ନୂଆଦିଲ୍ଲୀ,୨୫-୧୨: ଆଗାମୀ ୨୦୨୪ ସୁଦ୍ଧା ଦେଶର ଅର୍ଥ ବ୍ୟବସ୍ଥାକୁ ୫ ଲକ୍ଷ କୋଟି ଡଲାର କରିବାକୁ ସରକାର ଯୋଜନା ରଖିଛନ୍ତି। ଏହି ସମୟ ମଧ୍ୟରେ ଦେଶର ଅଣୁ,କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଗୁଡିକର ଅବଦାନକୁ ୨ ଟ୍ରିଲିୟନ ଡଲାର ବା ୨ ଲକ୍ଷ କୋଟିକୁ ବଢାଇବା ଲାଗି ସରକାର ଲକ୍ଷ୍ୟ ଧାର୍ଯ୍ୟ କରିଛନ୍ତି। ପ୍ରଧାନମନ୍ତ୍ରୀ ନିଯୁକ୍ତି ସୃଷ୍ଟି କାର୍ଯ୍ୟକ୍ରମ(ପିଏମ୍ଇଜିପି) କାର୍ଯ୍ୟକ୍ରମରେ ୬୫,୩୧୨ ଏମ୍ଏସ୍ଏମ୍ଇ ସ୍ଥାପନ ହୋଇଥିବା କେନ୍ଦ୍ର ଏମ୍ଏସ୍ଏମ୍ଇ ମନ୍ତ୍ରଣାଳୟ ପକ୍ଷରୁ ବାର୍ଷିକ ସମୀକ୍ଷାରେ କୁହାଯାଇଛି। ୨୦୨୪ ବେଳକୁ ଭାରତ ବିଶ୍ୱର ଏକ ପ୍ରମୁଖ ଅର୍ଥ ବ୍ୟବସ୍ଥା ଭାବେ ରୂପାନ୍ତରିତ ହେବାର କ୍ଷମତା ରଖୁଥିବା ସରକାର କହିଛନ୍ତି। ଏହି ସମୟରେ କ୍ଷୁଦ୍ର ଶିଳ୍ପ ନିଜର ଯୋଗଦାନକୁ ବଢାଇ ପାରିବେ ବୋଲି ଗୁରୁତ୍ୱାରୋପ କରାଯାଇଛି।
ପିଏମ୍ଇଜିପିରେ ୫.୨୨ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହୋଇଛି। ଏଥିରେ ୧୯୨୯ କୋଟି ଟଙ୍କାର ସବସିଡି ମଧ୍ୟ ବିନିଯୋଗ କରାଯାଇଛି। ୨୦୦୮-୦୯ ପରଠାରୁ କେନ୍ଦ୍ର ଏମ୍ଏସ୍ଏମ୍ଇ ମନ୍ତ୍ରଣାଳୟ ଏହି କାର୍ଯ୍ୟକ୍ରମକୁ କାର୍ଯ୍ୟକାରୀ କରାଉଛି। ସରକାରଙ୍କ ପ୍ରମୁଖ କ୍ରେଡିଟ ଲିଙ୍କଡ ସବସିଡି କାର୍ଯ୍ୟକ୍ରମ ମଧ୍ୟରେ ଏହା ଅନ୍ୟତମ। କ୍ଷୁଦ୍ରଶିଳ୍ପ ସ୍ଥାପନ ଦ୍ୱାରା ନିଯୁକ୍ତି ସୃଷ୍ଟିକୁ ଏଥିରେ ପ୍ରାଥମିକତା ଦିଆଯାଉଛି। ପାରମ୍ପରିକ କାରିଗର ଏବଂ ଗ୍ରାମୀଣ ଯୁବବର୍ଗଙ୍କୁ ରୋଜଗାରର ପନ୍ଥା ପ୍ରଦାନ ଲାଗି ଏହାକୁ ସରକାର ଆରମ୍ଭ କରିଥିବା ଜଣାପଡିଛି।
