ଭୟରେ ଥାନା ଦୁଆରମୁହଁ ମାଡୁ ନ ଥିବା ଆଦିବାସୀଙ୍କ ବିଶ୍ୱାସଭାଜନ ହୋଇପାରିିଛି ରାଜସ୍ଥାନ ପୋଲିସ। ଉଦୟପୁର ରେଞ୍ଜର ମହାନିରୀକ୍ଷକ ବିନୀତା ଠାକୁର୍ ଓ ଡୁଙ୍ଗରପୁର ଜିଲା ପୋଲିସ ଅଧୀକ୍ଷକ ଜୟ ଯାଦବ ସପ୍ତାହରେ ଗୋଟିଏ ଦିନ ଆଦିବାସୀ ଗାଁକୁ ଯାଇ ସେଠାରେ ପିଲାମାନଙ୍କୁ ପଢାଉଛନ୍ତି। ପୋଲିସ ଅଧିକାରୀମାନେ ଛୋଟ ପିଲାମାନଙ୍କୁ ପ୍ରାରମ୍ଭିକ ସ୍ତରର ଶିକ୍ଷା ପ୍ରଦାନ କରୁଛନ୍ତି। ଏହା ବ୍ୟତୀତ ଦ୍ୱାଦଶ ଶ୍ରେଣୀର ପିଲାମାନଙ୍କୁ ବିଭିନ୍ନ ବିଷୟ ପଢାଇବା ସହ ସେମାନଙ୍କୁ ସରକାରୀ ଚାକିରି ସମ୍ପର୍କରେ ଅବଗତ ମଧ୍ୟ କରୁଛନ୍ତି। କେବଳ ଏତିକି ନୁହେଁ, ଆଦିବାସୀଙ୍କ ଉନ୍ନତି ପାଇଁ କରାଯାଇଥିବା ଯୋଜନା ବିଷୟରେ ଏମାନେ ସଚେତନ କରୁଛନ୍ତି। ସମୟ ସମୟରେ ପୋଲିସ ଅଧିକାରୀମାନେ ପିଲାମାନଙ୍କୁ ବାହାରକୁ ବୁଲାଇବା ଲାଗି ମଧ୍ୟ ନେଉଛନ୍ତି ଓ ପିଲାମାନେ ଏମାନଙ୍କୁ ‘ପୋଲିସ ଗୁରୁ’ ବା ‘ପୋଲିସ ଚାଚା’ ବୋଲି ସମ୍ବୋଧନ କରୁଛନ୍ତି। ଉକ୍ତ ଅଧିକାରୀମାନେ ପିଲାମାନଙ୍କ ସହ ମଧ୍ୟାହ୍ନଭୋଜନ କରୁଛନ୍ତି। ଏମିତି କି ଜୟ ଯାଦବ ଗୋଟିଏ ଦିନ ରାତିରେ ଆଦିବାସୀଙ୍କ ସାଥିରେ ରହୁଛନ୍ତି। ଏହି ସମୟରେ ସେ ଆଦିବାସୀ ସଂସ୍କୃତି ସମ୍ପର୍କରେ ଜାଣିବା ସହ ସେମାନଙ୍କୁ ଅନ୍ଧବିଶ୍ୱାସ ଯୋଗୁ ହେଉଥିବା କ୍ଷତି ସମ୍ପର୍କରେ ଅବଗତ କରୁଛନ୍ତି। ସେହିପରି ବାଂଶବାଡା ପୋଲିସ ଅଧୀକ୍ଷକ କେଶର ଶେଖାଓ୍ବତ ତାଙ୍କ ଅଞ୍ଚଳରେ ସରକାରୀ ସ୍କୁଲକୁ ଯାଇ ପିଲାମାନଙ୍କୁ ଗଣିତ ପଢାଉଛନ୍ତି। ଏହି ବରିଷ୍ଠ ଅଧିକାରୀମାନେ ଥାନା ଅଧିକାରୀମାନଙ୍କ ଦ୍ୱାରା ଗରିବ ପିଲାମାନଙ୍କୁ ବହି, ଖାତା ଓ ୟୁନିଫର୍ମ ମଧ୍ୟ ଯୋଗାଇଦେଉଛନ୍ତି।
