ଲୋକମାନେ ବିବାହ ପାଇଁ ବିଭିନ୍ନ ପ୍ରକାର ପ୍ରସ୍ତୁତି କରନ୍ତି। ସବୁବେଳେ କିଛି ସ୍ବତନ୍ତ୍ର କରିବାକୁ ମଧ୍ୟ ଚାହିଁଥା’ନ୍ତି। ଏଥିସହ ମାତାପିତାଙ୍କର ମଧ୍ୟ ସେମାନଙ୍କ ସନ୍ତାନମାନଙ୍କର ବିବାହକୁ ନେଇ କିଛି ବିଶେଷ ଇଚ୍ଛା ଥାଏ। ସେମାନେ ତାହା ପୂରଣ କରିବା ଲାଗି ସବୁକିଛି କରିପାରନ୍ତି, ଯାହା ହରିୟାଣାର ସିର୍ସାର ନାଥୁସରି କଳାର ଏକ ବିବାହରୁ ସାମ୍ନାକୁ ଆସିଛି। ନାଥୁସରିକଳା ଗାଁର ରଘୁବୀର ସିଂ କଡ଼ୱାସରଙ୍କ ପୁଅ ଆୟୁଷ ରାଜସ୍ଥାନ ନୋହରର ପିଚକାରାଇ ଗାଁର ନିଶାଙ୍କୁ ବିବାହ କରିଛନ୍ତି। ଏହି ବିବାହରେ ବର କନ୍ୟାଠାରୁ ଗୋଟିଏ ନଡ଼ିଆ ଓ ୧ ଟଙ୍କା ଗ୍ରହଣ କରିଛନ୍ତି। ହେଲେ କନ୍ୟାଙ୍କୁ ବିବାହ କରିବା ପରେ ତାଙ୍କୁ ହେଲିକପ୍ଟରରେ ଘରକୁ ଆଣିଛନ୍ତି। ଆୟୁଷଙ୍କ ପିତା ରଘୁବୀରଙ୍କର ଇଚ୍ଛା ଥିଲା ଯେବେ ବି ତାଙ୍କ ପୁଅ ବିବାହ କରିବ, ସେ ତାଙ୍କ ବୋହୂକୁ ହେଲିକପ୍ଟରରେ ଆଣିବେ। ବିବାହ ସ୍ଥିର ହେବାପରେ ଏହି ଇଚ୍ଛା ପୂରଣ ପାଇଁ ହେଲିକପ୍ଟର ନିମନ୍ତେ ଅର୍ଥ ଯୋଗାଡ଼ଠାରୁ ଆରମ୍ଭକରି ଅନ୍ୟ ପ୍ରସ୍ତୁତି ଶେଷ କରିଥିଲେ। ହେଲିକପ୍ଟରରେ ବୋହୂ ନେଇ ଆସିବା ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଏହି ବିବାହ ଦେଖିବା ପାଇଁ ବହୁ ସଂଖ୍ୟାରେ ଲୋକ ତାଙ୍କ ଘରେ ପହଞ୍ଚିଥିଲେ।
