ଜଳେଶ୍ୱର,୨୭।୧୨(ଡି.ଏନ.ଏ.)-ବାଲେଶ୍ୱର ଜିଲା ଜଳେଶ୍ୱର ଲକ୍ଷ୍ମଣନାଥ ଗେଟ୍ ଦେଇ ଓଡ଼ିଶାରୁ ଲକ୍ଷ ଲକ୍ଷ ଟଙ୍କାର ଗଞ୍ଜେଇ ପଶ୍ଚିମବଙ୍ଗ ଚାଲାଣ ହେଉଛି। ଏହି ଗେଟ୍ ଦେଇ ଚାଲାଣକାରୀମାନେ ସହଜରେ ଖସି ଯାଉଥିବାବେଳେ ସୀମାନ୍ତରୁ ମାତ୍ର ୫ଶହ ମିଟର ଦୂରରେ ପଶ୍ଚିମବଙ୍ଗ ଦାନ୍ତୁନ ପୋଲିସ ଗୁରୁବାର ସନ୍ଧ୍ୟାରେ ୨ଜଣ ଯୁବକଙ୍କୁ ଗିରଫ କରିଛି। ତାଙ୍କଠାରୁ ୬୫କେଜି ଗଞ୍ଜେଇ ଓ ଏକ କାର୍ (ନଂ. ଓଡ଼ି୧୫ଏ-୨୭୩୭) ଜବତ କରାଯାଇଛି। ଜବତ ଗଞ୍ଜେଇର ମୂଲ୍ୟ ୩ଲକ୍ଷ ୨୫ ହଜାର ଟଙ୍କା ହେବ।
୧୬ନଂ. ଜାତୀୟ ରାଜପଥ ଓଡ଼ିଶାରୁ ପଶ୍ଚିମବଙ୍ଗକୁ ଗଞ୍ଜେଇ ଚାଲାଣର ଗଳାବାଟ ପାଲଟିଛି। ଓଡ଼ିଶା ପୋଲିସ ତଥା ଜଳେଶ୍ୱରରେ ଥିବା ଲକ୍ଷ୍ମଣନାଥ ଗେଟ୍ ସ୍ଥାଣୁ ପାଲଟିଛି। ଗୁରୁବାର ସନ୍ଧ୍ୟାରେ ଏକ କାର୍ରେ ୬୫ କେଜି ଗଞ୍ଜେଇ ବୋଝେଇ କରି ଗଞ୍ଜାମ ଜିଲା ବାରତ ଗ୍ରାମର କାହ୍ନା ସ୍ବାଇଁ (୨୩) ଓ ଗୁନ୍ଥାପଡ଼ା ଗ୍ରାମର ରାମଚନ୍ଦ୍ର ନାହାକ (୨୮) ଲକ୍ଷ୍ମଣନାଥ ଗେଟ୍ ପାରି ହୋଇଥିଲେ ମଧ୍ୟ ପୋଲିସ ଏହାର ଟେର ପାଇ ନ ଥିଲା। ପଶ୍ଚିମବଙ୍ଗର ପୋଲିସ ଏହି ସୀମାନ୍ତରୁ ମାତ୍ର ୫ଶହ ମିଟର ଦୂରରେ ଗାଡ଼ି ଓ ଗଞ୍ଜେଇ ଜବତ କରିବା ସହ ୨ଜଣଙ୍କୁ ଗିରଫ କରିବାରେ ସଫଳ ହୋଇଛି। ଓଡ଼ିଶା ସୀମାନ୍ତରେ ପୋଲିସର କୌଣସି ଚେକିଂ ନାହଁି। ଫଳରେ ଚୋରା ବ୍ୟବସାୟୀମାନଙ୍କ ପାଇଁ ୧୬ନଂ. ଜାତୀୟ ରାଜପଥ ଏକ ସହଜ ରାସ୍ତା ପାଲଟିଥିବା ଚର୍ଚ୍ଚା ହେଉଛି। ଓଡ଼ିଶାରୁ ଖସିଯାଇ ପଶ୍ଚିମବଙ୍ଗ ପୋଲିସ ଦ୍ୱାରା ଧରାପଡ଼ିଥିବା ଉଭୟ ଗଞ୍ଜେଇ ବେପାରୀଙ୍କୁ ଶୁକ୍ରବାର କୋର୍ଟଚାଲାଣ କରାଯିବ ବୋଲି ପଶ୍ଚିମବଙ୍ଗ ପୋଲିସ କହିଛନ୍ତି।
