ନୂଆଦିଲ୍ଲୀ,୪।୮: ମଧ୍ୟପ୍ରଦେଶର ଦତିଆ ବିଧାନସଭା ଆସନରେ ହୋଇଥିବା ଉପନିର୍ବାଚନରେ ପରାଜୟ ଭାରତୀୟ ଜନତା ପାର୍ଟି (BJP) ପାଇଁ ଚିନ୍ତାର କାରଣ ପାଲଟିଛି। ଏହି ବଡ଼ ପରାଜୟ ପରେ ଭାଜପା ନେତୃତ୍ୱ ତୁରନ୍ତ ଆକ୍ସନ ମୋଡ୍କୁ ଆସିଛି ଏବଂ ଦଳ ପକ୍ଷରୁ ଏକ ବଡ଼ ନିଷ୍ପତ୍ତି ନିଆଯାଇଛି।
ଦତିଆ ଉପନିର୍ବାଚନରେ ପରାଜୟର କାରଣ ସମୀକ୍ଷା ପାଇଁ ଭାଜପା ଦୁଇ ସଦସ୍ୟ ବିଶିଷ୍ଟ ଏକ କମିଟି ଗଠନ କରିଛି। ପ୍ରଦେଶ ମହାମନ୍ତ୍ରୀ ଗୌରବ ରଣଦିଭେ ଏବଂ ପୂର୍ବତନ ସଂଗଠନ ମନ୍ତ୍ରୀ ଅମ୍ବାରାମ କରାଡାଙ୍କୁ ଏହି ଦାୟିତ୍ୱ ଦିଆଯାଇଛି।
ଏହି ଦୁଇ ସଦସ୍ୟ ନିର୍ବାଚନ ପ୍ରଚାରରେ ସାମିଲ ହୋଇଥିବା ସମସ୍ତ ମନ୍ତ୍ରୀ, ବିଧାୟକ ଏବଂ ଭାଜପାର ପଦାଧିକାରୀଙ୍କ ସହ ଆଲୋଚନା କରି ପରାଜୟର କାରଣ ଅନୁଧ୍ୟାନ କରିବେ।
ଆଲୋଚନା ଶେଷ ହେବା ପରେ କମିଟି ନିଜର ରିପୋର୍ଟ ଭାଜପା ହାଇକମାଣ୍ଡଙ୍କୁ ପ୍ରଦାନ କରିବ। ଏହି ରିପୋର୍ଟ ଆଧାରରେ ସମସ୍ତଙ୍କ ଦାୟିତ୍ୱ ନିର୍ଦ୍ଧାରଣ କରାଯିବ। ଦାୟିତ୍ୱ ନିର୍ଦ୍ଧାରଣର ନିଷ୍ପତ୍ତି ପରେ ପରାଜୟ ପାଇଁ ଦାୟୀ ନେତାମାନଙ୍କ ବିରୋଧରେ ଦଳ କଠୋର କାର୍ଯ୍ୟାନୁଷ୍ଠାନ ନେଇପାରେ ବୋଲି ଚର୍ଚ୍ଚା ଜୋର୍ ଧରିଛି।
