ସଜନାଗଡ଼, ୧୦।୪(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ବ୍ଲକ ଅଧୀନ କେସିପୁର ପଞ୍ଚାୟତର ଭାଲିଆପୁଷି ଗ୍ରାମରେ ଅଚଳ ନଳକୂପକୁ ତୁରନ୍ତ ମରାମତି କରାଯାଉ ନ ଥିବାରୁ ସ୍ଥାନୀୟ ବାସିନ୍ଦାଙ୍କ ଅସନ୍ତୋଷ ଉଗ୍ରରୂପ ଧାରଣ କରିଛି। ଗୁରୁବାର ଏହାକୁ ମରାମତି କରିବାକୁ ଯାଇଥିବା ପଞ୍ଚାୟତସ୍ତରୀୟ ସ୍ବାବଲମ୍ବୀ କାରିଗର(ଏସ୍ଇଏମ୍) କୈଳାସ ବେହେରା ଆକ୍ରୋଶର ଶିକାର ହୋଇଛନ୍ତି। ଲୋକେ ତାଙ୍କୁ ବାନ୍ଧି ପକାଇବା ସହ ଗରା, ବାଲଟି ରଖି ଏହାର ଭିଡିଓ ଉତ୍ତୋଳନ କରି ଏହାକୁ ବିଡିଓ, ଜେଇ, ସରପଞ୍ଚ ଓ ସ୍ଥାନୀୟ ବିଧାୟକଙ୍କୁ ପଠାଇଥିଲେ। ପ୍ରଶାସନସ୍ତରରେ ଏ ସମ୍ପର୍କରେ ଅବଗତ ହେବା ପରେ ବିଡ଼ିଓ ଅନିତା ନାୟକ ଜେଇଙ୍କୁ ସମସ୍ତ ବିଷୟ ଅବଗତ କରାଇ ଜରୁରୀକାଳୀନ ଭିତ୍ତିରେ ନଳକୂପ ମରାମତି କାର୍ଯ୍ୟ ଆରମ୍ଭ କରିବାକୁ କହିଥିଲେ। ଆରଡବ୍ଲ୍ୟୁଏସ୍ଏସ୍ର ଜେଇ ହରେନ୍ଦ୍ର ବେହେରା ନଳକୂପର ସମସ୍ତ ଯନ୍ତ୍ରପାତି ସରପଞ୍ଚଙ୍କ ସହ ପଠାଇବା ପରେ ଏସ୍ଇଏମ୍ ମରାମତି କାର୍ଯ୍ୟ କରିଥିଲେ। ଏହାପରେ ପରିସ୍ଥିତି ଶାନ୍ତ ପଡ଼ିଥିଲା।
