁଡ଼ିକୁ ଏଥିରେ ସାମିଲ୍ କରାଯାଇଛି। ବେଲ୍ ବାଜିଲେ ପିଲା ଏବଂ ଶିକ୍ଷକମାନେ ପାଣି ପିଇବେ। ବିଦ୍ୟାଳୟ ଓ ଅଙ୍ଗନୱାଡ଼ି କେନ୍ଦ୍ରରେ ସଚେତନତା ବୋର୍ଡ଼ ମରାଯାଇଛି। ଶରୀର ପାଇଁ ପାଣିର ଆବଶ୍ୟକତା ସମ୍ପର୍କରେ କୁହାଯିବ। ଏହି ଅଭିଯାନ ନିୟମିତ ଚାଲୁ ରହିବ। ଯେଉଁ ବିଦ୍ୟାଳୟରେ ପିଇବା ପାଣି ବ୍ୟବସ୍ଥା ନାହିଁ, ସେଠାରେ ଖୁବ୍ ଶୀଘ୍ର ପାନୀୟ ଜଳ ପ୍ରକଳ୍ପ ନିର୍ମାଣ ହେବ ବୋଲି ଜିଲାପାଳ କୁଲାଙ୍ଗେ କହିଥିଲେ। ଜିଲା ଶିକ୍ଷା ଅଧିକାରୀ ସନାତନ ପଣ୍ଡା କହିଥିଲେ, ଦିନକୁ ୩ଥର ଘଣ୍ଟା ବାଜିବ । ସୋମବାରରୁ ଶୁକ୍ରବାର ପର୍ଯ୍ୟନ୍ତ ପୂର୍ବାହ୍ନ ୧୧ଟା ୪୦ମିନିଟ୍, ଅପରାହ୍ନ ସାଢ଼େ ଗୋଟାଏ ଏବଂ ୩ଟା ୧୫ମିନିଟ୍ରେ, ସେହିଭଳି ଶନିବାର ସକାଳ ୮ଟା, ପୂର୍ବାହ୍ନ ସାଢ଼େ ୯ଟା ଏବଂ ୧୦ଟା ୫୦ମିନିଟ୍ରେ ଘଣ୍ଟା ବାଜିବ। ସମସ୍ତେ ଏକାକାଳୀନ ପାଣି ପିଇବେ । ୫ମିନିଟ୍ ପାଇଁ ଏହି ବିରତି ରହିବ । ପିଲାମାନେ ବିଦ୍ୟାଳୟକୁ ଯିବା ବେଳେ ଅଭିଭାବକମାନେ ପାଣି ବୋତଲ ଦେଇ ପଠାଇବେ। ରଙ୍ଗେଇଲୁଣ୍ଡା ଗୋଷ୍ଠୀ ଶିକ୍ଷା ଅଧିକାରିଣୀ ପ୍ରଭାତୀ ମହାପାତ୍ର, ଜିଲା ଶାରୀରିକ ଶିକ୍ଷା ନିରୀକ୍ଷକ ଭାଗୀରଥି ସ୍ବାଇଁଙ୍କ ସମେତ ବିଦ୍ୟାଳୟର ସମସ୍ତ ଶିକ୍ଷୟିତ୍ରୀ ଶିକ୍ଷକ କାର୍ଯ୍ୟକ୍ରମ ପରିଚାଳନା କରିଥିଲେ ।
ବିଦ୍ୟାଳୟରେ ୱାଟର୍ ବେଲ୍ ଅଭିଯାନ ପ୍ରଥମ ଥର ପାଇଁ କେରଳରେ କାର୍ଯ୍ୟକାରୀ କରାଯାଇଥିଲା। ପରବର୍ତ୍ତୀ ସମୟରେ କର୍ନାଟକ ଏବଂ ତେଲଙ୍ଗାନାରେ କାର୍ଯ୍ୟକାରୀ କରାଯାଇଛି। ଆନ୍ଧ୍ରପ୍ରଦେଶ ସରକାର କାର୍ଯ୍ୟକାରୀ ପାଇଁ ଘୋଷଣା କରିଛନ୍ତି। ଓଡ଼ିଶାରେ ପ୍ରଥମ ଜିଲା ଭାବେ ଗଞ୍ଜାମରେ ଏହି କାର୍ଯ୍ୟକ୍ରମ କାର୍ଯ୍ୟକାରୀ କରାଯାଇଛି। ଏପରିକି ପିଲାମାନଙ୍କୁ ବୋତଲ ଯୋଗାଇଦେବା ପାଇଁ ମଧ୍ୟ ପ୍ରସ୍ତୁତି ଚାଲିଛି । ପୁରାତନ ଛାତ୍ର ଏବଂ ବଦାନ୍ୟ ବ୍ୟକ୍ତିମାନେ ବୋତଲ ଯୋଗାଇ ଦେବାକୁ ‘ମୋ ସ୍କୁଲ ଅଭିଯାନ’ରେ ଅର୍ଥରାଶି ପ୍ରଦାନ କରିବାକୁ ଜିଲାପାଳ କୁଲାଙ୍ଗେ ଆହ୍ବାନ କରିଛନ୍ତି ।