କଟକ ଅଫିସ, ୧୭।୧୨: ଏସ୍ସିବି ମେଡିକାଲ ସମେତ ରାଜ୍ୟର ବିଭିନ୍ନ ସରକାରୀ ହସ୍ପିଟାଲରେ କୁକୁର କାମୁଡା ଇଞ୍ଜେକଶନ(ଆଣ୍ଟି ରାବିଜ୍ ଭ୍ୟାକସିନ)ର ଘୋର ଅଭାବ। ଗତ ୩ ଦିନ ହେବ ଏସ୍ସିବି ମେଡିକାଲରୁ ଏହି ଇଞ୍ଜେକଶନ ନ ପାଇ ଶତାଧିକ ରୋଗୀ ଫେରିଥିବା ଜଣାପଡିଛି। ଯୋଗାଣ ନ ଥିବା କହି ମେଡିକାଲ କର୍ତ୍ତୃପକ୍ଷ ଖସି ଯାଉଥିବାବେଳେ ରୋଗୀ ଡହଳ ବିକଳ ହେଉଛନ୍ତି। ଏହାର ଫାଇଦା ନେଇ କଟକର ଏକ ଘରୋଇ ହସ୍ପିଟାଲ ବେଶ୍ ଲାଭବାନ ହେଉଛି। ଉକ୍ତ ହସ୍ପିଟାଲର ଏଜେଣ୍ଟ ଏସ୍ସିବି ମେଡିକାଲ ଆଉଟଡୋର(ଡାକ୍ତର ରୁମ)ସାମ୍ନାରେ ବସି ରହୁଛନ୍ତି। ଡାକ୍ତରଙ୍କ ରୁମ୍ ଭିତରେ ମଧ୍ୟ ମେଡିକାଲ କର୍ମଚାରୀମାନେ ଏଥିପାଇଁ ନିୟୋଜିତ ଅଛନ୍ତି। ରୋଗୀ ଜଣକ ଡାକ୍ତରଙ୍କ ପାଖରୁ ଫେରିବା ମାତ୍ରେ ଏହି କର୍ମଚାରୀମାନେ ରୁମ ବାହାରେ ବସିଥିବା ଏଜେଣ୍ଟଙ୍କ ପାଖକୁ ପଠାଇ ଦେଉଛନ୍ତି। ଏଜେଣ୍ଟ ଜଣକ ରୋଗୀଙ୍କଠାରୁ ଟଙ୍କା ସଂଗ୍ରହ କରି ଇଞ୍ଜେକଶନ ଆଣି ଦେଉଛନ୍ତି। ଥରକେ ୫ଜଣ ରୋଗୀ ଏକତ୍ର ହେବା ପରେ ଏଜେଣ୍ଟ ଜଣକ ଇଞ୍ଜେକଶନ ପାଇଁ ଯାଉଛନ୍ତି। ପ୍ରତି ରୋଗୀ ପିଛା ୩୫୦ରୁ ୫୦୦ ଟଙ୍କା ଆଦାୟ ହେଉଛି। ସୋମବାର ମେଡିକାଲର ଏସ୍ପିଏମ(ସୋସିଆଲ ପ୍ରିଭେଣ୍ଟିଭ ମେଡିସିନ)ଆଉଟଡୋର ସାମ୍ନାରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା। ଆଉଟଡୋର ଭିତରେ ବିଭାଗୀୟ ମୁଖ୍ୟ ପ୍ରଫେସର ଡା. ରାମଚନ୍ଦ୍ର ଗିରି ଉପସ୍ଥିତ ଥିବା ଦେଖିବାକୁ ମିଳିଥିଲା। ରୋଗୀଙ୍କୁ ଇଞ୍ଜେକଶନ ମିଳୁ ନ ଥିବା ସମ୍ପର୍କରେ ଡା. ଗିରିଙ୍କୁ ପଚାରିବାରୁ ମେଡିକାଲରେ ଇଞ୍ଜେକଶନ ଅଭାବ ଥିବା ଘଟଣାକୁ ସେ ସ୍ବୀକାର କରିଥିଲେ। କେବଳ ଏସ୍ସିବି ମେଡିକାଲ ନୁହେଁ ରାଜ୍ୟରେ ଏଭଳି ଅବସ୍ଥା ଉପୁଜିଥିବା ସେ କହିଥିଲେ। ମୁଖ୍ୟତଃ ଗ୍ରାମାଞ୍ଚଳ ସମେତ କ୍ୟାପିଟାଲ ହସ୍ପିଟାଲ ଓ ଅନ୍ୟ ମେଡିକାଲ କଲେଜଗୁଡିକରୁ ଏଠାକୁ ରୋଗୀ ଇଞ୍ଜେକଶନ ନେବାକୁ ଆସିବାରୁ ଏଠାରେ ଏଭଳି ପରିସ୍ଥିତି ଉପୁଜିଛି। ଗତ ଶୁକ୍ରବାରଠାରୁ ମେଡିକାଲରେ ଇଞ୍ଜେକଶନ ଶେଷ ହୋଇଯାଇଛି। ଏ ସମ୍ପର୍କରେ ମେଡିକାଲ ଅଧୀକ୍ଷକଙ୍କୁ ଅବଗତ କରିଛି। ଘରୋଇ ମେଡିସିନ ଷ୍ଟୋରଗୁଡିକରେ ମଧ୍ୟ ଏହି ଇଞ୍ଜେକଶନ ମିଳୁ ନ ଥିବା ଡା. ଗିରି କହିଥିଲେ। ଆଉଟଡୋର ଆଗରେ ବେପାର ଜମେଇ ବସିଥିବା ଏମାନେ କିଏ ବୋଲି କହିବାରୁ ଡା. ଗିରି ସେଠାକୁ ଯାଇଥିଲେ। ତୁରନ୍ତ ଏ ସମ୍ପର୍କରେ ସେଠାରେ ଡ୍ୟୁଟି କରୁଥିବା ମେଡିକାଲର ସୁରକ୍ଷା କର୍ମୀଙ୍କୁ ଡା. ଗିରି ଜଣାଇବା ପରେ ସୁରକ୍ଷାକର୍ମୀ ଜଣକ ଏଜେଣ୍ଟଙ୍କ ପାଖକୁ ଯାଇ ଆଉଟଡୋର ବାହାରକୁ ଚାଲିଯିବାକୁ କହିଥିଲେ।
ମେଡିକାଲ ସୂଚନାନୁଯାୟୀ, ଗତ ଶୁକ୍ରବାର ପର୍ଯ୍ୟନ୍ତ ରୋଗୀଙ୍କୁ ଇଞ୍ଜେକଶନ ଯୋଗାଇ ଦିଆଯାଇଛି। ଶନିବାରଠାରୁ ଅଭାବ ଦେଖାଦେଇଛି। ଶୁକ୍ରବାର ଆଉଟଡୋରକୁ ୯୩ଜଣ ନୂଆ ରୋଗୀ ଓ ୯୦ଜଣ ପୁରୁଣା ରୋଗୀ ଆସିଥିଲେ। ଶନିବାର ମେଡିକାଲକୁ ୬୩ଜଣ ନୂଆ ଓ ୧୨୧ ଜଣ ପୁରୁଣା ରୋଗୀ ଇଞ୍ଜେକଶନ ପାଇଁ ଆସିଥିବା ଜଣାପଡିଛି। ନୂଆ ପୁରୁଣା ରୋଗୀଙ୍କୁ ମିଶାଇ ଆଉଟଡୋରକୁ ଦୈନିକ ୨୦୦ ରୋଗୀ ଆସୁଥିବା ମେଡିକାଲ ରେକର୍ଡ କହୁଛି। ସୋମବାର ବିଲେଇ କାମୁଡିଥିବା ୫ବର୍ଷର ପୁଅକୁ ନେଇ ମେଡିକାଲକୁ ଆସିଥିବା ଛତିଆ ଅଞ୍ଚଳର କୃଷ୍ଣଚନ୍ଦ୍ର ଦାସ ଇଞ୍ଜେକଶନ ପାଇଁ ଡହଳ ବିକଳ ହେଉଥିବାବେଳେ କଟକ ଝାଞ୍ଜିରିମଙ୍ଗଳା ଅଞ୍ଚଳର ଗୋପାଳ ସାହୁ କୁକୁର କାମୁଡାରେ ଆକ୍ରାନ୍ତ ହୋଇ ୩୫୦ ଜାଗାରେ ୫୦୦ ଟଙ୍କା ନେଇ ମୋତ କିଏ ଗୋଟିଏ ଇଞ୍ଜେକଶନ ଦିଅ ବୋଲି କହୁଥିବା ଦେଖାଯାଇଥିଲା। ସାଲେପୁର ଅଞ୍ଚଳର ନଗମା ଅଖତର ନାମ୍ନୀ ମହିଳା କୁକୁର କାମୁଡାର ଶିକାର ଝିଅଙ୍କୁ ଧରି ଆଉଟ୍ଡୋର ଆଗରେ ବିକଳ ହେଉଥିଲେ।
ଡାକ୍ତରୀ ପାଠ ଅନୁଯାୟୀ, ବନ୍ୟ ଜନ୍ତୁ କାମୁଡିବା ଦୂରର କଥା ଯଦି ନଖ ବାଜି ଦାଗ ହୋଇଛି, ତେବେ ବି ଇଞ୍ଜେକଶନର ଆବଶ୍ୟକତା ରହିଛି। କାରଣ ଜଳାନ୍ତକ ରୋଗରେ ମୃତ୍ୟୁହାର ୧୦୦ ପ୍ରତିଶତ ରହୁଥିବା ପାଠ କହୁଛି। ଏଭଳି ସ୍ଥିତିରେ ମେଡିକାଲରେ ଇଞ୍ଜେକଶନ ଅଭାବ ଏକ ଅସ୍ବାଭାବିକ ଅବସ୍ଥା ସୃଷ୍ଟି କରିଛି।
ମେଡିକାଲ ଅଧୀକ୍ଷକ ପ୍ରଫେସର ଡା. ସରୋଜ କୁମାର ସାହୁ କୁହନ୍ତି, ଏ ନେଇ ରାଜ୍ୟ ମେଡିକାଲ ନିଗମକୁ ଅବଗତ କରାଯାଇଛି। ମେଡିକାଲର ଜଣେ ବରିଷ୍ଠ ଡାକ୍ତରଙ୍କ କହିବାନୁଯାୟୀ, ଏଭଳି ଅଭାବ ଗତ ନଭେମ୍ବରରୁ ଦେଖାଦେଲାଣି। ପୃଥିବୀରେ ପ୍ରତିବର୍ଷ ଜଳାନ୍ତକ ରୋଗରେ ୬୦ହଜାର ରୋଗୀଙ୍କ ମୃତ୍ୟୁ ଘଟୁଥିବା ବେଳେ ମୃତକଙ୍କ ମଧ୍ୟରୁ ଏକତୃତୀୟାଂଶ କେବଳ ଭାରତର। ୯୭ ପ୍ରତିଶତ ମୃତ୍ୟୁ କୁକୁରକାମୁଡା ଜନିତ ହୋଇଥିବାବେଳେ ୨ପ୍ରତିଶତ ବିଲେଇ କାମୁଡା ଜନିତ ହୋଇଥାଏ। ଦେଶରେ ପ୍ରତିବର୍ଷ ୨୦ ମିଲିୟନ ଡୋଜର ଆବଶ୍ୟକତା ଥିବାବେଳେ ସେଥିରୁ ବାହାର ଦେଶକୁ ରପ୍ତାନୀ କରାଯାଉଥିବାରୁ ଏଭଳି ପରିସ୍ଥିତି ଉପୁଜିଛି। ଗତ ଅକ୍ଟୋବରରେ ଭାରତରୁ ୧୦ହଜାର ଭାୱେଲ ଇଞ୍ଜେକଶନ ମ୍ୟାନ୍ମାରକୁ ରପ୍ତାନି କରାଯାଇଛି। ମାତ୍ର ଏବେ ଦେଶର ବିଭିନ୍ନ ରାଜ୍ୟରେ ଏହି ଇଞ୍ଜେକଶନର ଅଭାବ ଦେଖାଦେଇଥିବା ସମ୍ପୃକ୍ତ ଡାକ୍ତର ଜଣଙ୍କ କହିଛନ୍ତି।
