ଓ୍ବାଶିଂଟନ,୨୧ା୧୦: ବିଦ୍ୟୁତ୍ଚାଳିତ ସ୍କୁଟର (ଇ-ସ୍କୁଟର) ପରିବହନର ଏକ ଲୋକପ୍ରିୟ ମାଧ୍ୟମରେ ପରିଣତ ହୋଇଥିବାବେଳେ କ୍ୱଚିତ୍ ହେଲ୍ମେଟ୍ ବ୍ୟବହାରରୁ ନାବାଳକ ଓ ଯୁବବର୍ଗଙ୍କ ମଧ୍ୟରେ ଦୁର୍ଘଟଣାଜନିତ ଆହତ ସଂଖ୍ୟା ବର୍ଷକ ମଧ୍ୟରେ ୭୧ ପ୍ରତିଶତ ବୃଦ୍ଧି ପାଇଛି। ଜଣେ ଭାରତୀୟ ବଂଶୋଦ୍ଭବ ବୈଜ୍ଞାନିକଙ୍କ ନେତୃତ୍ୱରେ କରାଯାଇଥିବା ନୂତନ ଗବେଷଣାରୁ ଏହା ଜଣାପଡ଼ିଛି। ୨ ବର୍ଷର ଅଧ୍ୟୟନକୁ ଆଧାରକରି ଆମେରିକା ଏମର୍ଜେନ୍ସି ବିଭାଗ ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ ଇ-ସ୍କୁଟର ଦୁର୍ଘଟଣାରେ ୧୩,୫୫୭ ପିଲା ଆହତ ହୋଇଛନ୍ତି। ୨୦୨୦ରେ ଆହତଙ୍କ ସଂଖ୍ୟା ୫,୦୧୨ ଥିବାବେଳେ ୨୦୨୧ରେ ଏହା ୮,୫୪୫କୁ ବଢ଼ିଛି। ମୁଖ୍ୟତଃ ସେମାନଙ୍କ ହାଡ଼ରେ ଫାଟ ହୋଇଥିବାବେଳେ ସର୍ବାଧିକ ମୁଣ୍ଡରେ ଆଘାତ ଲାଗିଛି। ଅଧିକରୁ ଅଧିକ ନାବାଳକ ଓ କିଶୋର କିଶୋରୀ ଇ-ସ୍କୁଟର ବ୍ୟବହାର କରୁଥିବାବେଳେ ନିରାପଦ ଡ୍ରାଇଭିଂ ଲାଗି ଡାକ୍ତର, ନୀତି ନିର୍ଦ୍ଧାରକ ଓ ଗବେଷକମାନେ ଏକାଠି କାମ କରୁଛନ୍ତି। ଡ୍ରାଇଭିଂ ବେଳେ ହେଲ୍ମେଟ୍ ବ୍ୟବହାରକୁ ବାଧ୍ୟତାମୂଳକ କରିବା ଏବଂ ଅଧିକ ବାଇକ୍ ଓ ସ୍କୁଟର ଲେନ୍ ନିର୍ମାଣ ଆବଶ୍ୟକ ବୋଲି ପେରେଲମାନ୍ ସ୍କୁଲ୍ ଅଫ୍ ମେଡିସିନ୍ର ରାଧିକା ଗୁପ୍ତା କହିଛନ୍ତି। ମୁଣ୍ଡରେ ଆଘାତ ଲାଗିଥିବା ପିଲାଙ୍କ ମଧ୍ୟରୁ ୬୭ ପ୍ରତିଶତ ହେଲ୍ମେଟ୍ ପିନ୍ଧି ନ ଥିବା ଜଣାପଡ଼ିଛି।
