ନୂଆଦିଲ୍ଲୀ, ୭ା୬: ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦର ୫ ଅସ୍ଥାୟୀ ସିଟ୍ ପାଇଁ ହୋଇଥିବା ଭୋଟ୍ରେ ପାକିସ୍ତାନକୁ ଚୟନ କରାଯାଇଛି। ୧୯୩ ସଦସ୍ୟ ଥିବା ସଂଯୁକ୍ତ ରାଷ୍ଟ୍ର ମହାସଭାରେ ଗୁପ୍ତଭାବେ ମତଦାନ ପ୍ରକ୍ରିୟା ଅନୁଷ୍ଠିତ ହୋଇଥିଲା। ଏଥିରେ ଜିତିବା ପାଇଁ ୧୯୩ ଦେଶ ମଧ୍ୟରୁ ଦୁଇ-ତୃତୀୟାଂଶ ଅର୍ଥାତ ୧୨୮ଟି ଦେଶର ସମର୍ଥନ ଆବଶ୍ୟକ। ପାକିସ୍ତାନ ଛଡ଼ା ଏହି ସିଟ୍ ପାଇଁ ଡେନ୍ମାର୍କ, ଗ୍ରୀସ୍, ପନାମା ଏବଂ ସୋମାଲିଆକୁ ଚୟନ କରାଯାଇଛି। ବର୍ତ୍ତମାନ ଏବେ ଏହି ଦେଶଗୁଡ଼ିକ ଦୁଇ ବର୍ଷ ପାଇଁ ସୁରକ୍ଷା ପରିଷଦକୁ ସେବା ପ୍ରଦାନ କରିବେ। ଆସନ୍ତା ବର୍ଷ ଅର୍ଥାତ ୨୦୨୫ରୁ ସେମାନଙ୍କର କାର୍ଯ୍ୟକାଳ ଆରମ୍ଭ ହେବ।
ମିଳିତ ଜାତିସଂଘ ସୁରକ୍ଷା ପରିଷଦକୁ ବିଶ୍ୱ ସୁରକ୍ଷା ପରିଚାଳନା ପାଇଁ ସର୍ବ ବୃହତ ଫୋରମ ଭାବରେ ବିବେଚନା କରାଯାଏ । ବିଶ୍ୱରେ ଶାନ୍ତି ବଜାୟ ରଖିବା ଏବଂ ସାମୂହିକ ନିରାପତ୍ତାର ନୀତି ପାଳନ କରିବା ଏହାର ପ୍ରମୁଖ ଦାୟିତ଼୍ବ । ମିଳିତ ଜାତିସଂଘ ସୁରକ୍ଷା ପରିଷଦର ଅସ୍ଥାୟୀ ସଦସ୍ୟତା ସମୟ ସମୟରେ ବଦଳିଥାଏ, ଯେପରି ଏଥର ମଧ୍ୟ ଘଟିଛି ।
ଏହାପୂର୍ବରୁ ମିଳିତ ଜାତିସଂଘ ସୁରକ୍ଷା ପରିଷଦର ୧୦ ଜଣ ଅସ୍ଥାୟୀ ସଦସ୍ୟ ଜାପାନ, ଇକ୍ୟୁଏଡର୍, ମୋଜାମ୍ବିକ, ମାଲ୍ଟା ଏବଂ ସୱିଜରଲ୍ୟାଣ୍ଡକୁ ଅନ୍ତର୍ଭୁକ୍ତ କରାଯାଇଥିଲା। ସେମାନଙ୍କର କାର୍ଯ୍ୟକାଳ ୩୧ ଡିସେମ୍ବରରେ ଶେଷ ହୋଇଥିଲା। ସେମାନଙ୍କ ସ୍ଥାନ ପୂରଣ ପାଇଁ ଅନୁଷ୍ଠିତ ର୍ନିବାଚନରେ ସୋମାଲିଆ ୧୭୯ ଭୋଟ ପାଇଥିବାବେଳେ ଆଫ୍ରିକା ଏବଂ ଏସିଆ-ପ୍ରଶାନ୍ତ ମହାସାଗରୀୟ ଦେଶର ଦୁଇଟି ସିଟ ପାଇଁ ପାକିସ୍ତାନ ୧୮୨ ଭୋଟ ପାଇଛି। ଏଥି ସହିତ, ଲାଟିନ ଆମେରିକୀୟ ଏବଂ କାରିବିଆନ ଦେଶ ପାଇଁ ପାନାମା ୧୮୩ ଭୋଟ, ପଶ୍ଚିମ ୟୁରୋପୀୟ ଏବଂ ଅନ୍ୟାନ୍ୟ ଦେଶ ପାଇଁ ଡେନମାର୍କ ୧୮୪ ଭୋଟ ଏବଂ ଗ୍ରୀସ ୧୮୨ ଭୋଟ ପାଇଛି । ଏହି ପାଞ୍ଚଜଣ ନୂତନ ସଦସ୍ୟଙ୍କ କାର୍ଯ୍ୟକାଳ ୨୦୨୫ ଜାନୁୟାରୀ ୧ରୁ ଆରମ୍ଭ ହେବ ।
