ନୂଆଦିଲ୍ଲୀ,୧୫।୫: କରୋନା ଭାଇରସ୍ ମୁକାବିଲା ପାଇଁ ଜାରି ଲକ୍ଡାଉନ୍ ଦେଶର ଅର୍ଥନୀତିକୁ ଉଜାଡ଼ିଦେଇଛି। ଏଥିଯୋଗୁ ସହରଗୁଡ଼ିକରେ ଜୀବିକା ହରାଇ ଗାଁମୁହାଁ ହୋଇଥିବା ଦାଦନ ଶ୍ରମିକମାନଙ୍କ ଦୁର୍ଦ୍ଦଶା ସବୁଠୁ ବେଶି ଦେଖିବାକୁ ମିଳିଛି। ଶହ ଶହ କି.ମି. ରାସ୍ତା ପାଦରେ ଚାଲି ଭିଟାମାଟିକୁ ଧାଉଁଥିବା ଶ୍ରମିକଙ୍କ ଦୁଃଖର କରୁଣ ଚିତ୍ର ଟିଭି ପରଦା ଓ ସୋସିଆଲ ମିଡିଆରେ ବହୁଳ ପ୍ରସାରିତ ହେବା ପରେ ସରକାରଙ୍କୁ ଚାରିଆଡ଼ୁ ସମାଲୋଚନାର ଶିକାର ହେବାକୁ ପଡ଼ିଛି। ଏହାକୁ ଦୃଷ୍ଟିରେ ରଖି ଅସଙ୍ଗଠିତ କ୍ଷେତ୍ରର ଏହି ଶ୍ରମିକମାନଙ୍କ ପାଇଁ କେନ୍ଦ୍ର ସରକାରଙ୍କ ପକ୍ଷରୁ ବଡ଼ ଘୋଷଣା କରାଯାଇଛି। ଆମତ୍ନିର୍ଭର ଭାରତ ଆର୍ଥିକ ପ୍ୟାକେଜ୍ର ଦ୍ୱିତୀୟ ଭାଗରେ ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ‘ଓ୍ବାନ୍ ନେଶନ ଓ୍ବାନ୍ ରାଶନ କାର୍ଡ’ ଏବଂ ଦୁଇମାସ ପାଇଁ ମାଗଣାରେ ଖାଦ୍ୟଶସ୍ୟ ପ୍ରଦାନ ନେଇ ଘୋଷଣା କରିଛନ୍ତି। ଏହି ଯୋଜନା ଅନୁସାରେ ପ୍ରାୟ ୮ କୋଟି ଦାଦନ ଶ୍ରମିକ ଲାଭାନ୍ବିତ ହେବେ ବୋଲି ସରକାର ଆକଳନ କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ମଙ୍ଗଳବାର ଘୋଷିତ ୨୦ ଲକ୍ଷ କୋଟିର ମେଗା ଆର୍ଥିକ ପ୍ୟାକେଜ ସମ୍ପର୍କରେ ଗୁରୁବାର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଦ୍ୱିତୀୟ ବିବରଣୀ ପ୍ରଦାନ କରିଛନ୍ତି। ଏକ ଖବରଦାତା ସମ୍ମିଳନୀରେ ସେ କହିଛନ୍ତି, ଲକ୍ଡାଉନ୍ ଯୋଗୁ ରାଜ୍ୟ ବାହାରେ ଫସିଥିବା କିମ୍ବା ନାମ ପଞ୍ଜୀକୃତ ହୋଇ ଦୋକାନରୁ ଉଚିତ ମୂଲ୍ୟରେ ରାଶନ ପାଉ ନ ଥିବା ଦାଦନ ଶ୍ରମିକମାନେ ଏହି ପ୍ୟାକେଜ୍ରୁ ଲାଭାନ୍ବିତ ହେବେ। ଏହାସହ ଯେଉଁ ଦାଦନମାନଙ୍କ ରାଶନ କାର୍ଡ ନାହିଁ ସେମାନଙ୍କୁ ପରବର୍ତ୍ତୀ ଦୁଇମାସ ପାଇଁ ମାଗଣାରେ ଖାଦ୍ୟଶସ୍ୟ ଯୋଗାଇ ଦିଆଯିବ। ଜାତୀୟ ଖାଦ୍ୟ ସୁରକ୍ଷା ଆଇନ (ଏନ୍ଏଫ୍ଏସ୍ଏ) କିମ୍ବା ରାଜ୍ୟ କାର୍ଡ ହିତାଧିକାରୀମାନଙ୍କୁ ଜଣପିଛା ୫ କେ.ଜି. ଶସ୍ୟ ପ୍ରଦାନ କରାଯିବ। ଏହାସହ ଏହି ବର୍ଗର ପ୍ରତି ପରିବାରକୁ ୧ କେ.ଜି. ଚଣା ଦୁଇମାସ ପାଇଁ ଦିଆଯିବ। ନିଜ ନିଜ ରାଜ୍ୟକୁ ଫେରୁଥିବା ପ୍ରବାସୀମାନଙ୍କ ପାଇଁ ଏହା ଏକ ବୈଧ ଚିନ୍ତା। ଏଥିରୁ ୮ କୋଟି ପ୍ରବାସୀ ଲାଭବାନ ହେବେ। ଏଥିପାଇଁ ୩,୫୦୦ କୋଟି ଟଙ୍କା ଖର୍ଚ୍ଚ ହେବ। କେନ୍ଦ୍ର ସରକାର ସମ୍ପୂର୍ଣ୍ଣ ଭାବେ ଏହି ଅର୍ଥ ବହନ କରିବେ।
ସୀତାରାମନ ଆହୁରି କହିଛନ୍ତି ଯେ, ୨୩ ରାଜ୍ୟର ୬୭ କୋଟି ହିତାଧିକାରୀଙ୍କ ପାଇଁ ‘ଏକ ଦେଶ ଏକ ରାଶନ କାର୍ଡ’ ବ୍ୟବସ୍ଥା ଲାଗୁ କରାଯିବ। ଏହି ଯୋଜନା ସାଧାରଣ ବଣ୍ଟନ ବ୍ୟବସ୍ଥା (ପିଡିଏସ୍) ସହ ଜଡ଼ିତ ୮୩% ଜନସଂଖ୍ୟାକୁ କଭର୍ କରିବ। ୨୩ ରାଜ୍ୟରେ ଥିବା ୬୭ କୋଟି ରାଶନ କାର୍ଡଧାରୀ (ଯେଉଁମାନେ କି ପିଡିଏସ୍ ଜନସଂଖ୍ୟାର ୮୩%) ଅଗଷ୍ଟ ୨୦୨୦ ପର୍ଯ୍ୟନ୍ତ ନ୍ୟାଶନାଲ ପୋର୍ଟେବିଲିଟି ଅଧୀନରେ ଆସିଯିବେ ଏବଂ ମାର୍ଚ୍ଚ ୨୦୨୧ ପୂର୍ବରୁ ୧୦୦% ନ୍ୟାଶନାଲ ପୋର୍ଟେବିଲିଟି ହାସଲ କରାଯାଇପାରିବ। ସେହିପରି ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ପ୍ରବାସୀମାନଙ୍କୁ ଶସ୍ତାରେ ଭଡ଼ାଘର ଉପଲବ୍ଧ କରାଇବା ନେଇ ମଧ୍ୟ ଘୋଷଣା କରାଯାଇଛି। କେନ୍ଦ୍ର ସରକାର ପ୍ରବାସୀମାନଙ୍କ ପାଇଁ ଆଶ୍ରୟସ୍ଥଳ ନିର୍ମାଣ କରବା ଲାଗି ରାଜ୍ୟ ସରକାରମାନଙ୍କୁ ରାଜ୍ୟ ବିପର୍ଯ୍ୟୟ ପରିଚାଳନା ପାଣ୍ଠି (ଏସ୍ଡିଆର୍ଏଫ୍) ବିନିଯୋଗ କରିବାକୁ ଅନୁମତି ଦେଇଛନ୍ତି। ଏହାସହ ଏସ୍ଡିଆର୍ଏଫ୍ ପାଇଁ ୧୧,୦୦୨ କୋଟି ଟଙ୍କାର ଅନୁଦାନ ମଧ୍ୟ ମଞ୍ଜୁର କରିଛନ୍ତି। ସେହିପରି ବାସଚ୍ୟୁତ ହୋଇଥିବା ଲୋକଙ୍କୁ ୩ ବେଳା ଖାଇବା ଦିଆଯାଉଥିବାବେଳେ ସେମାନଙ୍କ ପାଇଁ ଅର୍ଥ ବ୍ୟବସ୍ଥା ମଧ୍ୟ କରାଯାଇଛି। ଶ୍ରମ ଆଇନରେ ସଂଶୋଧନ ଆଣିବା ଉପରେ ମଧ୍ୟ କାମ ଚାଲିଛି ବୋଲି ସୀତାରାମନ ସୂଚନା ଦେଇଛନ୍ତି।
