ନୂଆଦିଲ୍ଲୀ,୧୪।୪ (ପି.ଟି.): କୋଭିଡ୍-୧୯ କାରଣରୁ ସାରା ଦେଶରେ ଲକ୍ଡାଉନ୍ ଜାରି ରହିଥିବା ବେଳେ ଅଲ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଏକ ନୂଆ ପଦକ୍ଷେପ ନେଇଛି। ଏଆଇଏଫ୍ଏଫ୍ ୩ଟି ଅନ୍ଲାଇନ୍ ସେମିନାର ଆୟୋଜିତ କରିଛି। କୋଚିଂର କୌଶଳର ଉନ୍ନତି ନେଇ ଏହି ସେମିନାର ଆୟୋଜିତ ହୋଇଥିଲା। କୋଚ୍ମାନଙ୍କ କାର୍ଯ୍ୟଦକ୍ଷତା ଉନ୍ନତି ନେଇ ଏହି ସେମିନାରରେ ଦୃଷ୍ଟି ଦିଆଯାଇଥିଲା। ଏଆଇଏଫ୍ଏଫ୍ କୋଚ୍ ଏଜୁକେଶନର ମୁଖ୍ୟ ସାଭିଓ ମାଡେଇରା ଏପ୍ରିଲ ୧, ୩ ଓ ୮ ତାରିଖରେ ଏହି ସେମିନାରର ଆୟୋଜନ କରିଥିଲେ। ସାରା ଦେଶର ୧୪ ପ୍ରଶିକ୍ଷକ ମଧ୍ୟ ଏଥିରେ ଅଂଶଗ୍ରହଣ କରିଥିଲେ। ପରବର୍ତ୍ତୀ ସେମିନାର ଏପ୍ରିଲ ୧୬ ତାରିଖରେ ଆୟୋଜନ ହେବ। କୋଚ୍ମାନେ ଫୁଟବଲ ସହିତ ଜଡିତ ରହିବା ପାଇଁ ଓ ସେମାନଙ୍କର ଦକ୍ଷତା ବୃଦ୍ଧି ପାଇଁ ଏପରି ପ୍ରୟାସ କରାଯାଇଥିଲା ବୋଲି ଭାରତୀୟ ଦଳର ସହକାରୀ କୋଚ୍ ମାରିଆନୋ ଡିଆସ୍ କହିଛନ୍ତି। କୋଚିଂ କୋର୍ସ ନେଇ ମଧ୍ୟ ଏହି ସେମିନାରଗୁଡିକରେ ସବିଶେଷ ଆଲୋଚନା ହୋଇଥିଲା।
ଜି ଲାଇସେନ୍ସ ସାର୍ଟିଫିକେଟ, ଏଆଇଏଫ୍ଏଫ୍ ଡି ଲାଇସେନ୍ସ, ଏଆଇଏଫ୍ଏଫ୍ ସି ଲାଇସେନ୍ସ ସାର୍ଟିଫିକେଟ୍ କୋର୍ସର ଉନ୍ନତି ପାଇଁ ଏକ କମିଟି ଗଠିତ ହୋଇଛି। ଏଥିରେ ଡିଆସ୍ ସାମିଲ ରହିଛନ୍ତି। ଡିଆସ୍ଙ୍କ ତତ୍ତ୍ୱାବଧାନରେ ଚର୍ଚ୍ଚିଲ ବ୍ରଦର୍ସ କ୍ଲବ ୨୦୧୨-୧୩ ସେସନରେ ଆଇ-ଲିଗ୍ ଟାଇଟଲ ହାସଲ କରିଥିଲା। ଅନ୍ଲାଇନ ସେସନ ଆମ ପାଇଁ ବେଶ୍ ଉପଯୋଗୀ ହୋଇଛି ବୋଲି ଡିଆସ କହିଛନ୍ତି। ଏହି କମିଟିରେ ସାମିଲ ହୋଇଥିବା ଅନ୍ୟ ବ୍ୟକ୍ତିବିଶେଷମାନେ ହେଲେ ଶକ୍ତି ଚୌହାନ, ଜେଡି ଅଲମେଇଦା, ଶେଖର କେରକର, ଗୌତମ ଘୋଷ, ଜନ୍ କେନ୍ନେଥ ରାଜ, କାଲେଟାନୋ ପିନୋ, ବିଜିସ ବେନ, ଉତ୍ତମ ନେଗୀ, ଥୋମାସ ଜୋସେଫ, ପାର୍ଥସାରଥି ତୁଲସୀ, ଦୀନେଶ ନାୟାର ଓ ଗୁମ୍ପେ ରିମେ।
