ମୁମ୍ବାଇ,୨୭।୫: ବର୍ତ୍ତମାନ ଅର୍ଥ ବ୍ୟବସ୍ଥାର ଗତି ଧୀମା ହୋଇଥିବା ବେଳେ ବ୍ୟାଙ୍କଗୁଡ଼ିକରେ ଅନାଦାୟ ପରିସମ୍ପତ୍ତି(ଏନ୍ପିଏ) ବଢ଼ିବାର ଆଶଙ୍କା କରାଯାଇଛି। କରୋନା ପାଇଁ ଚଳିତ ଆର୍ଥତ୍କ ବର୍ଷରେ ଏନ୍ପିଏ ୫.୫ ଲକ୍ଷ କୋଟି ଟଙ୍କା ବଢ଼ିବ ବୋଲି ଏକ ରିପୋର୍ଟରେ ପ୍ରକାଶ ପାଇଛି। କର୍ପୋରେଟ ସେକ୍ଟରରେ ୩.୪ ଲକ୍ଷ କୋଟି ଟଙ୍କା ଏବଂ ଅଣ କର୍ପୋରେଟ ସେକ୍ଟରଗୁଡ଼ିକରେ ୨.୧ ଲକ୍ଷ କୋଟି ଟଙ୍କା ଏନ୍ପିଏ ବଢ଼ିବା ନେଇ ଇଣ୍ଡିଆ ରେଟିଂ ଆଣ୍ଡ ରିସର୍ଚ୍ଚ ପକ୍ଷରୁ ଆକଳନ କରାଯାଇଛି। କୋଭିଡ୍ ଯୋଗୁ ବର୍ତ୍ତମାନ ଚାହିଦା ଏବଂ ଯୋଗାଣ ବାଧାପ୍ରାପ୍ତ ହୋଇଛି। କମ୍ପାନୀଗୁଡିକର ରାଜସ୍ବ ମଧ୍ୟ କ୍ଷତିଗ୍ରସ୍ତ ହୋଇଛି। କର୍ପୋରେଟ ଋଣ ବାଦ୍ ଅଣ କର୍ପୋରେଟ ସେଗ୍ମେଣ୍ଟରେ କୃଷି, ରିଟେଲ ଏବଂ ଏମ୍ଏସ୍ଏମ୍ଇ ଋଣ ସାମିଲ ରହିଛି। କମ୍ପାନୀଗୁଡ଼ିକର କାରବାରରେ ପ୍ରଭାବ ଆସିଥିବାରୁ ଋଣ ପଇଠ କ୍ଷେତ୍ରରେ ଏହାର ପ୍ରଭାବ ରହିବ। କୋଭିଡ୍ର ପ୍ରଭାବ ବଜାର ଉପରେ ଦୀର୍ଘମିଆଦୀ ଭାବେ ରହିବ ବୋଲି ବିଶେଷଜ୍ଞମାନେ କହିଛନ୍ତି। କାରଣ ଯୋଗାଣ ଚେନ୍ ପ୍ରଭାବିତ ରହିଥିବା ବେଳେ ଚାହିଦା ନ ଥିବାରୁ କମ୍ପାନୀଗୁଡିକ ବର୍ତ୍ତମାନ ଟ୍ରାକ୍କୁ ଆସି ପାରିନାହାନ୍ତି। କମ୍ପାନୀଗୁଡିକୁ ପ୍ରଦାନ କରାଯାଇଥିବା ଋଣକୁ ବ୍ୟବସ୍ଥିତ କରିବା ଦିଗରେ ବ୍ୟାଙ୍କଗୁଡିକ ସମସ୍ୟା ସାମ୍ନା କରୁଛନ୍ତି। ଏପଟେ ବଜାର ସ୍ଥିତି ଠିକ୍ ନ ରହିବା ଯୋଗୁ କମ୍ପାନୀଗୁଡିକ ଉପରେ ଚାପ ପଡୁଛି। ଅନ୍ୟପକ୍ଷରେ ବ୍ୟାଙ୍କ ଉପରେ ଚାପ ରହିଲେ ଏହା ଋଣ ପ୍ରଦାନକୁ ମଧ୍ୟ ପ୍ରଭାବିତ କରିବ। ୨୦୨୦-୨୧ରେ ବ୍ୟାଙ୍କଗୁଡିକ ପ୍ରାୟ ୩୦ରୁ ୫୦ ହଜାର କୋଟି ଟଙ୍କା ପୁଞ୍ଜି ଆବଶ୍ୟକ କରିବେ ବୋଲି ରିପୋର୍ଟରେ ପ୍ରକାଶ ପାଇଛି।
