ଛତ୍ରପୁର,୨୩।୬(ଦିଲ୍ଲୀପ ସାମଲ): ‘ଆମ ଗଞ୍ଜାମ, ସ୍ବଚ୍ଛ ଗଞ୍ଜାମ’ ଅଭିଯାନ ଅନ୍ତର୍ଗତ ଆଜି ଛତ୍ରପୁର ପୌରପରିଷଦର ଏକାମ୍ର ନଗରସ୍ଥିତ ଶିଶୁ ଉଦ୍ୟାନରେ ସ୍ବଚ୍ଛତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମ ଗଞ୍ଜାମ ଜିଲାପାଳ ଭି. କୀର୍ତ୍ତି ଭାସନଙ୍କ ତତ୍ତ୍ୱାବଧାନରେ ସମ୍ପନ୍ନ ହୋଇଥିଲା। ଏହି ଅଭିଯାନରେ ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ ଯୋଗଦେଇ ଉଦ୍ୟାନ ପରିସର ସଫା କରିଥିଲେ। ସେ ଏହି ଅବସରରେ ସ୍ବଚ୍ଛତା କେବଳ ଏକ ଅଭିଯାନ ନୁହେଁ, ବରଂ ଏକ ସାମାଜିକ ଦାୟିତ୍ୱ ବୋଲି କହିଥିଲେ। ସୁସ୍ଥ, ସୁନ୍ଦର ଓ ସ୍ବଚ୍ଛ ଗଞ୍ଜାମ ଗଠନ ପାଇଁ ଏପରି ପଦକ୍ଷେପ ଜନସଚେତନତା ବୃଦ୍ଧି କରିବା ସହ ଲୋକଙ୍କୁ ସ୍ବଚ୍ଛତା ପ୍ରତି ଅଧିକ ଦାୟିତ୍ୱବାନ କରିବ ବୋଲି ସେ ଆଶାବ୍ୟକ୍ତ କରିଥିଲେ ।
ସ୍ବଚ୍ଛତା ବିନା ଗଞ୍ଜାମର ଗୌରବ ଅଧୂରା। ସ୍ବଚ୍ଛ ଗଞ୍ଜାମ, ସୁନ୍ଦର ଗଞ୍ଜାମ ଗଢ଼ିବା ପାଇଁ ପ୍ଲାଷ୍ଟିକ-ମୁକ୍ତ ଏବଂ ପରିବେଶ ଅନୁକୂଳ ଜିଲା ନିର୍ମାଣ ଆବଶ୍ୟକ। ପ୍ରତି ମଙ୍ଗଳବାର ନିଜ ଗାଁ ଓ ସହରକୁ ସ୍ବେଚ୍ଛାକୃତ ଭାବେ ସଫା କରିବା ପାଇଁ ଜିଲାପାଳ ଶ୍ରୀ ଭାସନ ଜିଲାବାସୀ, ବିଶେଷକରି ଯୁବପିଢ଼ୀଙ୍କୁ ଆହ୍ବାନ କରିବା ସହ ନିଜ ଅଞ୍ଚଳକୁ ସଦାସର୍ବଦା ସଫାସୁତୁରା ରଖିବା ପାଇଁ ସ୍ଥାନୀୟ ଅଞ୍ଚଳବାସୀଙ୍କ ଶପଥପାଠ କରାଇଥିଲେ। ଏହି ସ୍ବଚ୍ଛତା ଅଭିଯାନରେ ଛତ୍ରପୁର ପୌରପାଳିକାର ଉପାଧ୍ୟକ୍ଷ ଡି ପାପା ରାଓ, ୧୧ ନମ୍ବର ୱାର୍ଡର କାଉନସିଲର ସନ୍ତୋଷୀ ସେଠୀ, ଛତ୍ରପୁର ପୌରପାଳିକାର ନିର୍ବାହୀ ଅଧିକାରୀ ପ୍ରସନ୍ନ କୁମାର ଦାଶ, ଜିଲା ପ୍ରଶାସନର ଅଧିକାରୀ, ଗଣମାଧ୍ୟମ ପ୍ରତିନିଧି ଓ ସ୍ଥାନୀୟ ଜନସାଧାରଣ ଯୋଗଦେଲେ।
Dharitri – Odisha’s No.1 Odia Daily
